വടകര ബൈപ്പാസില്‍ ആശ ആശുപത്രിക്കുസമീപം ടാങ്കര്‍ ലോറി റോഡ്റോളറിലിടിച്ചുമറിഞ്ഞ് പന്ത്രണ്ടായിരം ലിറ്റര്‍ പെട്രോള്‍ റോഡിലേക്ക് പരന്നൊഴുകി. അപകടസമയത്ത് തീപ്പൊരി ഉണ്ടാകാത്തതിനാല്‍ വന്‍ദുരന്തം തലനാരിഴയ്ക്ക് ഒഴിവായി. ഡ്രൈവറും ക്ലീനറും നിസ്സാരപരിക്കുകളോടെ രക്ഷപ്പെട്ടു. ഒട്ടേറെ വീടുകളും സ്ഥാപനങ്ങളും തൊട്ടരികെ ആശുപത്രിയും ഉള്ള പ്രദേശത്ത് ടാങ്കര്‍ മറിഞ്ഞ് പെട്രോള്‍ പരന്നൊഴുകുന്നതായ വാര്‍ത്ത പ്രദേശത്തെ ഭീതിയിലാക്കി.

അന്തരീക്ഷത്തിലും പെട്രോളിന്റെ ഗ്യാസ് അപകടരമായരീതിയില്‍ തങ്ങിനിന്നു. അഗ്‌നിശമനസേനയും പോലീസും നാട്ടുകാരുമെല്ലാം കൈമെയ് മറന്ന് പെട്രോള്‍ ഒഴിവാക്കാന്‍ നേതൃത്വം നല്‍കി. ബണ്ടുകെട്ടി പെട്രോള്‍ തടഞ്ഞുനിര്‍ത്തിയശേഷം ബാരലുകളിലും മറ്റും കോരിയെടുത്ത് ചോറോട് മീത്തലങ്ങാടിയില്‍ കടല്‍ത്തീരത്തെ ആള്‍പ്പാര്‍പ്പില്ലാത്ത പറമ്പിലേക്ക് ഒഴുക്കി. പെട്രോള്‍ ഒഴുകിയ വഴിയിലുടനീളം മണലും മണ്ണും വിതറി. പെട്രോളിനും ടാങ്കറിനും തീപിടിക്കാതിരിക്കാന്‍ അഗ്‌നിശമനസേന വെള്ളവും ദ്രാവക ഇന്ധനങ്ങളിലെ തീയണയ്ക്കാന്‍ ഉപയോഗിക്കുന്ന പതയും നിര്‍ത്താതെ ചീറ്റി. ആറുമണിക്കൂറിനുശേഷമാണ് സ്ഥിതിഗതികള്‍ നിയന്ത്രണവിധേയമായത്. ഇത്രയും സമയം ബൈപ്പാസില്‍ ഗതാഗതവും മുടങ്ങി. വ്യാഴാഴ്ച പുലര്‍ച്ചെ 5.30-ഓടെയാണ് സംഭവം. എറണാകുളത്തുനിന്ന് കണ്ണൂര്‍ കണ്ണപുരത്തേക്ക് പെട്രോളുമായി പോവുകയായിരുന്നു കെ.എല്‍. 59 സി. 2426 നമ്പര്‍ ടാങ്കര്‍ ലോറി. ടാങ്കറിനു മുന്നിലുണ്ടായിരുന്ന റോഡ്റോളര്‍ എതിരേവന്ന വാഹനത്തിന്റെ വെളിച്ചത്തില്‍ കാണാതെ പോയതാണ് അപകടത്തിനിടയാക്കിയത്.