തിരുവനന്തപുരത്ത് കോൺഗ്രസ് ഓഫീസുകൾക്ക് നേരെ ആക്രമണം. തിരുവനന്തപുരം ഡ‍ിസിസി ഓഫീസിന് നേരെ ഉണ്ടായ കല്ലേറിൽ ചില്ലുകൾ തകർന്നു. നെയ്യാറ്റിൻകരയ്ക്ക് സമീപം പാലിയോട് കോൺഗ്രസ് ആനാവൂർ മണ്ഡലം കമ്മിറ്റി ഓഫീസിന് തീയിട്ടു. രാത്രി 11 മണിയോടെയായിരുന്നു സംഭവം. പാർട്ടി ഓഫീസിന്റെ പിൻഭാഗത്തുകൂടി എത്തിയ അക്രമികൾ ഓടുമേഞ്ഞ പഴയ കെട്ടിടത്തിലേക്കും പുറത്തു സ്ഥാപിച്ചിരുന്ന ഫ്ലക്സ് ബോർഡുകളിലേക്കും കയ്യിൽ കരുതിയ ദ്രാവകം ഒഴിച്ച് തീ കൊളുത്തുന്ന ദൃശ്യങ്ങൾ ക്യാമറയിൽ പതിഞ്ഞു.

ആക്രമണം നടന്ന ഡിസിസി ഓഫീസിൽ ആഭ്യന്തരമന്ത്രി രമേശ് ചെന്നിത്തല സന്ദർശനം നടത്തി. അക്രമികൾ ആരാണെങ്കിലും ശക്തമായ നടപടിയുണ്ടാകുമെന്ന് ചെന്നിത്തല പറഞ്ഞു.ഓഫീസിന് നേരെ നടന്ന അക്രമത്തിന് പിന്നിൽ ബിജെപി പ്രവർത്തകരാണെന്ന് കോൺഗ്രസ് ആരോപിച്ചു.കേന്ദ്ര ആഭ്യന്തരമന്ത്രി അമിത് ഷായ്ക്ക് നേരെ കോൺഗ്രസ് പ്രവർത്തകർ കരിങ്കൊടി കാണിച്ചതിനെ തുടർന്ന് ഇരുപാർട്ടികളും തമ്മിൽ പ്രദേശത്ത് വലിയ രീതിയിലുള്ള രാഷ്ട്രീയ തർക്കങ്ങളും പ്രതിഷേധങ്ങളും നിലനിന്നിരുന്നു.

ഇതിന്റെ തുടർച്ചയായി ബിജെപിയും യുവമോർച്ച പ്രവർത്തകരും ആസൂത്രിതമായി നടത്തിയ ആക്രമണമാണ് ഇതെന്നാണ് കോൺഗ്രസ് നേതാക്കളുടെ ആരോപണം. സംഭവത്തിൽ പോലീസിൽ പരാതി നൽകിയിട്ടുണ്ട്.ഡിസിസി ഓഫീസ് ആക്രമിച്ച സംഭവത്തിൽ ശക്തമായ പ്രതിഷേധ പരിപാടികളുമായി മുന്നോട്ട് പോകാനാണ് കോൺഗ്രസ് നേതൃത്വത്തിന്റെ തീരുമാനം. രാഷ്ട്രീയ അക്രമത്തിനെതിരെ ജില്ലയിലുടനീളം പ്രതിഷേധം സംഘടിപ്പിക്കും.

അക്രമ വിവരമറിഞ്ഞ് മുതിർന്ന കോൺഗ്രസ് നേതാക്കളും മന്ത്രിമാരടക്കമുള്ള ജനപ്രതിനിധികളും സംഭവസ്ഥലത്തേക്ക് തിരിച്ചു. പോലീസ് സംഘവും സ്ഥലത്തെത്തി പരിശോധന നടത്തുകയും അന്വേഷണം ആരംഭിക്കുകയും ചെയ്തിട്ടുണ്ട്.അതേസമയം, കേന്ദ്ര ആഭ്യന്തര മന്ത്രി അമിത് ഷായ്ക്ക് നേരെ യൂത്ത് കോൺഗ്രസ് പ്രവർത്തകർ കരിങ്കൊടി കാണിച്ച സംഭവത്തിൽ സുരക്ഷാവീഴ്ചയില്ലെന്ന് പൊലീസ്. ഒരു സെക്കൻഡ് പോലും അമിത് ഷായുടെ വാഹനവ്യൂഹം തടസ്സപ്പെട്ടില്ലെന്നും ജാമർ വാഹനം വരുന്നതിന് മുൻപാണ് പ്രതിഷേധക്കാർ എത്തിയതെന്നും പൊലീസ് പറഞ്ഞു.