കതിരൂര്‍ മനോജ് വധം സി.പി.എം നേതൃത്വത്തിന്റെ അറിവോടെ ആസൂത്രിതമായി നടത്തിയ പ്രതികാരമാണെന്ന് തലശേരി സെഷന്‍സ് കോടതിയില്‍ സമര്‍പ്പിച്ച കുറ്റപത്രം.
കൊലയ്ക്കുപിന്നിലെ ഗൂഢാലോചന ഒഴികെയുള്ള കുറ്റപത്രമാണ് സിബിഐ ഇപ്പോള്‍ സമര്‍പ്പിച്ചിട്ടുള്ളത്.
സിപിഎമ്മിന്റെ മുന്ന് ഏരിയാ കമ്മിറ്റികളുടെ അറിവോടെയാണ് കൊലപാതകമെന്നും വ്യക്തമാക്കുന്നതാണ് കുറ്റപത്രം. 120 പേജുള്ള കുറ്റപത്രത്തില്‍ ഇതിനകം അറസ്റ്റിലായ 19 പ്രതികളുടെ പങ്കാളിത്തത്തെക്കുറിച്ചാണ് വിശദീകരിക്കുന്നത്. സിപിഎമ്മുമായി നേരിട്ടും അല്ലാതേയും ബന്ധമുള്ളവരാണ് കേസിലെ പ്രതികളെന്നും കുറ്റപത്രം സ്ഥാപിക്കുന്നു.
സിപിഎമ്മില്‍ നിന്ന് ബിജെപിയിലേക്കും തിരിച്ചും പ്രവര്‍ത്തകര്‍ മാറിക്കൊണ്ടിരിക്കുന്ന രാഷ്ട്രീയ സാഹചര്യം പ്രവര്‍ത്തകര്‍ക്കിടയില്‍ വാശിയും വിദ്വേഷവും വളരാന്‍ കാരണമായെന്നും അത് കൊലയ്ക്ക്അനുകൂലമായ സാഹചര്യം ഒരുക്കിയെന്നും കുറ്റപത്രത്തില്‍ പറയുന്നു.
സിപിഎം നേതാക്കളായ സി പ്രകാശന്‍, എം രാമചന്ദ്രന്‍, കെ കൃഷ്ണന്‍ തുടങ്ങി 19 പേരെയാണ് കേസില്‍ അറസ്റ്റു ചെയ്തിട്ടുള്ളത്. മനോജ് കൊല്ലപ്പെടുമ്പോള്‍ അതേ വാഹനത്തിലുണ്ടായ പ്രമോദിന്റേത് അടക്കമുള്ള 200 ഓളം സാക്ഷിമൊഴികളും 60 തൊണ്ടിമുതലുകളും മറ്റ് രേഖകളും കുറ്റപത്രത്തിനൊപ്പം സമര്‍പ്പിച്ചിട്ടുണ്ട്. മനോജ് സഞ്ചരിച്ച വാഹനം, കൊലയ്ക്ക് ഉപയോഗിച്ച വാള്‍, ബോബംബിന്റെ അവശിഷ്ടങ്ങള്‍, എന്നിവ ഉള്‍പ്പെടുന്നതാണ് തൊണ്ടിമുതലുകള്‍.
കേസന്വേഷിക്കുന്ന സിബിഐ ഡിവൈഎസ് പി ഹരി ഓംപ്രകാശാണ് കുറ്റപത്രം സമര്‍പ്പിച്ചത്. കഴിഞ്ഞ സെപതംബര്‍ ഒന്നിന് രാവിലെയാണ് ആര്‍എസ്എസ് കണ്ണൂര്‍ ജില്ലാ ശാരീരിക് ശിക്ഷണ്‍ പ്രമുഖ് എളന്തോടത്തില്‍ മനോജ് കൊല്ലപ്പെടുന്നത്. 

https://www.facebook.com/Malayalivartha