സംസ്ഥാനത്ത് ഒന്നാംഘട്ട സെന്‍സസിനുള്ള വിജ്ഞാപനം പുറത്തിറക്കി. കേന്ദ്രസര്‍ക്കാര്‍ നല്‍കിയ 31 ചോദ്യാവലി ഉള്‍പ്പെടുത്തിയാണ് പൊതുഭരണവകുപ്പ് വിജ്ഞാപനം ഇറക്കിയത് . വിവാദ ചോദ്യങ്ങളൊന്നും ആദ്യഘട്ടത്തില്‍ ഉള്‍പ്പെടുത്തിയിട്ടില്ല. ജനസംഖ്യാകണക്കെടുപ്പിന്റെ ആദ്യഘട്ട പവര്‍ത്തനങ്ങളുടെ ഭാഗമായാണ് സര്‍ക്കാര്‍ ചോദ്യാവലി പ്രസിദ്ധീകരിച്ചത്.
31 ചോദ്യങ്ങള്‍ അടങ്ങിയതാണ് പട്ടിക. പൊതുഭരണവകുപ്പ് പ്രിന്‍സിപ്പല്‍ സെക്രട്ടറിയാണ് ഗസറ്റ് വിജ്ഞാപനം പുറത്തിറക്കിയിരിക്കുന്നത്. ഗൃഹനാഥന്റെ പേര്, വീട്ടില്‍ എത്ര അംഗങ്ങള്‍, വീടിന്റെ അവസ്ഥ, ജലലഭ്യത, വൈദ്യുതി തുടങ്ങിയ വിവരങ്ങളാണ് ആദ്യ ഘട്ടത്തില്‍ ശേഖരിക്കുന്നത്.

വീട്ടില്‍ സ്മാര്‍ട്ട് ഫോണ്‍, കംപ്യൂട്ടര്‍, ഇന്റര്‍നെറ്റ് എന്നിവ ഉണ്ടോയെന്ന ചോദ്യങ്ങളുമുണ്ട് പട്ടികയില്‍ . ഗൃഹനാഥന്റെയോ നാഥയുടേയോ മൊബൈല്‍ നമ്ബറും ചോദിക്കുന്നുണ്ടെങ്കിലും, സെന്‍സസ് പ്രവര്‍ത്തനങ്ങള്‍ക്കു മാത്രമായിരിക്കുമെന്ന് എടുത്തു പറയുന്നു. ഏപ്രില്‍ 15 മുതല്‍ മെയ് 31 വരെയാണ് ആദ്യഘട്ട സെന്‍സസ് നടക്കുക.