തിരുവനന്തപുരം യൂണിവേഴ്‌സിറ്റി കോളജിന് പിന്നാലെ ഹോസ്റ്റലിലും എസ്.എഫ്.ഐയുടെ ഗുണ്ടാവിളയാട്ടം. സഹപ്രവര്‍ത്തകനെ കുത്തിക്കൊലപ്പെടുത്താന്‍ ശ്രമിച്ചതിന് പിന്നാലെ കെ.എസ്.യു പ്രവര്‍ത്തകനെ പുറത്തുന്നിന്നുള്ള പാര്‍ട്ടി ഗുണ്ടകളെ കൊണ്ടുവന്ന് മര്‍ദ്ദിച്ച് അവശനാക്കി. കോളജിലെ പല നേതാക്കളും നേരിട്ട് സംഘട്ടനത്തില്‍ പങ്കെടുക്കാതെയാണ് ഇത്തരത്തിലൊരു നീക്കം നടത്തിയതെന്ന് കെ.എസ്.യു ആരോപിക്കുന്നു. കെ എസ് യു യുണിറ്റ് ജനറല്‍ സെക്രട്ടറിയും രണ്ടാം വര്‍ഷ എം.എ വിദ്യാര്‍ത്ഥിയായ നിതിന്‍ രാജിനെയാണ് ഇന്നലെ യൂണിവേഴ്‌സിറ്റി ഹോസ്റ്റലില്‍ വെച്ച് ക്രൂരമായി മര്‍ദ്ദിച്ചത്. എസ് എഫ് ഐ പ്രവര്‍ത്തകരും പാളയംകേന്ദ്രീകരിച്ച് പ്രവര്‍ത്തിക്കുന്ന പാര്‍ട്ടി ഗുണ്ടകളും ഉള്‍പ്പെടുന്നതായി കെ.എസ്.യു ആരോപിക്കുന്നു.

യൂണിവേഴ്‌സിറ്റി കോളജില്‍ യുണിറ്റ് രൂപീകരിക്കാന്‍ മുന്‍പില്‍ നിന്നത് മുതല്‍ നിതിന്‍ എസ്.എഫ്.ഐക്കാരുടെ നോട്ടപ്പുള്ളിയായിരുന്നു. അതിന് പിന്നാലെ എസ്.എഫ്.ഐയുടെ പുന്നാപുരംകോട്ടയായ യൂണിവേഴ്‌സിറ്റി ഹോസ്റ്റലില്‍ താമസിക്കാന്‍ ധൈര്യം കാണിച്ചത് എസ് എഫ് ഐ നേതാക്കള്‍ക്ക് വലിയ നാണക്കേടായെന്നാണ് ആക്ഷേപം. തുടര്‍ന്ന് എസ്.എഫ്.ഐ നേതാവായ മഹേഷിന്റെ നേതൃത്വത്തില്‍ ക്രൂരമായി മര്‍ദിക്കുകയായിരുന്നു. നാഭിക്കും, ജനനേന്ദ്രത്തിനും മര്‍ദ്ദനമേറ്റെന്ന് കെ.എസ്.യുക്കാര്‍ പറഞ്ഞു. പരിക്കേറ്റ നിതിന്‍ രാജ് മെഡിക്കല്‍ കോളജ് ആശുപത്രിയില്‍ ചികിത്സയിലാണ്. വിദ്യാര്‍ത്ഥികളാണ് നിതിനെ ആശുപത്രിയില്‍ പ്രവേശിപ്പിച്ചത്. ഇന്നലെ രാത്രി 11 മണിയോടെയായിരുന്നു സംഭവം. നിതിന്റെ മുറിയില്‍ മറ്റു ചിലര്‍ക്കൊപ്പം കത്തിയുമായെത്തി ഭീഷണിപ്പെടുത്തുകയും കത്തിയുടെ പിടികൊണ്ട് പുറത്തും നെഞ്ചത്തും ഇടിച്ചശേഷം കൈ ചവിട്ടി ഒടിക്കുകയുമായിരുന്നെന്നും നിതിന്‍ പൊലീസിന് നല്‍കിയ പരാതിയില്‍ പറയുന്നു.

പരാതി ലഭിച്ചിട്ടില്ലെന്നാണ് കന്റോണ്‍മെന്റ് പൊലീസ് പറയുന്നു. കോളേജില്‍ ഒരു വിദ്യാര്‍ത്ഥിയെ ശാരീരികമായി ഉപദ്രവിക്കാന്‍ ശ്രമിച്ചത് ചോദ്യം ചെയ്യുകയും താക്കീത് നല്‍കുകയും ചെയ്തതിലുള്ള വൈരാഗ്യം കൊണ്ടാണ് കെ.എസ്.യു സംഘടനയ്‌ക്കെതിരെ ആരോപണം ഉന്നയിക്കുന്നതെന്ന് എസ്.എഫ്.ഐ പറയുന്നു. വിദ്യാര്‍ത്ഥിയെ ഉപദ്രവിക്കാന്‍ ശ്രമിച്ചതിന് വാര്‍ഡന് പരാതി നല്‍കിയതായും എസ്.എഫ്.ഐ അറിയിച്ചു.
ഹോസ്റ്റല്‍ കുറേ നാളായി സാമൂഹിക വിരുദ്ധരും പാര്‍ട്ടി ഗുണ്ടകളും തമ്പടിച്ചിട്ടുള്ളതായി മറ്റ് വിദ്യാര്‍ത്ഥികള്‍ ആരോപിക്കുന്നു, അര്‍ഹരായ വിദ്യാര്‍ത്ഥികളെ വിരട്ടി ഓടിച്ചാണ് സാമൂഹിക വിരുദ്ധ സംഘം ഹോസ്റ്റല്‍ മുറികള്‍ സുരക്ഷിത താവളമാക്കിയിട്ടുള്ളത്. രാത്രികാലത്ത് അടിയന്തരമായി പൊലീസ് ഹോസ്റ്റലില്‍ പരിശോധന നടത്തണമെന്നും കെ.എസ്.യു ആവശ്യപ്പെട്ടു.

യൂണിവേഴ്‌സിറ്റി ഹോസ്റ്റലില്‍ സാമൂഹ്യവിരുദ്ധസംഘം രാത്രികാലങ്ങളില്‍ തമ്പടിക്കുന്നുണ്ടെന്നും കഞ്ചാവ് ഉള്‍പ്പെടെയുള്ള ലഹരിവസ്തുക്കള്‍ വില്‍ക്കുകയും ഉപയോഗിക്കുകയും ചെയ്യുന്നത് ഇവരാണെന്നും ആക്ഷേപം ഉയര്‍ന്നിട്ടുണ്ട്. എസ്.എഫ്.ഐക്കാരല്ലാത്ത വിദ്യാര്‍ത്ഥികളെ ഹോസ്റ്റലില്‍ തങ്ങാന്‍ അനുവദിക്കില്ല, പഠനം പൂര്‍ത്തിയാക്കിയ വിദ്യാര്‍ത്ഥികളില്‍ പലരും മുറി ഒഴിഞ്ഞുകൊടുക്കാതെ ഹോസ്റ്റലില്‍ തങ്ങി പി.എസ്.സി ഉള്‍പ്പെടെയുള്ള കോച്ചിംഗുകള്‍ക്കും മറ്റും പോവുകയും സ്വകാര്യസ്ഥാപനങ്ങളില്‍ അടക്കം ജോലി ചെയ്യുന്നതായും ആരോപണം ഉയര്‍ന്നിട്ടുണ്ട്. എന്നാല്‍ ആരും പരാതി നല്‍കാന്‍ തയ്യാറായിട്ടില്ല. തൊട്ടപ്പന്‍ എന്ന അപരനാമത്തില്‍ അറിയപ്പെടുന്ന ഗുണ്ടയാണ് ഹോസ്റ്റലും യൂണിവേഴ്‌സിറ്റി ഹോസ്റ്റലും നിയന്ത്രിക്കുന്നതെന്നും കത്തിക്കുത്ത് സംഭവത്തെ തുടര്‍ന്ന് നിരവധി വിദ്യാര്‍ത്ഥികള്‍ രഹസ്യമായി മാധ്യമങ്ങളോട് പറഞ്ഞിരുന്നു. പണ്ട് തൊട്ടതെല്ലാം പൊന്നാക്കിയിരുന്നു യൂണിവേഴ്‌സിറ്റി കോളജും അതിന്റെ ഹോസ്റ്റലും ഇന്ന് അക്രമികളുടെ സങ്കേതമായി മാറിയതിന് പിന്നില്‍ എല്ലാ വിദ്യാര്‍ത്ഥി പ്രസ്ഥാനങ്ങള്‍ക്കും പങ്കുണ്ടെന്നാണ് നിരവധി വിദ്യാര്‍ത്ഥികള്‍ പറയുന്നത്.