ഇന്ത്യാ സന്ദര്‍ശനത്തിന് എത്തിയ അമേരിക്കന്‍ പ്രസിഡന്റ് ഡൊണാള്‍ഡ് ട്രംപിനും കുടുംബത്തിനും നല്‍കിയ വരവേല്‍പ്പും മറ്റും വലിയ വാര്‍ത്തയായിരുന്നു. എന്നാല്‍ ഈ തിരക്കുകള്‍ക്കിടെ ഇന്ത്യയിലെ ഉന്നത ബിസിനസ് നേതാക്കളെ കാണാനും ട്രംപ് സമയം മാറ്റിവെച്ചു. യുഎസ് വ്യാപാര നിബന്ധനകള്‍ ഇളവ് ചെയ്യുന്നതും, വരാനിരിക്കുന്ന യുഎസ് പ്രസിഡന്റ് തെരഞ്ഞെടുപ്പ് വിപണിയില്‍ പ്രതിഫലിക്കുന്നത് സംബന്ധിച്ചും അദ്ദേഹം ബിസിനസ് സിഇഒമാരുമായി സംവദിച്ചു.

റിലയന്‍സ് ഇന്‍ഡസ്ട്രീസ് ചെയര്‍മാനും, സിഇഒയുമായ മുകേഷ് അംബാനി ഉള്‍പ്പെടെയുള്ള പ്രമുഖ സിഇഒമാരാണ് ട്രംപിനെ കണ്ടത്. അമേരിക്കന്‍ സമ്ബദ് വ്യവസ്ഥയ്ക്ക് ഊര്‍ജ്ജമേകാന്‍ വിദേശ നിക്ഷേപങ്ങള്‍ നേടാന്‍ നിബന്ധനകള്‍ ഇളവ് ചെയ്യാന്‍ യുഎസ് പ്രതിജ്ഞാബദ്ധമാണെന്ന് ട്രംപ് വ്യക്തമാക്കി. ഇന്ത്യയുമായുള്ള വ്യാപാര കരാര്‍ തയ്യാറായി വരികയാണെന്നും വിശദവിവരങ്ങള്‍ പറയാതെ ട്രംപ് ബിസിനസ്സ് നേതാക്കളെ അറിയിച്ചു.

അമേരിക്കയില്‍ നടക്കാനാരിക്കുന്ന പ്രസിഡന്റ് തെരഞ്ഞെടുപ്പിനെക്കുറിച്ചും അദ്ദേഹം വാചാലനായി. താന്‍ അധികാരത്തില്‍ തിരിച്ചെത്തിയാല്‍ വിപണികള്‍ വീണ്ടും ഊര്‍ജ്ജസ്വലമാകുമെന്നും ട്രംപ് പ്രതീക്ഷ പ്രകടിപ്പിച്ചു. താന്‍ വീണ്ടും പ്രസിഡന്റായി തെരഞ്ഞെടുക്കപ്പെടും എന്ന ആത്മവിശ്വാസത്തിലാണ് അദ്ദേഹം. പ്രധാനമന്ത്രി നരേന്ദ്ര മോദി അല്‍പ്പം ടഫ് ആണെങ്കിലും നല്ലൊരു മനുഷ്യന്‍ ആണെന്നാണ് ട്രംപ് അഭിപ്രായപ്പെട്ടത്.

ഞങ്ങള്‍ ഇവിടെ തൊഴിലവസരങ്ങള്‍ സൃഷ്ടിക്കുമ്‌ബോള്‍, അദ്ദേഹം യുഎസില്‍ തൊഴിലുകള്‍ സൃഷ്ടിക്കും എന്ന് ട്രംപ് പറഞ്ഞു. സര്‍ക്കാരുകള്‍ക്ക് തൊഴില്‍ സൃഷ്ടിക്കാനുള്ള സഹായങ്ങള്‍ ചെയ്യാനാണ് സാധിക്കുക, സ്വകാര്യ വ്യവസായങ്ങളാണ് യഥാര്‍ത്ഥത്തില്‍ തൊഴിലുകള്‍ സൃഷ്ടിക്കുന്നത്, ട്രംപ് കൂട്ടിച്ചേര്‍ത്തു. മുകേഷ് അംബാനിക്ക് പുറമെ മഹീന്ദ്ര ഗ്രൂപ്പ് ചെയര്‍മാന്‍ ആനന്ദ് മഹീന്ദ്ര, ടാറ്റ സണ്‍സ് ചെയര്‍മാന്‍ എന്‍ ചന്ദ്രശേഖരന്‍, ആദിത്യ ബിര്‍ല ഗ്രൂപ്പ് ചെയര്‍മാന്‍ കുമാര്‍ മംഗളം ബിര്‍ല തുടങ്ങിയവരും ട്രംപുമായുള്ള റൗണ്ട്‌ടേബിളില്‍ എത്തി.

അതേസമയം ഭീകരവാദത്തിനെതിരെ ഇന്ത്യയും അമേരിക്കയും ശക്തമായി നീങ്ങുമെന്ന് യു.എസ് പ്രസിഡന്റ് ഡൊണാള്‍ഡ് ട്രംപും ഇന്ത്യന്‍ പ്രധാമന്ത്രി നരേന്ദ്രമോദിയും സംയുക്ത പ്രസ്താവനയിലൂടെ അറിയിച്ചു.

ഇന്ത്യയും അമേരിക്കയും മൂന്ന് ധാരണാപത്രങ്ങളില്‍ ഒപ്പുവച്ചു. 22000 കോടി രൂപയുടെ പ്രതിരോധക്കരാറില്‍ ഇരുവരും ഒപ്പുവെച്ചു. 24 എംഎച്ച്60 റോമിയോ ഹെലികോപ്റ്റര്‍ വാങ്ങുന്നതിനും എഎച്ച് 64 ഇ അപ്പാഷെ ഹെലികോപ്റ്റര്‍ വാങ്ങുന്നതിനും ധാരണയിലായി.

മാനസികാരോഗ്യത്തിനുള്ള ചികിത്സാ സഹകരണം, വൈദ്യശാസ്ത്ര ഉപകരണങ്ങളുടെ ഗുണമേന്മ ഉറപ്പാക്കുന്നതില്‍ സഹകരണം, പ്രകൃതിവാതക നീക്കത്തിന് ഐഒസിഎക്‌സോണ്‍മൊബില്‍ കരാര്‍ തുടങ്ങിയവയിലും ഇരു രാഷ്ട്രത്തലവന്‍മാരും ഒപ്പുവച്ചു.

വ്യാപാര രംഗത്ത് ഇരുരാജ്യങ്ങളും സഹകരിക്കുന്നതുമായി ബന്ധപ്പെട്ട ചര്‍ച്ച കൂടിക്കാഴ്ചയില്‍ നടന്നതായി പ്രധാനമന്ത്രി നരേന്ദ്ര മേദി സംയുക്ത പ്രസ്താവനയില്‍ പറഞ്ഞു.

ഇന്ത്യയിലെത്തിയ തനിക്ക് വലിയ സ്വീകരണമാണ് നല്‍കിയതെന്ന് ട്രംപ് പറഞ്ഞു. മോദിയെ ഇന്ത്യയിലെ ആളുകള്‍ കൂടുതല്‍ സ്‌നേഹിക്കുന്നതായും ട്രംപ് വ്യക്തമാക്കി.

വരുന്ന അമേരിക്കന്‍ പൊതുതിരഞ്ഞെടുപ്പില്‍ ഞാന്‍ വീണ്ടും ജയിച്ചാല്‍ വിപണി കുതിക്കുമെന്നാണ് ഡൊണാള്‍ഡ് ട്രംപ് പറഞ്ഞു. ഞാന്‍ ജയിച്ചാല്‍ വിപണി ആയിരം പോയന്റ് ഉയരും. വീണ്ടും തിരഞ്ഞെക്കപ്പെട്ടില്ലെങ്കില്‍ മുമ്ബില്ലാത്ത വിധം വിപണി തകര്‍ന്നടിയുമെന്നും ട്രംപ് പറഞ്ഞു.