എസ്.എസ്.എല്‍.സി, ഹയര്‍സെക്കന്‍ഡറി പരീക്ഷകള്‍ ഇന്ന് തുടങ്ങും. ദിവസവും ഉച്ചയ്ക്ക് ശേഷം 1.45 നാണ് പരീക്ഷ ആരംഭിക്കുക. വെള്ളിയാഴ്ച പരീക്ഷയില്ല. സംസ്ഥാനത്ത് 2,964 സ്‌കൂളുകളിലായി 4,68,495 വിദ്യാര്‍ഥികളാണ് ഇത്തവണ പരീക്ഷ എഴുതുന്നത്. ഗള്‍ഫില്‍ ഒന്‍പത് സ്‌കൂളുകളില്‍ നിന്ന് 465 പേരും ലക്ഷദ്വീപില്‍ ഒന്‍പത് സ്‌കൂളുകളില്‍ നിന്ന് 1128 പേരും എസ്.എസ്.എല്‍.സി പരീക്ഷ എഴുതും. മലപ്പുറം വിദ്യാഭ്യാസ ജില്ലയില്‍ നിന്നാണ് ഏറ്റവും കൂടുതല്‍ പേര്‍ പരീക്ഷ എഴുതുന്നത് 24,446 പേര്‍. മലപ്പുറത്തെ എടരിക്കോട് പി.കെ.എം.എച്ച്.എസ്.എസിലാണ് ഏറ്റവും കൂടുതല്‍ വിദ്യാര്‍ഥികള്‍ പരീക്ഷയ്ക്ക് ഇരിക്കുന്നത് 2118 പേര്‍. മാര്‍ച്ച് 23നാണ് പരീക്ഷ അവസാനിക്കുക. മാര്‍ച്ച് 31 ന് മൂല്യനിര്‍ണയ ക്യാമ്പ് ആരംഭിക്കും. 54 മൂല്യനിര്‍ണയ ക്യാമ്പുകളാണുള്ളത്. ഇന്‍വിജിലേറ്റര്‍മാരായി 25,000 അധ്യാപകരെയും മൂല്യനിര്‍ണയത്തിനായി 12,500 പേരെയും നിയോഗിച്ചിട്ടുണ്ട്. ഏപ്രില്‍ 16ന് ഫലം പ്രഖ്യാപിക്കാനാണ് നീക്കം. പരീക്ഷയ്ക്കുള്ള എല്ലാ ഒരുക്കങ്ങളും പൂര്‍ത്തിയായതായി വിദ്യാഭ്യാസ വകുപ്പ് അറിയിച്ചു.

ഒന്നും രണ്ടും വര്‍ഷ ഹയര്‍സെക്കന്‍ഡറി പരീക്ഷകളും ഇന്ന് തുടങ്ങും. രാവിലെ 10 മുതലാണ് പരീക്ഷ. 2008 പരീക്ഷാ കേന്ദ്രങ്ങളിലായി 904382 വിദ്യാര്‍ഥികളാണ് പരീക്ഷ എഴുതുന്നത്. ഒന്നാം വര്‍ഷത്തില്‍ 451452 പേരും രണ്ടാം വര്‍ഷത്തില്‍ 432760 വിദ്യാര്‍ഥികളുമാണ് റെഗുലര്‍ വിഭാഗത്തിലുള്ളത്. കമ്പാര്‍ട്ട്‌മെന്റ് വിഭാഗത്തില്‍ 20170 വിദ്യാര്‍ഥികളുമുണ്ട്. ഹയര്‍സെക്കന്‍ഡറി പരീക്ഷ 30ന് അവസാനിക്കും. മലപ്പുറം ജില്ലയാണ് ഏറ്റവും കൂടുതല്‍ വിദ്യാര്‍ഥികളെ പരീക്ഷയ്ക്ക് ഇരുത്തുന്നത്. ഏറ്റവും കുറവ് വയനാടും. ഏറ്റവും കൂടുതല്‍ വിദ്യാര്‍ഥികള്‍ പരീക്ഷ എഴുതുന്നത് പട്ടം സെന്റ് മേരീസ് ഹയര്‍ സെക്കന്‍ഡറി സ്‌കൂളിലാണ്. ഏപ്രില്‍ ആറ് മുതല്‍ 52 കേന്ദ്രങ്ങളിലായി മൂല്യനിര്‍ണയം തുടങ്ങും. പരീക്ഷാഫലം മുന്‍വര്‍ഷങ്ങളേക്കാള്‍ നേരത്തെ പ്രസിദ്ധീകരിക്കുന്നതിനായി ഈ വര്‍ഷം എല്ലാ ജില്ലകളിലും ഓണ്‍ലൈന്‍ ടാബുലേഷന്‍ ഏര്‍പ്പെടുത്തിയിട്ടുണ്ട്. പരീക്ഷയ്ക്കുള്ള എല്ലാ ഒരുക്കങ്ങളും പൂര്‍ത്തിയായതായും ചോദ്യക്കടലാസ് പരീക്ഷാ കേന്ദ്രങ്ങളില്‍ എത്തിച്ചതായും പരീക്ഷാബോര്‍ഡ് സെക്രട്ടറി അറിയിച്ചു.