സംഘര്ഷം തടയാനെത്തിയ വനിതാ ഹെഡ് കോണ്സ്റ്റബിള് കൊല്ലപ്പെട്ടു
തമിഴ്നാട്ടില് രണ്ട് ഓട്ടോ ഡ്രൈവര്മാര് തമ്മിലുണ്ടായ സംഘര്ഷം നിയന്ത്രിക്കാന് ശ്രമിക്കുന്നതിനിടെ വനിതാ ഹെഡ് കോണ്സ്റ്റബിള് കൊല്ലപ്പെട്ടു. പരമക്കുടി സര്ക്കാര് ആശുപത്രിയില് ഡ്യൂട്ടിയിലുണ്ടായിരുന്ന ഹെഡ് കോണ്സ്റ്റബിള് കണ്ണകിയാണ് (35)മരിച്ചത്. രാമനാഥപുരം പാര്ത്ഥിബനൂര് പൊലീസ് സ്റ്റേഷനിലെ ഹെഡ് കോണ്സ്റ്റബിളായിരുന്നു ഇവര്.
ഇന്നലെ രാത്രി പരമക്കുടി സര്ക്കാര് താലൂക്ക് ആശുപത്രിയിലാണ് സംഭവം നടന്നത്. ആശുപത്രി പരിസരത്ത് രണ്ട് ഓട്ടോ ഡ്രൈവര്മാര് തമ്മില് തര്ക്കമുണ്ടാവുകയും പിന്നീട് വഴക്ക് കൈയാങ്കളിയിലേക്ക് നീങ്ങിയതോടെ കണ്ണകി സ്ഥലത്തെത്തി സംഘര്ഷം തടയാന് ശ്രമിക്കുകയായിരുന്നു.
ഇതിനിടെ സംഘത്തിലുണ്ടായിരുന്ന കറുപ്പ് രാജയെന്നയാള് കണ്ണകിയെ ശക്തിയായി തള്ളിയിട്ടു. നിയന്ത്രണം നഷ്ടപ്പെട്ട് നിലത്തുവീണ കണ്ണകിയുടെ തലയ്ക്ക ഗുരുത പരിക്കേറ്റു. ഇവരെ ഉടന് ആശുപത്രിയിലേക്ക് മാറ്റിയെങ്കിലും പിന്നീട് മരണം സംഭവിക്കുകയായിരുന്നു. സംഭവത്തെക്കുറിച്ച് രാമനാഥപുരം ജില്ലാ പൊലീസ് സൂപ്രണ്ട് സന്ദീപ് ആശുപത്രിയിലെത്തി അന്വേഷണം ആരംഭിച്ചു.
ആശുപത്രിയിലെ സിസിടിവി ദൃശ്യങ്ങള് അടക്കം പൊലീസ് പരിശോധിക്കുകയാണ്. അതേസമയം കണ്ണകിയെ തള്ളിയിട്ട കറുപ്പ് രാജയെ പൊലീസ് കസ്റ്റഡിയിലെടുത്തിട്ടുണ്ട്. സംഘര്ഷത്തിലേക്ക് നയിച്ച സാഹചര്യം, സംഭവത്തില് ഉള്പ്പെട്ട മറ്റുള്ളവരുടെ പങ്ക് എന്നിവ പൊലീസ് പരിശോധിച്ചുവരികയാണ്.
https://www.facebook.com/Malayalivartha
