കേന്ദ്ര നേതൃത്വം ഇടപെട്ടു, കെഇ ഇസ്മായില് പിന്മാറി, കാനം രാജേന്ദ്രന് സിപിഐ സംസ്ഥാന സെക്രട്ടറി
സി.പി.ഐ സംസ്ഥാന സെക്രട്ടറിയായി എ.ഐ.ടി.യു.സി സംസ്ഥാന സെക്രട്ടറി കാനം രാജേന്ദ്രനെ തിരഞ്ഞെടുത്തു. മത്സരത്തിന്റെ വക്കിലെത്തിയ സംഭവ വികാസങ്ങള്ക്ക് ഒടുവില് കേന്ദ്ര നേതൃത്വത്തിന്റെ ശക്തമായ ഇടപെടലിനെ തുടര്ന്ന് പരിസമാപ്തി. അവസാന നിമിഷം കെ.ഇ.ഇസ്മയില് പിന്മാറിയതോടെയാണ് കാനം തിരഞ്ഞെടുക്കപ്പെട്ടത്. സംസ്ഥാന സമ്മേളനത്തില് നേരത്തെ തന്നെ കാനവും ഇസ്മായിലും തമ്മില് സെക്രട്ടറി സ്ഥാനത്തെ ചൊല്ലി ഭിന്നത നിലനിന്നിരുന്നു. ഇത് സമ്മേളനത്തിലും പ്രതിഫലിച്ചു.
സമ്മേളനത്തില് ഇപ്പോഴത്തെ നേതൃത്വത്തിനെതിരെ ഗുരുതരമായ ആരോപണങ്ങളാണ് സമ്മേളന പ്രതിനിധികള് ഉന്നയിച്ചത്. പാര്ട്ടി നേതൃത്വത്തെ ഞെട്ടിച്ച് പ്രധിനിധികള് തമ്മില് പരസ്പരം കൊമ്പ് കോര്ക്കുന്ന സ്ഥിതിവരെയുണ്ടായി. പരസ്പരം \'വാടാ, പോടാ\' വിളി വരെയായി. അച്ചടക്കം പാലിക്കാത്തവര് സമ്മേളന ഹാള് വിട്ട് പുറത്ത് പോകണമെന്ന് സംസ്ഥാന സെക്രട്ടറി പന്ന്യന് രവീന്ദ്രന് കര്ക്കശ സ്വരത്തില് പറഞ്ഞിട്ടും ബഹളം തുടര്ന്നതോടെ ചര്ച്ച മുറിഞ്ഞു. ഒടുവില് മുല്ലക്കര രത്നാകരന്, പി.എസ്. സുപാല് തുടങ്ങിയവരും ഇടപെട്ട് ഇരുപക്ഷത്തെയും ശാന്തരാക്കിയ ശേഷമാണ് ചര്ച്ച തുടര്ന്നത്.
പുതിയ സംസ്ഥാന കമ്മിറ്റിയെ തെരഞ്ഞെടുക്കുന്നതിനെ ചൊല്ലിയായി അടുത്ത ബഹളം . നിലവിലുണ്ടായിരുന്ന ഒന്പത് ഒഴിവുകളെ കൂടാതെ ഒഴിയുന്ന 20ശതമാനം അംഗങ്ങളുടെ ഒഴിവിലേക്ക് പുതിയ അംഗങ്ങളെ തെരഞ്ഞെടുക്കേണ്ടി വന്നു. ഇതിലും ഇരുപക്ഷവും ചേരിപിടിച്ചു. തുടര്ന്നാണ് കേന്ദ്ര നേതാക്കള് വിഷയത്തില് ഇടപെട്ടത്. സെക്രട്ടറി സ്ഥാനത്തേക്ക് മത്സരം ഉണ്ടാകുമെന്ന് പ്രതീക്ഷിച്ചിരുന്നെങ്കിലും കെഇ ഇസ്മായിലുമായി കേന്ദ്ര നേതാക്കള് നടത്തിയ ചര്ച്ചയെ തുടര്ന്ന് അദ്ദേഹം അവസാനം പിന്മാറുകയായിരുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
