ആശിർവ്വാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ച് ജൂഡ് ആന്റണി സംവിധാനം ചെയ്യുന്ന പുതിയ ചിത്രമായ 'തുടക്കം' ഔദ്യോഗിക ട്രെയ്‌ലർ പുറത്തിറങ്ങി. ഹൃദ്യമായ കുടുംബമുഹൂർത്തങ്ങളും ത്രില്ലിംഗ് രംഗങ്ങളും ഇഴുകിച്ചേർന്നതാണ് ചിത്രത്തിന്റെ ട്രെയ്‌ലർ. ആഗസ്റ്റ് 7-ന് ചിത്രം തിയറ്ററുകളിലെത്താനിരിക്കെയാണ് അണിയറപ്രവർത്തകർ ട്രെയ്‌ലർ പുറത്തുവിട്ടിരിക്കുന്നത്.

ആഗസ്റ്റ് 3-ാം തീയതി ചൊവ്വാഴ്ച കൊച്ചി ക്രൗൺ പ്ലാസാ ഹോട്ടലിൽ വെച്ചായിരുന്നു ട്രെയ്‌ലർ പ്രകാശനം. ചിത്രത്തിലെ അഭിനേതാക്കളും അണിയറപ്രവർത്തകരും പ്രമുഖ ചലച്ചിത്ര പ്രവർത്തകരും പങ്കെടുത്ത ചടങ്ങിലൂടെയാണ് ട്രെയ്‌ലർ പുറത്തുവിട്ടത്. ഒരു മലയോരഗ്രാമത്തിന്റെ പശ്ചാത്തലത്തിൽ ഒരുങ്ങുന്ന തികഞ്ഞൊരു ഫാമിലി-ത്രില്ലർ ചിത്രമാണ് 'തുടക്കം' എന്നാണ് ട്രെയ്‌ലർ നൽകുന്ന സൂചന.

വിസ്മയാ മോഹൻലാൽ അഭിനയരംഗത്തേക്ക് കടന്നുവരുന്നു എന്ന പ്രത്യേകതയും ചിത്രത്തിനുണ്ട്. പ്രേക്ഷകരുടെ വലിയ പ്രതീക്ഷയ്ക്ക് ഒട്ടും കോട്ടം തട്ടാത്ത രീതിയിലാണ് ട്രെയ്‌ലറിലെ രംഗങ്ങൾ ഒരുക്കിയിരിക്കുന്നത്. വിസ്മയാ മോഹൻലാലിന് പുറമെ ആശിഷ് ജോ ആന്റണിയും ചിത്രത്തിൽ പ്രധാന കഥാപാത്രത്തെ അവതരിപ്പിക്കുന്നുണ്ട്. കൂടാതെ, നടൻ മോഹൻലാലും ചിത്രത്തിൽ ഒരു നിർണ്ണായക വേഷത്തിലെത്തുന്നുണ്ട്.

ദിനേശ് പ്രഭാകർ, ജാഫർ ഇടുക്കി, കോട്ടയം രമേഷ്, ജിബിൻ ഗോപിനാഥ്, ശിവദാസ് കണ്ണൂർ, ജയ്സ് ജോസ്, ജയാക്കുറുപ്പ്, അശ്വിനി വിജയൻ തുടങ്ങിയവരും ചിത്രത്തിൽ പ്രധാന വേഷങ്ങളിലുണ്ട്. ലിനീഷ് നെല്ലിക്കൽ, അഖിൽ കൃഷ്ണ, ജൂഡ് ആന്റണി ജോസഫ് എന്നിവരാണ് ചിത്രത്തിന്റെ തിരക്കഥ രചിച്ചിരിക്കുന്നത്.