ചൈനയിലെ വുഹാനില്‍ നിന്നും കേരളത്തിലെത്തിയ ഒരു വിദ്യാര്‍ത്ഥിനിക്ക് കൊറോണ രോഗബാധ സ്ഥിരീകരിച്ചതോടെ ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര്‍ക്ക് ഉറക്കമില്ലാത്ത രാവുകള്‍.

ചൈനയിലെ വുഹാനില്‍ നിന്നും കേരളത്തിലെത്തിയ ഒരു വിദ്യാര്‍ത്ഥിനിക്ക് കൊറോണ രോഗബാധ സ്ഥിരീകരിച്ചതോടെ ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര്‍ക്ക് ഉറക്കമില്ലാത്ത രാവുകള്‍ ആരംഭിച്ചു.

നിപ്പ സമയത്ത് ആരോഗ്യ മന്ത്രിയുടെ നേതൃത്വത്തില്‍ പ്രവര്‍ത്തിച്ച യൂണിറ്റിന് സമാനമാണ് തിരുവനന്തപുരത്തും തൃശൂരും പ്രവര്‍ത്തിക്കുന്ന കൊറോണ യൂണിറ്റും.

വുഹാനില്‍ നിന്നും വന്ന് തൃശൂര്‍ ജനറല്‍ ആശുപത്രിയില്‍ ഐസൊലേഷനില്‍ ചികിത്സയിലുള്ള ഒരാള്‍ക്കാണ് കൊറോണ സ്ഥിരീകരിച്ചത്. പൂന വൈറോളജി ഇന്‍സ്റ്റിറ്റ്യൂട്ടില്‍ അയച്ച സാമ്പിളിന്റെ പ്രാഥമിക ഫലത്തിലാണ് കൊറോണ വൈറസ് പ്രാഥമികമായി സ്ഥിരീകരിച്ചത്. രണ്ടാമത്തെ ഫലം കൂടി വരാനുണ്ട്. എങ്കിലും കാത്ത് നില്‍ക്കാതെ ആരോഗ്യ വകുപ്പ് ശക്തമായ പ്രതിരോധ പ്രവര്‍ത്തനങ്ങള്‍ക്കാണ് ഒരുക്കിയത്.

കേന്ദ്ര ആരോഗ്യ വകുപ്പ് സെക്രട്ടറി, സംസ്ഥാന ചീഫ് സെക്രട്ടറി, ആരോഗ്യ വകുപ്പ് പ്രിന്‍സിപ്പല്‍ സെക്രട്ടറി എന്നിവര്‍ നടത്തിയ വീഡിയോ കോണ്‍ഫറന്‍സിലാണ് രോഗ വിവരം കേരളത്തെ അറിയിച്ചത്. കേരളത്തില്‍ 20 സാമ്പിളുകളാണ് വൈറോളജി ലാബില്‍ അയച്ചത്. അതില്‍ നിന്നാണ് ഒരെണ്ണം പോസിറ്റീവായി വന്നത്. ഭയപ്പെടേണ്ട സാഹചര്യമില്ലെന്നും രോഗിയുടെ ആരോഗ്യനില തൃപ്തികരമാണെന്നും മന്ത്രി വ്യക്തമാക്കി.

പുതുതായി 247 പേരുള്‍പ്പെടെ കേരളത്തില്‍ ഇതുവരെ 1053 പേര്‍ നിരീക്ഷണത്തിലാണ്. അതില്‍ 15 പേര്‍ മാത്രമാണ് ആശുപത്രിയില്‍ ചികിത്സയിലുള്ളത്. 24 പേരുടെ സാമ്പിളുകള്‍ പൂന വൈറോളജി ഇന്‍സ്റ്റിറ്റ്യൂട്ടിലേക്ക് അയച്ചു.

കൊറോണ വ്യാപിക്കാതിരിക്കാന്‍ ആരോഗ്യമന്ത്രിയുടെ നേതൃത്വത്തിലാണ് സന്നദ്ധപ്രവര്‍ത്തകര്‍ രംഗത്തുള്ളത്. തത്കാലം തിരുവനന്തപുരത്ത് പ്രവര്‍ത്തിക്കുന്ന ക്യാമ്പ് വൈകാതെ തൃശൂരിലേക്ക് മാറ്റാനാണ് സാധ്യത.

സാധാരണ വൈറല്‍ പനിയുടെ ലക്ഷണങ്ങള്‍ക്ക് സമാനമാണ് കൊറോണ വൈറസിനുമുള്ളത്. പനി, ചുമ, ശ്വാസതടസം എന്നിവയാണ് പ്രധാന ലക്ഷങ്ങള്‍. അതു കൊണ്ടു തന്നെ രോഗം മൂര്‍ഛിച്ചാലും കണ്ടെത്തുക ബുദ്ധിമുട്ടാണ്.

ഒരാള്‍ പോലും കൊറോണ ബാധിച്ച് മരണമടയാന്‍ പാടില്ലെന്ന കാര്യത്തില്‍ സര്‍ക്കാരിന് വാശിയുണ്ട്. പ്രായമായവര്‍, ഹൃദയ സംബന്ധ രോഗികള്‍, ഗര്‍ഭിണികള്‍, മറ്റ് രോഗങ്ങള്‍ക്ക് ചികിത്സ തേടുന്നവര്‍ എന്നിവര്‍ക്ക് രോഗം ഗുരുതരമാകാന്‍ സാധ്യതയുണ്ട്. അതിനാല്‍ ആരംഭത്തില്‍ തന്നെ ചികിത്സ തേടണം.

തൃശൂര്‍ മെഡിക്കല്‍ കോളേജിനെ ശക്തിപ്പെടുത്തുന്നതാണെന്ന് മന്ത്രി അറിയിച്ചു.. തൃശൂര്‍ മെഡിക്കല്‍ കോളേജില്‍ മന്ത്രിയുടെ നേതൃത്വത്തില്‍ യോഗം കൂടി. എല്ലാ ജില്ലകളിലും ജാഗ്രത നിര്‍ദേശം നല്‍കിയിട്ടുണ്ട്.

എന്‍.ഐ.വി. ആലപ്പുഴ ഉള്‍പ്പെടെ ഇന്ത്യയില്‍ 12 സ്ഥലങ്ങളില്‍ കൊറോണ വൈറസ് പരിശോധിക്കുന്നതിനുള്ള സംവിധാനമൊരുക്കുമെന്ന് കേന്ദ്രം അറിയിച്ചിട്ടുണ്ട്. ആലപ്പുഴ വൈറോളജി ലാബില്‍ എത്രയും വേഗം ഇതിനുള്ള സജ്ജീകരണമൊരുക്കും.

സ്ഥിരീകരിച്ച കേസില്‍ സമ്പര്‍ക്കമുള്ളവരെ നിരന്തരം നിരീക്ഷിക്കും. രോഗിയുമായി അടുത്തിടപഴകിയവര്‍ സ്വമേധയാ ആരോഗ്യ വകുപ്പുമായി ബന്ധപ്പെടേണ്ടതാണ്. കൊറോണയ്ക്ക് അനുബന്ധ ചികിത്സയാണ് നല്‍കുന്നത്. ചിലര്‍ക്ക് മാത്രമേ രോഗം ഗുരുതരമാകുകയുള്ളൂ.

ആരോഗ്യ വകുപ്പ് പ്രിന്‍സിപ്പല്‍ സെക്രട്ടറി ഡോ. രാജന്‍ എന്‍. ഖോബ്രഗഡെ, ആരോഗ്യ വകുപ്പ് ഡയറക്ടര്‍ ഇന്‍ ചാര്‍ജ് ഡോ. രാജു, ആരോഗ്യ വകുപ്പ് അഡീഷണല്‍ ഡയറക്ടര്‍ ഡോ. വി. മീനാക്ഷി, മെഡിക്കല്‍ കോളേജ് കമ്മ്യൂണിറ്റി വിഭാഗം മേധാവി ഡോ. പി.എസ്. ഇന്ദു തുടങ്ങിയവരാണ് മന്ത്രിയുടെ യൂണിറ്റിലുള്ളത്.

വൈറസ് സിനിമ ജനിച്ചത് നിപ്പ സമയത്ത് മന്ത്രിയുടെ നേതൃത്വത്തില്‍ നടന്ന സന്നദ്ധപ്രവര്‍ത്തനത്തെ തുടര്‍ന്നാണ്. വൈറസിലെ രേവതിയെ പോലെ ശൈലജ ടീച്ചറും കളത്തിലാണ്.