മഹാ ശിവരാത്രി പ്രമാണിച്ച് ആലുവ മണപ്പുറത്ത് പിതൃതര്പ്പണത്തിന് വന് ഭക്ത ജനത്തിരക്ക്; ശനിയാഴ്ച ഉച്ചവരെ ബലി തര്പ്പണത്തിന് സൗകര്യമുണ്ട്
ശിവരാത്രിയോടനുബന്ധിച്ച് പിതൃതര്പ്പണത്തിന് ഒരുങ്ങി ആലുവ മണപ്പുറം. ശിവരാത്രി ദിനത്തില് പിതൃതര്പ്പണം നടക്കുന്ന കേരളത്തിലെ പ്രധാന ക്ഷേത്രങ്ങളിലൊന്നാണ് ആലുവ ക്ഷേത്രം. നിരവധി ഭക്തജനങ്ങള് ഇതിനോടകം ബലിതര്പ്പണം നടത്തി. രാത്രിയോടെ ഭക്തജനങ്ങളുടെ തിരക്ക് വര്ധിക്കുമെന്നാണ് കണക്കാക്കുന്നത്. ശനിയാഴ്ച ഉച്ചവരെ ബലി തര്പ്പണത്തിന് സൗകര്യമുണ്ട്.
മൂന്നു ലക്ഷത്തോളം ഭക്തജനങ്ങള് ബലി തര്പ്പണത്തിനായി എത്തുമെന്നാണ് ദേവസ്വം ബോര്ഡ് പ്രതീക്ഷിക്കുന്നത്. ഇതിനായി 158 ബലിത്തറകളും ഒരുക്കിയിട്ടുണ്ട്. കനത്ത സുരക്ഷ ഉള്പ്പെടെ മികച്ച ക്രമീകരണങ്ങളും ഒരുക്കിയിട്ടുണ്ട്. ഇന്നലെ രാത്രി മുതല് ഭക്തജനങ്ങള് ഇങ്ങോട്ടേക്ക് എത്തിയിരുന്നു. മഹാശിവരാത്രിയോടനുബന്ധിച്ച് സംസ്ഥാനത്തെ വിവിധ ക്ഷേത്രങ്ങളില് വലിയ ഭക്തജനത്തിരക്ക് അനുഭവപ്പെട്ടു. പുലര്ച്ചെ മുതല് നിരവധി പേരാണ് പ്രത്യേക പൂജകളില് പങ്കെടുക്കാനെത്തിയത്.
ഹൈന്ദവരുടെ ഒരു ആഘോഷമാണ് മഹാശിവരാത്രി. ശിവനുമായി ബന്ധപ്പെട്ട ഏറ്റവും പ്രധാനപ്പെട്ട ആഘോഷമാണ്. കുംഭമാസത്തിലെ കൃഷ്ണപക്ഷത്തിലെ പതിമൂന്നാം രാത്രിയും പതിനാലാം പകലുമാണ് ശിവരാത്രി ആഘോഷിക്കുന്നത്. ശിവഭക്തര്ക്ക് വളരെ പ്രധാനപ്പെട്ട ഉത്സവമാണിത്. കൂവളത്തിന്റെ ഇലകള് ശിവന് അര്പ്പിക്കുന്നതും ഉപവാസമനുഷ്ടിക്കുന്നതും രാത്രി ഉറക്കമിളക്കുന്നതുമൊക്കെയാണ് ഈ ദിവസത്തെ പ്രധാന ആചാരങ്ങള്. ശിവലിംഗങ്ങളെ പാലും തേനും കൊണ്ട് അഭിഷേകം ചെയത് അവയെ ആരാധിക്കുന്ന പതിവുമുണ്ട്. വടക്കേ ഇന്ത്യയിലും നേപ്പാളിലും വിശ്വാസികള് ഈ ദിനത്തില് ഭാങ്ക് ചേര്ത്ത് നിര്മ്മിക്കുന്ന ലസ്സി എന്ന മധുര പാനീയം കുടിക്കുന്നു. ശിവന്റെ ഇഷ്ടപാനീയമാണ് അത് എന്നാണ് അവരുടെ വിശ്വാസം. കേരളത്തില് ആലുവ ശിവക്ഷേത്രം, മാന്നാര് തൃക്കുരട്ടി മഹാദേവക്ഷേത്രം, പടനിലം പരബ്രഹ്മ ക്ഷേത്രം, തൃശ്ശൂര് വടക്കുന്നാഥക്ഷേത്രം തുടങ്ങിയ ക്ഷേത്രങ്ങളില് ശിവരാത്രി മഹോത്സവം വിപുലമായി ആഘോഷിക്കുന്നു.
https://www.facebook.com/Malayalivartha