തൊടുപുഴയില്‍ നിന്ന് തിരുവനന്തപുരത്തേക്ക് നിയമ വിരുദ്ധ സര്‍വീസ് നടത്തിവന്ന കൈറോസ് എന്ന സ്വകാര്യ ബസിനെ മോട്ടോര്‍ വാഹന വകുപ്പ് പിടികൂടി. കഴക്കൂട്ടത്ത് വെച്ച് കെഎസ്ആര്‍ടിസി, മോട്ടോര്‍ വാഹന വകുപ്പ്, പോലീസ് ഉദ്യോഗസ്ഥര്‍ സംയുക്തമായാണ് ബസ് കസ്റ്റഡിയിലെടുത്തത്.മുമ്പ് ഒന്പതു തവണ ഇത്തരത്തില്‍ നിയമലംഘനം നടത്തിയതിന് ഈ ബസിനെ പിടികൂടിയിട്ടുണ്ട്. അപ്പോഴെല്ലാം പിഴയടച്ച് ഉടമസ്ഥര്‍ ബസ് പുറത്തിറക്കുകയായിരുന്നു.
കോട്ടയം ആസ്ഥാനമായ കൊണ്ടോടി മോട്ടോഴ്‌സിന്റെ ഉടമസ്ഥതയിലുള്ളതാണ് ഈ ബസ്. തൊടുപുഴ-തിരുവനന്തപുരം റൂട്ടില്‍ കെഎസ്ആര്‍ടിസിയുടെ വരുമാനത്തില്‍ ഇടിവ് വന്ന സാഹചര്യത്തില്‍ നടത്തിയ പരിശോധനയിലാണ് ബസ് പിടിയിലായത്. സ്വകാര്യ ബസുകള്‍ സമാന്തര സര്‍വീസ് നടത്തിയാല്‍ ശക്തമായ നടപടി സ്വീകരിക്കുമെന്ന് മോട്ടോര്‍ വാഹന വകുപ്പ് അറിയിച്ചു.