ആ യാത്ര അന്ത്യയാത്രയായി... ക്ഷേത്രദർശനത്തിന് പോയവരുടെ ടെമ്പോ ട്രക്കുമായി കൂട്ടിയിടിച്ച് ഏഴുപേർക്ക് ദാരുണാന്ത്യം. മഹാരാഷ്‌ട്രയിലെ അമരാവതി ജില്ലയിലെ സമൃദ്ധി ഹൈവേയിൽ ഇന്നലെയായിരുന്നു അപകടം നടന്നത്. സമൃദ്ധി ഹൈവേയിൽ ധമൻഗാവൊൻ റെയിൽവെ സ്റ്റേഷന് സമീപമാണ് അപകടം സംഭവിച്ചത്. സംഭവത്തിൽ 19 പേർക്ക് പരിക്കേൽക്കുകയും ചെയ്തു.

സ്ഥലത്തെ പ്രധാന ആരാധനാകേന്ദ്രമായ ബുൽധാന ജില്ലയിലെ ഷെഗാവൊനിൽ നിന്ന് മടങ്ങുന്ന ഭക്തരാണ് ടെമ്പോയുടെ പിന്നിലുണ്ടായിരുന്നത്. വർദ്ധയിലേക്ക് ദുർഗാദേവിയുടെ പ്രതിമയുമായി പോകുകയായിരുന്നു ഇവർ.

അപകടത്തിൽ ഏഴുപേരും സംഭവസ്ഥലത്ത് തന്നെ മരണമടഞ്ഞു. സംഭവമറിഞ്ഞയുടൻ പൊലീസും പ്രദേശവാസികളും സ്ഥലത്തേക്ക് കുതിച്ചെത്തുകയായിരുന്നു. ഇവർ 19 പേരെ രക്ഷിച്ച് അടുത്തുള്ള ആശുപത്രിയിലാക്കി. സംഭവം റെയിൽവെ സ്റ്റേഷന് സമീപമായതിനാൽ റെയിൽവെ പൊലീസും അന്വേഷണം തുടങ്ങി. സംഭവത്തിന്റെ യഥാർത്ഥ കാരണം വ്യക്തമായിട്ടില്ലെന്ന് പൊലീസ് . പരിക്കേറ്റവരിൽ നാലോ അഞ്ചോ പേരുടെ നില അതീവ ഗുരുതരമാണെന്ന് വ്യക്തമാക്കി പൊലീസ്.