അട്ടപ്പാടി പുതൂര്‍ പഞ്ചായത്തിലെ ഇടവാണിയില്‍ പോലീസ് നടത്തിയ പരിശോധനയില്‍ അഞ്ചുമാസം പ്രായമായ 1400ഓളം കഞ്ചാവുചെടികള്‍ കണ്ടെത്തി നശിപ്പിച്ചു. അഗളി സബ് ഡിവിഷനിലെ ഡാന്‍സാഫ്, എ.എന്‍.എഫ്., എസ്.ഒ.ജി. ടീമംഗങ്ങള്‍ സംയുക്തമായാണ് പരിശോധന നടത്തിയത്.

ഇടവാണിമലയുടെ കിഴക്കേ അടിവാരത്ത് 260 തടങ്ങളിലായി കഞ്ചാവുചെടികള്‍ കണ്ടെത്തിയത്. കേരളസര്‍ക്കാരിന്റെ ഓപ്പറേഷന്‍ തൂഫാന്റെ ഭാഗമായി ജില്ലാ പോലീസ് മേധാവി അബ്ദുല്‍ റാഷിക്ക് ലഭിച്ച രഹസ്യവിവരത്തിന്റെ അടിസ്ഥാനത്തിലാണ് നടപടി.

പുതൂര്‍ പോലീസ് സ്‌റ്റേഷന്‍ എസ്.എച്ച്.ഒ. സുനില്‍, ഡാന്‍സാഫ് എസ്.ഐ. എം. സുഭാഷ്, എസ്.ഐ. സുബിന്‍ എന്നിവരുള്‍പ്പെടുന്ന സംഘത്തിന്റെ നേതൃത്വത്തിലായിരുന്നു പരിശോധന.