സ്വാതന്ത്ര്യസമരസേനാനികള്‍ക്കും അവരുടെ ആശ്രിതര്‍ക്കുമുള്ള കേന്ദ്രപെന്‍ഷന്‍ മരവിപ്പിക്കാന്‍ നീക്കം. സ്വതന്ത്രത സൈനിക് സമ്മാന്‍ പെന്‍ഷന്‍ പദ്ധതിയിലൂടെ സംസ്ഥാന ട്രഷറികള്‍വഴി നല്കുന്ന കേന്ദ്രപെന്‍ഷന്‍ വിതരണം നിലച്ചിട്ട് അഞ്ചുമാസം കഴിഞ്ഞു. പെന്‍ഷന്‍ നിഷേധിച്ചതിന് വ്യക്തമായ കാരണങ്ങളറിയാതെ സ്വാതന്ത്ര്യസമര സേനാനികളും ആശ്രിതരും സര്‍ക്കാര്‍ ഓഫീസുകള്‍ കയറിയിറങ്ങുകയാണ്.
സംസ്ഥാനസര്‍ക്കാരുകള്‍ ട്രഷറികള്‍ വഴിയാണ് കേന്ദ്രപെന്‍ഷനുള്ള തുക നല്കിയിരുന്നത്. ഈ തുക പിന്നീട് കേന്ദ്രം നല്‍കുകയായിരുന്നു പതിവ്. 2014 നവംബര്‍ മുതല്‍ ഇത് ബാങ്ക് വഴിയാക്കുകയാണെന്നും ട്രഷറിയില്‍ നിന്ന് കേന്ദ്ര പെന്‍ഷന്‍ നല്‍കേണ്ടെന്നും കേന്ദ്ര പെന്‍ഷന്‍ അക്കൗണ്ടിങ് ഓഫീസില്‍നിന്ന് അറിയിപ്പു വന്നിരുന്നു. ഇതനുസരിച്ച് അതത് ട്രഷറികളില്‍ സൂക്ഷിച്ചിട്ടുള്ള പെന്‍ഷന്‍ ബുക്ക് കേന്ദ്ര പെന്‍ഷന്‍ അക്കൗണ്ടിങ് ഓഫീസിലേക്ക് അയച്ചുകൊടുത്തു. എന്നാല്‍, പെന്‍ഷന്‍ ബാങ്ക് വഴിയാക്കുന്നതിനുള്ള അപേക്ഷയും അവരുടെ ബാങ്ക് അക്കൗണ്ട് വിവരങ്ങളും കേന്ദ്രം ആവശ്യപ്പെട്ടിരുന്നില്ല. പിന്നീട് ഇത് ട്രഷറികള്‍ മുഖാന്തരം അയച്ചുകൊടുത്തു. എന്നാല്‍, നവംബറിനുശേഷം ഇതുവരെ ഒരുരൂപ പോലും സ്വാതന്ത്ര്യസമരസേനാനികള്‍ക്ക് ലഭിച്ചിട്ടില്ല.
സ്വാതന്ത്ര്യസമരപെന്‍ഷന്‍ വാങ്ങുന്നവരില്‍ കേന്ദ്രപെന്‍ഷനും സംസ്ഥാന പെന്‍ഷനും വാങ്ങുന്നവരുണ്ട്. ഏതെങ്കിലും ഒരു പെന്‍ഷന്‍ നല്കിയാല്‍മതി എന്ന ശുപാര്‍ശ കേന്ദ്രത്തിനു മുന്നിലുണ്ട്. പെന്‍ഷന്‍ വാങ്ങുന്നവരില്‍ എല്ലാവരും സ്വാതന്ത്ര്യസമരസേനാനികളല്ലെന്ന റിപ്പോര്‍ട്ടില്‍ അന്വേഷണം നടക്കുന്നുമുണ്ട്. ഇതാണ് പെന്‍ഷന്‍ മരവിപ്പിക്കാനുള്ള കാരണമെന്നാണ് കരുതുന്നത്.
20,130 രൂപയാണ് സ്വാതന്ത്ര്യസമരസേനാനികള്‍ക്കുള്ള കേന്ദ്ര പെന്‍ഷന്‍. ആശ്രിത ഭാര്യയാണെങ്കിലും ഇതേ തുകയാണ് ലഭിക്കുക. വിവാഹിതരല്ലാത്ത പെണ്‍മക്കളുണ്ടെങ്കില്‍ 4,770 രൂപയും.
ഈ സാമ്പത്തികവര്‍ഷം ഇതുവരെ 705.45 കോടിരൂപ സ്വാതന്ത്ര്യസമരസേനാനികള്‍ക്കും ആശ്രിതര്‍ക്കുമായി നല്കിയിട്ടുണ്ടെന്നാണ് കേന്ദ്ര ആഭ്യന്തരവകുപ്പ് പറയുന്നത്. രാജ്യത്ത് 11,434 സ്വാതന്ത്ര്യസമരസേനാനികളും 24,466 ആശ്രിതരുമാണ് കേന്ദ്ര പെന്‍ഷന്‍ വാങ്ങുന്നത്. കേരളത്തില്‍ ഇരുവിഭാഗത്തിലുമായി 828 പേരുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha