പല വൈകാരികമായിട്ടുള്ള രംഗങ്ങൾക്കും കോടതി മുറികൾ സാക്ഷ്യം വഹിക്കാറുണ്ട് . ഇപ്പോഴിതാ ഒരു കത്താണ് വൈറലാവുന്നത് ."നിന്റെ നഷ്ടപ്പെട്ട ബാല്യം തിരികെനൽകാൻ ഒരിക്കലും ഈ കോടതിക്ക് കഴിയില്ല. പക്ഷേ, നിന്നെ ഉപദ്രവിച്ചയാൾ ഇനിയൊരിക്കലും വെളിച്ചം കാണില്ല." പോക്സോ കേസിൽ പീഡനത്തിനിരയായ പത്തുവയസ്സുകാരിക്ക് അതിജീവനത്തിന്റെ കരുത്തുപകർന്ന് ഡൽഹി രോഹിണിയിലെ പോക്സോ കോടതി അഡീഷണൽ സെഷൻസ് ജഡ്ജി രജനി രങ്ക എഴുതിയ വരികളാണിത്.

പെൺകുട്ടിക്ക് മാനസിക ധൈര്യവും പ്രോത്സാഹനവും നൽകുന്ന ഈ പ്രത്യേക കുറിപ്പ് എത്രയും പെട്ടെന്ന് കൈമാറാൻ ഡൽഹി ഹൈക്കോടതി കർശന നിർദേശം നൽകി.പീഡനക്കേസിൽ വിചാരണക്കോടതിയുടെ ശിക്ഷാവിധിക്കെതിരേ പ്രതി സമർപ്പിച്ച അപ്പീൽ ഹർജി പരിഗണിക്കുന്നതിനിടയാണ് വിധിന്യായത്തോടൊപ്പം ജഡ്ജി രജനി രങ്ക അതിജീവിതയ്ക്കായി തയ്യാറാക്കിയ ഈ കുറിപ്പ് ഹൈക്കോടതിയുടെ ശ്രദ്ധയിൽപ്പെട്ടത്. ഇതോടെയാണ് ഈ സന്ദേശം എത്രയുംവേഗം പെൺകുട്ടിക്ക് എത്തിക്കാൻ കോടതി ഉത്തരവിട്ടത്.

2023-ൽ ഏഴുവയസ്സുള്ളപ്പോഴാണ് പെൺകുട്ടി സുമിത് ശാക്യ എന്ന പ്രതിയുടെ പീഡനത്തിനിരയായത്. കേസിന്റെ വാദം കേട്ട ജഡ്ജി രജനി, പ്രതിക്ക് മരണം വരെ കഠിനതടവും ഒരു ലക്ഷം രൂപ പിഴയും ശിക്ഷ വിധിച്ചിരുന്നു. ഇതിനു പുറമെ 10.50 ലക്ഷം രൂപ നഷ്ടപരിഹാരം നൽകാനും കോടതി ഉത്തരവിട്ടിരുന്നു. വിചാരണ വേളയിൽ 'അങ്കിൾ' എന്ന് വിളിക്കുന്ന പ്രതിയെ അയാൾക്ക് വയസാകുന്നത് വരെ ജയിലിലടയ്ക്കണമെന്ന് പെൺകുട്ടി ജഡ്ജിയോട് ആവശ്യപ്പെട്ടിരുന്നു. ഈ അഭ്യർത്ഥന പൂർണ്ണമായി മാനിച്ചാണ് ജഡ്ജി വിധിന്യായത്തോടൊപ്പം ഈ കുറിപ്പും രേഖപ്പെടുത്തിയത്.

''പ്രിയപ്പെട്ട മോളെ, നിന്നെ കോടതി കേട്ടു. നീ അങ്കിൾ എന്ന് വിളിക്കുന്നയാളെ അയാൾക്ക് വയസ്സാകുന്നത് വരെ ജയിലിലിടാനാണ് നീ കോടതിയോട് പറഞ്ഞത്. കോടതി നിന്റെ ആവശ്യം അംഗീകരിച്ച് അതിനുള്ള മറുപടി നൽകിയിരിക്കുകയാണ്. നീ അങ്കിൾ എന്ന് വിളിക്കുന്നയാളെ ജീവിതകാലം മുഴുവൻ തടങ്കലിലടയ്ക്കാൻ കോടതി ഇന്ന് ഉത്തരവിട്ടിരിക്കുകയാണ്. അയാൾക്ക് ഇനി സ്വതന്ത്രമായി വിഹരിക്കാനാകില്ല. ഇനിയുള്ള കാലം അയാൾ തടവിലായിരിക്കും. ആ കൂട്ടിൽ കിടന്ന് അയാൾ വയസ്സാകും.

ആ കൂട്ടിൽകിടന്ന് തന്നെ അയാൾ മരിക്കും. അയാൾക്ക് ഇനി നിന്നെയോ നിന്റെ സഹോദരിയെയോ മറ്റുകുട്ടികളെയോ ഉപദ്രവിക്കാൻ കഴിയില്ല. ഈ കോടതി കണ്ടതിൽ ഏറ്റവും ധൈര്യശാലിയായ പെൺകുട്ടിയാണ് നീ. നീ കോടതിയിൽ വന്ന് നിന്നെ ഉപദ്രവിച്ചയാളെ ചൂണ്ടിക്കാണിച്ച് നൽകി. നീ സത്യം പറഞ്ഞു. അങ്കിൾ എന്ന് വിളിക്കുന്നയാൾ നിന്നോട് ചെയ്തത് വളരെ മോശമായ കാര്യമാണ്.പക്ഷേ, നീ മൗനം പാലിച്ചില്ല. നീ നിന്റെ അമ്മയോട് പറഞ്ഞു. നീ അത് തുറന്നുപറയാനുള്ള ധൈര്യം കാണിച്ചു. അതുകൊണ്ട് അയാൾക്ക് ഇനി ഒരു കുട്ടിയെയും ഉപദ്രവിക്കാനാകില്ല. നിന്റെ നഷ്ടപ്പെട്ട ബാല്യം തിരികെനൽകാൻ ഒരിക്കലും ഈ കോടതിക്ക് കഴിയില്ല.

പക്ഷേ, നിന്റെ വാക്കുകൾ കേട്ടുവെന്ന് കോടതിക്ക് ഉറപ്പുനൽകാനാകും. നിന്റെ ആവശ്യം കോടതി കേട്ടു. നിന്നെ ഉപദ്രവിച്ചയാൾ ഇനിയൊരിക്കലും വെളിച്ചം കാണില്ല. അയാൾക്ക് ഇനിയൊരിക്കലും സ്വതന്ത്രമായി വിഹരിക്കാനാകില്ല. മോളെ, ഇനി നീ നിന്റെ ജീവിതം സന്തോഷത്തോടെ മുന്നോട്ട് കൊണ്ടുപോകുക. സ്കൂളിൽ പോകണം. അവിടെ കൂട്ടുകാരെയുണ്ടാക്കണം. ചിരിക്കണം. കളിക്കണം. സ്വപ്നം കാണണം. നിന്റെ ധൈര്യം ഈ കോടതി എന്നും ഓർമിക്കും''—ഇതായിരുന്നു ജഡ്ജിയുടെ ഹൃദ്യമായ കുറിപ്പ്.