തെക്കുപടിഞ്ഞാറൻ കാലവർഷത്തിൽ (എടവപ്പാതി) 28 ശതമാനം മഴ കുറഞ്ഞതോടെ കേരളത്തിൽ വരൾച്ച പ്രഖ്യാപിക്കാനുള്ള നടപടി തുടങ്ങി. ദുരന്തനിവാരണ അതോറിറ്റി ഒന്നാംഘട്ട പ്രഖ്യാപനത്തിനുള്ള ശുപാർശ നൽകി.

നദികൾ ഉൾപ്പെടെയുള്ള ജലാശയങ്ങളിലെ ജലനിരപ്പ്, ഭൂഗർഭ ജലനിരപ്പ്, വിളനഷ്ടം എന്നിവ പരിശോധിച്ച് ഒക്ടോബറിനുശേഷം രണ്ടാംഘട്ട വിലയിരുത്തലുണ്ടാവും.

അതിനുശേഷമാണ് സംസ്ഥാനമാകെയോ, ജില്ലകൾ മാത്രമോ വരൾച്ചബാധിതമാണെന്ന് ഔദ്യോഗികമായി പ്രഖ്യാപിക്കുക. ജൂൺമുതൽ സെപ്റ്റംബർവരെയുള്ള എടവപ്പാതിയിൽ പ്രതീക്ഷിച്ചിരുന്ന 2018.6 മില്ലീമീറ്റർ മഴയ്ക്ക് പകരം കിട്ടിയത് 1446.5 മില്ലീമീറ്റർ മാത്രം.

ഏറ്റവും മഴകുറഞ്ഞ ഏഴാമത്തെ വർഷം

1901-നുശേഷം ഏഴാമത്തെയും 2001-നുശേഷം നാലാമത്തെയും ഏറ്റവും ശുഷ്‌കമായ എടവപ്പാതിയാണ് പിന്നിട്ടതെന്ന് കാലാവസ്ഥാ നിരീക്ഷണകേന്ദ്രം ഡയറക്ടർ നീത കെ. ഗോപാൽ പറഞ്ഞു. 2023-ൽ 34.3 ശതമാനം കുറഞ്ഞിരുന്നു. ഇത്തവണത്തെപ്പോലെ അന്നും എൽ-നിനോ വർഷമായിരുന്നു. 2016-ൽ കുറഞ്ഞത് 33 ശതമാനം. അന്ന് സംസ്ഥാനമാകെ വരൾച്ച പ്രഖ്യാപിച്ചിരുന്നു.