കോട്ടയം കല്ലറ പെരുംതുരുത്ത് നിഷാ സദനം രാം ദാസിന്റെയും ( 80), ഭാര്യ ഭവാനിയുടെയും (73) വാക്കുകളില്‍ ഇപ്പോഴും ഭയത്തിന്റെ നിഴല്‍ കാണാം. ഇക്കഴിഞ്ഞ തിങ്കളാഴ്ച പുലര്‍ച്ചെ 1.30-ന് അവര്‍ നേരിട്ടത് രക്തം മരവിപ്പിച്ചു പോകുന്ന അനുഭവമായിരുന്നു.

വെളുപ്പിന് 1.30-ഓടെ വണ്ടി കേടായതിനാല്‍ ടോര്‍ച്ച് ആവശ്യപ്പെട്ട് 2 യുവാക്കള്‍ കതകില്‍ തട്ടി. ജനലിലൂടെ ടോര്‍ച്ച് നല്‍കി. കത്തിയും കയറും വേണമെന്ന് ആവശ്യപ്പെട്ട് വീണ്ടുമെത്തി. ഇതും നല്‍കി. പിന്നീട് ഇവര്‍ കത്തിയും കയറും തിരിച്ചുതരാനെന്ന പേരില്‍ കതകില്‍ തട്ടി. ലൈറ്റ് തെളിച്ചു കതകു തുറന്നു.

പെട്ടെന്നാണ് അവരുടെ ഭാവം മാറിയത്. കഴുത്തില്‍ കത്തി വച്ച് മിണ്ടരുതെന്നും കൊന്നു കളയുമെന്നും പറഞ്ഞ് മുറിക്കുള്ളിലേക്കു തള്ളി. മറ്റൊരാള്‍ ഭവാനിയുടെ കഴുത്തില്‍ കത്തി വച്ച് മാല പൊട്ടിച്ചെടുത്തു. നിലവിളിച്ചതോടെ അക്രമികള്‍ ഇറങ്ങി ഓടിയെന്നും രണ്ടര പവന്‍ മാലയുടെ പകുതി മുറിക്കുള്ളില്‍ നിന്നു ലഭിച്ചെന്നും ദമ്പതികള്‍ പറഞ്ഞു. സംഭവ ദിവസം പോയ വൈദ്യുതി ഇന്നലെ ഉച്ചയോടെയാണു പ്രദേശത്തു പുനഃസ്ഥാപിച്ചത്. വീട്ടില്‍ തനിച്ചു കഴിയാന്‍ ഭയമാണെന്നും ഇരുട്ടു വീണാല്‍ വീടിനു വെളിയില്‍ ഇറങ്ങാറില്ലെന്നും ദമ്പതികള്‍ പറഞ്ഞു.

ഇവരുടെ 3 പെണ്‍മക്കളും വിവാഹിതരായി മറ്റിടങ്ങളിലാണ്. വീട്ടില്‍ ഉച്ചയൂണൊരുക്കി അതില്‍ നിന്നുള്ള ചെറിയ വരുമാനം കൊണ്ടാണ് കുടുംബം കഴിയുന്നത്.കല്ലറ വെച്ചൂര്‍ റോഡരികില്‍ തനിച്ചാണ് ഇവര്‍ താമസം.

സംഭവം കടുത്തുരുത്തി സിഐ പി.കെ. ശിവന്‍ കുട്ടിയുടെ നേതൃത്വത്തില്‍ പ്രത്യേക സംഘം അന്വേഷിക്കും, സി സി ടിവി സൂചനലഭിച്ചിട്ടുണ്ട്. വീട്ടിലൂണ് നടത്തുന്ന ഇവിടെ ഭക്ഷണം കഴിക്കാനെത്തുന്ന ചിലരെ കേന്ദ്രീകരിച്ചാണ് അന്വേഷണമെന്ന് ജില്ലാ പൊലീസ് മേധാവി പി.എസ്.സാബു പറഞ്ഞു.