ആഴ്ചകളോളം കണ്ണമംഗലം നിവാസികളെ വിറപ്പിച്ച പരുന്തിനെ വനംവകുപ്പിന്റെ റാന്നിയില്‍ നിന്നുള്ള റാപ്പിഡ് റെസ്‌പോണ്‍സ് ടീം അധികൃതരെത്തി ഏറ്റെടുത്തു. ചൊവ്വാഴ്ച സന്ധ്യയോടെയാണ് വലയില്‍ വീഴ്ത്തി പരുന്തിനെ പിടികൂടിയത്. കൂട്ടിലാക്കിയ പരുന്തിനെ ഗ്രാമപഞ്ചായത്തംഗം രമാദേവിയുടെ വീട്ടിലാണ് സൂക്ഷിച്ചിരുന്നത്.

ബുധനാഴ്ച രാവിലെ വനംവകുപ്പ് ഡെപ്യൂട്ടി റെയിഞ്ചര്‍ ടി.ലിതേഷ്, ബീറ്റ് ഫോറസ്റ്റ് ഓഫീസര്‍മാരായ എം.അജയകുമാര്‍, കെ.ആര്‍. ദിലീപ്, എഫ്. യേശുദാസന്‍, എം.എസ്. ഫിറോസ്ഖാന്‍ എന്നിവരെത്തിയാണ് പരുന്തിനെ കൊണ്ടുപോയത്. മാവേലിക്കര തഹസില്‍ദാര്‍ എസ്. സന്തോഷ്‌കുമാര്‍, ഡെപ്യൂട്ടി തഹസില്‍ദാര്‍ ജി.ബിനു, ബ്ലോക്ക് പഞ്ചായത്തംഗം ശോഭാരാജന്‍ എന്നിവരും എത്തിയിരുന്നു. പരുന്തിനെ വൈകുന്നേരത്തോടെ പ്ലാപ്പള്ളി വനത്തില്‍ വിടുമെന്ന് അധികൃതര്‍ അറിയിച്ചു. മൂന്ന് വയസ് പ്രായമുള്ള കൃഷ്ണപ്പരുന്താണ് കണ്ണമംഗലത്ത് കണ്ടതെന്ന് ഇവര്‍ പറഞ്ഞു.

ഗ്രാമത്തിന് ഭീഷണിയായ പരുന്തിനെ കുടുക്കാന്‍ നാട്ടുകാര്‍ പോലീസിനെയും റവന്യു അധികൃതരെയും സമീപിച്ചെങ്കിലും ഫലമുണ്ടായില്ല. വനംവകുപ്പുദ്യോഗസ്ഥരുമായി ബന്ധപ്പെട്ടെങ്കിലും പറന്നുനടക്കുന്ന പരുന്തിനെ പിടിക്കാന്‍ വകുപ്പില്ലെന്നായിരുന്നു മറുപടി. ഇതേതുടര്‍ന്ന് പ്രദേശവാസികളായ മണിക്കുട്ടന്‍ സജി, മനോജ്, ഉണ്ണിക്കൃഷ്ണന്‍ എന്നിവരാണ് മുന്നിട്ടിറങ്ങിയത്.

കണ്ണമംഗലം പ്രദേശത്തെ ഇരുപതോളം പേര്‍ക്കാണ് കഴിഞ്ഞ രണ്ട് മാസത്തിനിടെ പരുന്തിന്റെ കൊത്തേറ്റത്. കണ്ണില്‍ കൊത്താനെത്തിയ പരുന്തില്‍ നിന്ന് പലരും തലനാരിഴയ്ക്കാണ് രക്ഷപെട്ടത്. കണ്ണില്‍ കൊത്തുന്നത് തടയാന്‍ ശ്രമിക്കവേ കൈയ്യില്‍ കൊത്ത് കിട്ടിയവരായിരുന്നു ഏറെപ്പേരും. മിക്കവരും ആശുപത്രിയില്‍ ചികില്‍സ തേടിയിരുന്നു.

രണ്ടുദിവസത്തെ പരിശ്രമത്തിനൊടുവിലാണ് ചൊവ്വാഴ്ച സന്ധ്യയോടെ പരുന്തിനെ കൂട്ടിലാക്കാനായത്. ആക്രമണകാരിയായ പരുന്തിനെ കുടുക്കാന്‍ തിങ്കളാഴ്ച കെണിയും വെച്ച് കാത്തിരുന്നെങ്കിലും മറ്റൊരു പരുന്താണ് കെണിയിലായത്.

ചൊവ്വാഴ്ച പകല്‍ മുഴുവന്‍ ഇരയുമായി പരുന്തിനെത്തേടി നടന്നെങ്കിലും കണ്ടെത്താനായില്ല. സന്ധ്യയോടെ മാളിയേക്കല്‍ വീടിന് സമീപമുള്ള മരത്തില്‍ പരുന്തിനെ കണ്ടു. മീന്‍ വെച്ചുകൊടുത്തപ്പോള്‍ പരുന്ത് താഴെയെത്തി. ഒരാള്‍ കാലില്‍ പിടിച്ചപ്പോള്‍ കൈയ്യില്‍ കൊത്തി. തുടര്‍ന്ന് മറ്റുള്ളവര്‍ക്കും കൈയ്യില്‍ കൊത്തേറ്റു. കുതറിയ പരുന്തുമായി എല്ലാവരും താഴെവീണെങ്കിലും പിടി വിട്ടില്ല. ഉണ്ണിക്കൃഷ്ണന്‍ ഉടുത്തിരുന്ന കൈലി ഉരിഞ്ഞ് പരുന്തിനെ മൂടിയാണ് അവസാനം പിടികൂടിയത്.

നാളുകളോളം തങ്ങളെ മുള്‍മുനയില്‍ നിറുത്തിയ പരുന്തിനെ വനംവകുപ്പുകാര്‍ കൂട്ടിലാക്കി കൊണ്ടുപോകുന്നത് കാണാന്‍ നിരവധിയാള്‍ക്കാര്‍ എത്തിയിരുന്നു.