ശബരിമലയില്‍ യുവതികളെ കയറ്റാനായി ദേവസ്വം ബോര്‍ഡും സര്‍ക്കാരും കൂട്ട് നിന്നതോടെ ഭക്തര്‍ എതിരാകുന്ന കാഴ്ചയാണ് കഴിഞ്ഞ വര്‍ഷം കണ്ടത്. ഇതോടെ വരുമാനം കുത്തനെ ഇടിഞ്ഞു. കാണിക്കയിടരുതെന്ന ഭക്തരുടെ പ്രഖ്യാപനം എല്ലാവരും ഏറ്റെടുക്കുക കൂടി ചെയ്തതോടെ ശബരിമലയിലെ വരുമാനം ഒന്നിനും തികയാതെയായി. ശബരിമല വരുമാനം കൊണ്ടുമാത്രം നിലനില്‍ക്കുന്ന ക്ഷേത്രങ്ങളുടെ ചെലവും ജീവനക്കാരുടെ ശമ്പളവും ദേവസ്വം ബോര്‍ഡിനേയും സര്‍ക്കാരിനേയും കുലുക്കി. എന്നാല്‍ ഇത്തവണത്തെ സമാധാനമായ അന്തരീക്ഷം കാരണം ശബരിമലയില്‍ ഭക്തര്‍ ഒഴുകി. ഫലമോ വരുമാനം വലുതായി വര്‍ധിച്ചു.

ഈ വര്‍ഷത്തെ ശബരിമല മണ്ഡല, മകരവിളക്കുത്സവ കാലത്തെ ആകെ നടവരവ് 234 കോടി രൂപ. മണ്ഡലകാലത്ത് 163.67 കോടിയും മകരവിളക്കുകാലത്ത് 69.74 കോടിയുമാണ് നടവരവ് ലഭിച്ചതെന്ന് മന്ത്രി കടകംപള്ളി സുരേന്ദ്രനും ദേവസ്വം ബോര്‍ഡ് പ്രസിഡന്റ് എന്‍. വാസുവും പത്രസമ്മേളനത്തില്‍ അറിയിച്ചു.

ജനുവരി 14 വരെയുള്ള കണക്കാണിത്. നടയടയ്ക്കാന്‍ അഞ്ചുദിവസംകൂടിയുണ്ടെന്നിരിക്കെ 20 കോടി രൂപകൂടി അധികമായി കണക്കാക്കാമെന്ന് പ്രസിഡന്റ് പറഞ്ഞു.

58 കോടി രൂപയുടെ വികസനപ്രവര്‍ത്തനങ്ങള്‍ക്ക് ഉടന്‍ ടെന്‍ഡര്‍ വിളിക്കുമെന്ന് മന്ത്രി കടകംപള്ളി സുരേന്ദ്രന്‍ പറഞ്ഞു. വനംവകുപ്പിന്റെ തടസ്സമില്ലാത്ത പദ്ധതികള്‍ ഉടന്‍ തുടങ്ങുമെന്നും റോപ് വേ പദ്ധതിക്കായി കുടുതല്‍ മരം മുറിക്കേണ്ടി വരില്ല എന്നും അദ്ദേഹം പറഞ്ഞു. കേന്ദ്ര വനംമന്ത്രാലയത്തിന്റെ അനുമതിക്കായി ശ്രമംതുടരുകയാണെന്നും മന്ത്രി കൂട്ടിചേര്‍ത്തു.

വളരെ ഭക്തിനിര്‍ഭരമായ അന്തരീക്ഷത്തില്‍ ഭക്തര്‍ മകരജ്യോതി കണ്ട് സായൂജ്യമടഞ്ഞു. ശരണം വിളികള്‍ നിറഞ്ഞ ഭക്തിനിര്‍ഭരമായ അന്തരീക്ഷത്തിലാണ് മകരജ്യോതി തെളിഞ്ഞത്. ശരണം വിളികളുമായി കാത്തിരുന്ന ഭക്തലക്ഷങ്ങള്‍ക്ക് സായൂജ്യമായി മകരജ്യോതി. പന്തളത്ത് നിന്ന് ആഘോഷമായി കൊണ്ടുവന്ന തിരുവാഭരണ പേടകം വൈകിട്ട് 6.38ഓടെ സന്നിധാനത്ത് എത്തി.

വൈകിട്ട് ശരം കുത്തിയിലെത്തിയ തിരുവാഭരണ ഘോഷയാത്ര ശബരിമല ദേവസ്വം എക്‌സിക്യൂട്ടീവ് ഓഫീസര്‍ വി.എസ്.രാജേന്ദ്ര പ്രസാദിന്റെ നേതൃത്വത്തില്‍ സ്വീകരിച്ച് സന്നിധാനത്തേക്ക് ആനയിച്ചു. പതിനെട്ടാം പടിക്കു മുകളില്‍ കൊടിമരച്ചുവട്ടില്‍ ദേവസ്വം മന്ത്രി കടകംപള്ളി സുരേന്ദ്രന്‍, പ്രസിഡന്റ് എന്‍. വാസു, അംഗങ്ങളായ വിജയകുമാര്‍, കെ.എസ്. രവി, സ്‌പെഷല്‍ കമ്മിഷണര്‍ മനോജ് എന്നിവര്‍ ചേര്‍ന്ന് സ്വീകരിച്ച് സോപാനത്തേക്കാനയിച്ചു. തന്ത്രി കണ്ഠര് മഹേഷ് മോഹനരും മേല്‍ശാന്തി സുധീര്‍ നമ്പൂതിരിയും ചേര്‍ന്ന് പേടകം ഏറ്റുവാങ്ങി തിരുവാഭരണം ചാര്‍ത്തി അയ്യപ്പന് ദീപാരാധന നടത്തി.

ദീപാരാധനയ്ക്ക് ശേഷമാണ് ഭക്തലക്ഷങ്ങള്‍ക്ക് സായൂജ്യമായി പൊന്നമ്പലമേട്ടില്‍ മകരവിളക്ക് തെളിഞ്ഞത്. ആകാശത്ത് മകരജ്യോതി തെളിഞ്ഞതിന് പിന്നാലെ കൃഷ്ണപരുന്ത് വട്ടമിട്ട് പറന്നു. ലക്ഷക്കണക്കിന് ഭക്തജനങ്ങളാണ് ഇത്തവണയും മകര വിളക്ക് ദര്‍ശിക്കുന്നതിന് എത്തിയത്.

കവടിയാര്‍ കൊട്ടാരത്തില്‍ നിന്ന് ദൂതന്‍ വഴി എത്തിച്ച അയ്യപ്പമുദ്രയിലെ നെയ്യാണ് വിഗ്രഹത്തില്‍ അഭിഷേകം ചെയ്യുന്നത്. ഇതിനായി തിരുവാഭരണം അഴിച്ചുമാറ്റി വീണ്ടും ചാര്‍ത്തിയാണ് പൂജ നടത്തുക. ഭക്തജനത്തിരക്ക് പരിഗണിച്ച് സന്നിധാനത്തും പുല്ലുമേട് അടക്കമുള്ളയിടങ്ങളിലും വന്‍ പോലീസ് സന്നാഹത്തെ വിന്യസിച്ചിരുന്നു.