അനധികൃതമായി സർവീസിൽ നിന്ന് വിട്ടു നിൽക്കുന്ന ജീവനക്കാരെ പിരിച്ചു വിടാൻ ആരോഗ്യവകുപ്പ് തീരുമാനമെടുത്ത വാർത്തകൾ കഴിഞ്ഞ ദിവസമാണ് നമ്മൾ ചർച്ച ചെയ്തത്. സർക്കാർ എടുത്ത നിർണായക തീരുമാനങ്ങളിൽ ഒന്നായിരുന്നു അത്. ഇപ്പോഴിതാ മറ്റൊരു പ്രധാന തീരുമാനവുമായി സർക്കുലർ ഇറക്കിയിരിക്കുന്നു കേരള സർക്കാർ. 

സർക്കാർ ഉദ്യോഗസ്ഥരുടെ കൂട്ട അ വധിയെടുക്കുന്നത് ചട്ടലംഘനമാണെന്നാണ് സർക്കാർ നിലപാട്.. അടുത്ത മാസം നടക്കാനിരിക്കുന്ന കേരള അഡ്മിനിസ്ട്രേറ്റീവ് പരീക്ഷയ്ക്കായി തയ്യാറെടുക്കാൻ സെക്രട്ടേറിയേറ്റിലെതുൾപ്പെടെയുള്ള സര്‍ക്കാര്‍ ഉദ്യോഗസ്ഥര്‍ കൂട്ടത്തോടെ അവധിയെടുക്കുന്നതിന് എതിരെ യാണ് സർക്കാർ സർക്കുലർ പുറപ്പെടുവിച്ചത്.. കൂട്ടഅവധിയെടുക്കുന്നത് അംഗീകരിക്കാനാവില്ലെന്നാണ് പൊതുഭരണവകുപ്പ് സെക്രട്ടറി കെആര്‍ ജ്യോതിലാല്‍ പുറപ്പെടുവിട്ട സര്‍ക്കുലര്‍ വ്യക്തമാക്കുന്നത്.

ബജറ്റിനായി നിയമസഭ കൂടുന്ന സമയമാണ്. ഈ സാഹചര്യത്തിൽ ഇത്രയധികം പേർ ഒന്നിച്ച് അവധിയിൽ പ്രവേശിക്കുന്നത് സെക്രട്ടറിയേറ്റ് പ്രവർത്തനത്തെ ബാധിക്കുമെന്നും സർക്കുലർ‌ വ്യക്തമാക്കുന്നു. സംസ്ഥാന ഭരണസിരാകേന്ദ്രമായ സെക്രട്ടേറിയറ്റില്‍ മാത്രം അന്‍പത് പേരാണ് കെഎഎസ് പരീക്ഷ എഴുതാനായി ഇതുവരെ അവധി നല്‍കിയിരിക്കുന്നത്. ഈ കണക്കുകൾ ഉൾപ്പെടെയാണ് മുഖ്യമന്ത്രിക്ക് നല്‍കിയ സര്‍ക്കുലറില്‍ പൊതുഭരണസെക്രട്ടറി ചൂണ്ടിക്കാട്ടുന്നത്.

സര്‍ക്കാര്‍ ജോലിയില്‍ ഇരുന്നു കൊണ്ട് മറ്റൊരു ഉയർന്ന ജോലിക്ക് വേണ്ടി അവധിഎടുത്ത് പഠിച്ച് പരീക്ഷ എഴുതുന്നത് തന്നെ ചട്ടവിരുദ്ധമാണ്. പരീക്ഷ എഴുതാൻ താൽപര്യമുള്ളവർക്ക് ജോലി ഉപേക്ഷിച്ച് പഠിക്കാം. അല്ലാതെ സർവീസിൽ നിന്ന് വിട്ട് നിൽക്കുന്നവർ ചെയ്യുന്നത് ജനങ്ങളെ ബുദ്ധിമുട്ടിച്ച് സ്വന്തം കാര്യം നോക്കുകയാണെന്നും സര്‍ക്കുലർ കുറ്റപ്പെടുത്തുന്നു.

ഫെബ്രുവരിയില്‍ നടക്കാനിരിക്കുന്ന കേരള അഡ്മിനിസ്‌ട്രേറ്റീവ് സര്‍വ്വീസ് പരീക്ഷയുമായി ബന്ധപ്പെട്ട് 50 ഓളം സെക്രട്ടറിയേറ്റ് ജീവനക്കാര്‍ അവധിയെടുക്കുക എന്നത് ചെറിയ കാര്യമല്ല . ഉദ്യോഗസ്ഥരുടെ കൂട്ട അവധി സെക്രട്ടറിയേറ്റ് പ്രവര്‍ത്തനത്തെ സാരമായി ബാധിച്ചിരിക്കുകയാണെന്നും ജീവനക്കാര്‍ അവധി റദ്ദാക്കി ജോലിയില്‍ തിരികെ പ്രവേശിക്കണമെന്നും ആവശ്യപ്പെടുന്നതാണ് സംസ്ഥാന സര്‍ക്കാര്‍ പുറത്തിറക്കിയ സര്‍ക്കുലര്‍.