വൈദ്യുതി വകുപ്പ് മന്ത്രി എം.എം. മണി നാട്ടുകാര്‍ക്ക് സ്വന്തം മണിയാശാനാണ്. അതിനാല്‍ തന്നെ മണിയാശാന്‍ അവര്‍ക്ക് എല്ലാമെല്ലാമാണ്. മണിയാശാന്റെ നാടന്‍ പ്രയോഗങ്ങളും നാട്ടുവര്‍ത്തമാനങ്ങളും പലപ്പോഴും കേരളം ചര്‍ച്ച ചെയ്തതാണ്. നാട്ടുകാരെ സംബന്ധിച്ച് മണിയാശാനെ ഇഷ്ടപ്പെടുന്നതും കലര്‍പ്പില്ലാത്ത ഈ നാടന്‍ തന്നെയാണ്.

എല്ലാ ചടങ്ങുകളിലും മുഖ്യാതിഥിയെ സുഖിപ്പിച്ച് വിടുകയെന്നത് കേരളത്തിന്റെ ഒരു ശൈലിയാണ്. ഇത് പലപ്പോഴും സ്വാഗത പ്രസംഗകരാ ഏറ്റെടുക്കുന്നത്. എന്നാല്‍ മണിയാശാന്‍ പങ്കെടുത്ത ഇടുക്കിയിലെ ചടങ്ങില്‍ അത് ഏറ്റെടുത്തത് കുടുംബശ്രീക്കാരാണ്. മണിയാശാനെ പാട്ടിലൂടെ സുഖിപ്പിച്ച് വിടാന്‍ യോഗം കിട്ടിയത് കുടുംബശ്രീക്കാര്‍ക്കാണ്. അതവര്‍ ഭംഗിയായി നിര്‍വഹിക്കുകയും ചെയ്തു. അപ്രതീക്ഷിതമായ പുകഴ്ത്തല്‍ കേട്ട് മന്ത്രി മണി പോലും താളം പിടിച്ചു. കശുവണ്ടിപ്പരിപ്പ് താളത്തിനനുസരിച്ച് കഴിച്ചാണ് മന്ത്രി താളം പിടിച്ചത്. മലയോര ഗ്രാമത്തിലെ വ്യത്യസ്ഥനാം ഒരു ബാര്‍ബറാം ബാലനെ... എന്ന ഗാനമാണ് കുടുംബശ്രീക്കാര്‍ ഏറ്റെടുത്തത്. വരികള്‍ ഒന്ന് മാറ്റിയാല്‍ മന്ത്രി മണിയെ പുകഴ്ത്താന്‍ പറ്റിയ പാട്ട്. മമ്മൂട്ടിയും ശ്രീനിവാസനും തകര്‍ത്തഭിനയിച്ച കഥപറയുമ്പോള്‍ എന്ന ഫിലിമിലെ ആ ഗാനം മലയാളികള്‍ മറന്നിട്ടില്ല. ആ ഓര്‍മ്മ നിലനിര്‍ത്തിയാണ് കുടുംബശ്രീക്കാര്‍ സലിംകുമാറിന്റെ ശൈലിയില്‍ അതേറ്റെടുത്ത്.

അങ്ങനെ ഉദ്ഘാടന വേദിയില്‍ വൈദ്യുതി മന്ത്രി എം.എം. മണിയെ വ്യത്യസ്തമായി പുകഴ്ത്തി പാടി കൈയ്യടി നേടണമെന്ന കുടുംബശ്രീ പ്രവര്‍ത്തകരുടെ ആഗ്രഹം സഫലമായിരിക്കുകയാണ്. 'വിശ്വസ്തനാമൊരു വൈദ്യുതി മന്ത്രിയെ...സത്യത്തില്‍ നമ്മള്‍ തിരിച്ചറിഞ്ഞല്ലോ...'എന്നായിരുന്നു പാട്ടിന്റെ തുടക്കം. പാട്ടുതുടങ്ങിയപ്പോള്‍ തന്നെ മന്ത്രി തലയാട്ടി താളം പിടിച്ചുതുടങ്ങി. ഒടുവില്‍ ബാര്‍ബറാം ബാലനെ സത്യത്തിലാരും തിരിച്ചറിഞ്ഞില്ലെന്നായി പാട്ടുകാര്‍. ഇതോടെ കേട്ടിരുന്നവര്‍ ഒന്നടങ്കം ചിരിച്ചുപോയി. വണ്ടന്‍മേട് 33 കെവി സബ് സ്‌റ്റേഷന്റെ ഉദ്ഘാടനത്തിനെത്തിയതായിരുന്നു മന്ത്രി.

വേദിയിലെത്തിയ മന്ത്രിയെകുറിച്ച് മനോഹര പാരഡി ഗാനം അവതരിപ്പിക്കാന്‍ ആദ്യമേതന്നെ നാലു കുടുംബശ്രീ പ്രവര്‍ത്തകര്‍ എത്തുകയായിരുന്നു. മന്ത്രി പാട്ട് ആസ്വാദിച്ച് അതിന് പാരമ്യത്തിലെത്തിയപ്പോഴാണ് ഗായകരിലൊരാള്‍ക്ക് അമളി പറ്റിയത്. ഉടനെ കൂടെ പാടാനുണ്ടായിരുന്ന മൂന്നുപേരും മുങ്ങി. എന്നാല്‍ മന്ത്രി അതത്ര കാര്യമായി എടുത്തില്ല. ഒരുവിധം പാട്ടുപാടി തീര്‍ത്ത് വരികള്‍ മാറിപ്പോയതിന് മാപ്പുപറഞ്ഞാണ് കുടുംബസ്ത്രീ പ്രവര്‍ത്തക വേദി വിട്ടത്. തെറ്റ് പറ്റിയവരോട് നല്ലവനായ ആശാന്‍ ക്ഷമിച്ച്, കൈകൊണ്ട് ആംഗ്യഭാഷയില്‍ പൊയ്‌ക്കോളാന്‍ പറഞ്ഞു.

മന്ത്രി മണിക്കുപകരം സദസില്‍ പിണറായി വിജനായിരുന്നെങ്കിലോ എന്ന് പരസ്പരം ചോദിച്ചായിരുന്നു കാണികളുടെ അടുത്ത ചിരിയുടെ തുടക്കം.

അവിടെയാണ് ആശാന്റെ മഹത്വം. എങ്കിലും ഏത് കാര്യവും വെട്ടിത്തുറന്ന് പറയാന്‍ ആശാന് മടിയില്ല. ശബരിമല, അയോദ്ധ്യ വിധികളില്‍ സുപ്രീംകോടതിക്കെതിരെ നടത്തിയ പരാമര്‍ശം ഏറെ വിവാദമായിരുന്നു. ഇരുവിധികളെയും രൂക്ഷമായി വിമര്‍ശിച്ച മന്ത്രി, ജുഡീഷ്യറി എങ്ങോട്ടുപോകുന്നുവെന്ന് ഓര്‍ക്കണമെന്നും പരാമര്‍ശിച്ചു. '' ശബരിമല വിധി വന്നു. സ്ത്രീകള്‍ക്കും പ്രവേശിക്കാമെന്നായിരുന്നു വിധി. പണ്ട് വേണ്ടപ്പെട്ടവരുടെ സ്ത്രീകള്‍ അവിടെ കയറി മെഴുകിയിട്ടുണ്ട്. രാജാവും രാജ്ഞിയുമൊക്കെ, പിന്നീട് പുന:പരിശോധന ഹര്‍ജി വന്നു. വിധി വന്നപ്പോള്‍ മഹാത്തായ വിധിയെന്നു പറഞ്ഞ് പലരും പിന്താങ്ങി. പത്ത് വോട്ടിന് വേണ്ടി സ്വാഗതം ചെയ്യുന്നവരാണ് എല്ലാവരും. പാവം ഞങ്ങള്‍ പെട്ടു. സ്ത്രീകള്‍ക്കും പുരുഷന്‍മാര്‍ക്കും തുല്യത വേണ്ടെന്നു പറഞ്ഞാല്‍ ഞങ്ങളുടെ പാര്‍ട്ടി പിരിച്ചുവിട്ടാല്‍ മതി. നേരത്തെ ജസ്റ്റിസ് പരിപൂര്‍ണന്റെ വിധിയുണ്ടായിരുന്നു. അദ്ദേഹം ശബരിമലയിലെ സ്വാമിയായിരുന്നതു കൊണ്ട് ഭരണഘടനയൊന്നും നോക്കിയില്ല. 10 നും 50 നും ഇടയില്‍ പ്രായമുള്ളവര്‍ ശബരിമലയില്‍ കയറേണ്ടെന്നു പറഞ്ഞു. അന്നത്തെ നായനാര്‍ സര്‍ക്കാര്‍ അപ്പീലിനൊന്നും പോയില്ല. വിധി അംഗീകരിച്ചു. ഇപ്പോഴത്തെ വിധിയില്‍ സുപ്രീംകോടതി ഉറച്ചുനിന്നിട്ടില്ല. ജുഡീഷ്യറി പഴയ നിലയിലായിരുന്നുവെങ്കില്‍ ഇപ്പോള്‍ കൊടുത്ത പെറ്റീഷന്‍ അനുസരിച്ച് പ്രാഥമികമായി സ്‌റ്റേ ചെയ്യാമായിരുന്നു. ഏഴംഗ ബെഞ്ച് ഇനി എന്താണ് ചെയ്യാന്‍ പോകുന്നതെന്നു താന്‍ പറയുന്നില്ലെന്നുമാണ് മന്ത്രി പറഞ്ഞത്.