ദന്തല് ചികിത്സാ രംഗത്ത് ഏകീകൃത പ്രവര്ത്തനം അനിവാര്യം: മന്ത്രി കെ.കെ. ശൈലജ ടീച്ചര്... എല്ലാ സാമൂഹ്യാരോഗ്യ കേന്ദ്രങ്ങളിലും ദന്തല് സര്ജന്മാരുടെ സേവനം ലഭ്യമാക്കുക ലക്ഷ്യം, ഡെന്റിസ്ട്രി @ 2030 വിഷണറി ഡോക്യുമെന്റ് ശില്പശാല സംഘടിപ്പിച്ചു
മറ്റ് പ്രതിരോധ ചികിത്സാ പ്രവര്ത്തനങ്ങളുമായി ബന്ധിപ്പിച്ച് ദന്ത രോഗങ്ങള്ക്കും ഒരു ഏകീകൃത ചികിത്സാ പ്രതിരോധ പ്രവര്ത്തനങ്ങള് ലഭ്യമാക്കേണ്ടത് ആവശ്യമാണെന്ന് ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര്. ദന്താരോഗ്യത്തെപ്പറ്റിയും ദന്താരോഗ്യ സംരക്ഷണത്തെപ്പറ്റിയുമുള്ള അവബോധം സമൂഹത്തില് കുറവാണ്. മറ്റ് ജീവിതശൈലീ രോഗങ്ങള് പോലെ തന്നെ ദന്തക്ഷയം, മോണ രോഗം ഉള്പ്പെടെയുള്ള രോഗങ്ങള് വര്ധിച്ച് വരികയാണ്. ദന്തരോഗങ്ങള് മറ്റ് ജീവിത ശൈലീ രോഗങ്ങളുമായി അഭേദ്യമായി ബന്ധപ്പെട്ടിരിക്കുന്നതിനാല് ഹൃദ്രോഗം, പക്ഷാഘാതം, കാന്സര് തുടങ്ങിയ രോഗങ്ങള്ക്ക് കാരണമാകുമെന്ന് ആരോഗ്യ വിദഗ്ധര് ചൂണ്ടിക്കാട്ടുന്നുവെന്നും മന്ത്രി വ്യക്തമാക്കി. ദന്തല് മേഖല ഒരു ദശാബ്ദത്തിനിടെ അഭിമുഖീകരിക്കാന് പോകുന്ന പ്രശ്നങ്ങളും പ്രതിസന്ധികളും പരിഹരിക്കാനാവശ്യമായ ക്രിയാത്മക നിര്ദേശങ്ങള്ക്ക് രൂപം നല്കുക എന്ന ലക്ഷ്യത്തോടെ കേരള ഡെന്റല് കൗണ്സില് തിരുവനന്തപുരത്ത് സംഘടിപ്പിച്ച ഡെന്റിസ്ട്രി @ 2030 വിഷണറി ഡോക്യുമെന്റ് ശില്പശാല ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.
ദന്തല് മേഖലയുടെ വികസനത്തിനായി സര്ക്കാര് വിവിധ പദ്ധതികളാണ് ആവിഷ്ക്കരിച്ച് നടപ്പിലാക്കുന്നത്. എല്ലാ സാമൂഹ്യാരോഗ്യ കേന്ദ്രങ്ങളിലും ദന്തല് സര്ജന്മാരുടെ സേവനം ലഭ്യമാക്കുക എന്നുള്ളതാണ് ഈ സര്ക്കാരിന്റെ കാഴ്ചപ്പാട്. ഇതിന് നാഷണല് ഹെല്ത്ത് മിഷന്റെ കൂടി സഹകരണത്തോടെ പദ്ധതി നടപ്പിലാക്കാനാണ് ഉദ്ദേശിക്കുന്നത്. താലൂക്ക് ആശുപത്രികളിലും തിരഞ്ഞെടുക്കപ്പെട്ട കമ്മ്യൂണിറ്റി ഹെല്ത്ത് സെന്ററുകളിലുമായി 47 അസിസ്റ്റന്റ് ദന്തല് സര്ജന് തസ്തികകളും 5 ജൂനിയര് കണ്സള്ട്ടന്റ് തസ്തികകളും അനുവദിച്ചു. വിവിധ ദന്തല് മെഡിക്കല് കോളേജുകളിലായി 44 തസ്തികകള് പുതുതായി സൃഷ്ടിച്ചിട്ടുണ്ട്.
ഐക്യരാഷ്ട്ര സംഘടനയുടെ സുസ്ഥിര വികസന ലക്ഷ്യങ്ങള് പദ്ധതിയില് ദന്താരോഗ്യത്തിന് മാത്രമായി പ്രത്യേക കമ്മിറ്റി രൂപീകരിച്ചു. ഇന്ത്യയില് ആദ്യമായി ഈ നടപടി കൈക്കൊണ്ട സംസ്ഥാനമാണ് കേരളം. കേരളത്തില് ആദ്യമായി കോട്ടയം ഗവണ്മെന്റ് ദന്തല് കോളേജില് സാമൂഹിക ദന്താരോഗ്യ വിഭാഗത്തില് എം.ഡി.എസ്. കോഴ്സ് ആരംഭിച്ചു. തിരുവനന്തപുരം ദന്തല് കോളേജിനോടനുബന്ധിച്ച് സംസ്ഥാനത്ത് ആദ്യമായി സര്ക്കാര് മേഖലയില് ദന്തല് ലാബ് ആരംഭിക്കുകയും ആവശ്യമായ തസ്തികകള് സൃഷ്ടിക്കുകയും ചെയ്തു.
സാമൂഹ്യ നീതിവകുപ്പിന്റെ ആഭിമുഖ്യത്തില് ബി.പി.എല്. വിഭാഗത്തിലുള്ള വയോജനങ്ങള്ക്ക് സൗജന്യമായി കൃത്രിമ പല്ലുകള് നല്കുന്നതിനായി 'മന്ദഹാസം' പദ്ധതിനടപ്പിലാക്കി. ഭിന്നശേഷിയുള്ള കുട്ടികള്ക്കായുള്ള പ്രത്യേക ദന്ത ചികിത്സാപദ്ധതി 'സ്പര്ശം' കോട്ടയം ദന്തല് കോളേജില് ആരംഭിച്ചു. 80 ലക്ഷം രൂപ ചെലവഴിച്ച് ആലപ്പുഴ, തൃശൂര് ദന്തല് കോളേജുകളില് മൊബൈല് ദന്തല് ക്ലിനിക്ക് ആരംഭിച്ചു. ആലപ്പുഴ, കോഴിക്കോട് ദന്തല് മെഡിക്കല് കോളേജുകളില് 1 കോടി രൂപ ചെലവഴിച്ച് കോണ് ബീം സി.ടി. സ്കാന് മെഷീന് സ്ഥാപിച്ചതായും മന്ത്രി വ്യക്തമാക്കി.
ദന്തല് മേഖലയ്ക്കും സമൂഹത്തിനും മഹത്തായ സേവനങ്ങള് നല്കിയ ദന്ത ഡോക്ടര്മാരില് നിന്നും തെരഞ്ഞെടുക്കപ്പെട്ട ഡോ. എം.കെ. ജയിംസിന് കേരള ഡെന്റല് കൗണ്സിലിന്റെ പ്രഥമ ആജീവനാന്ത പുരസ്കാരം മന്ത്രി കെ.കെ. ശൈലജ ടീച്ചര് സമ്മാനിച്ചു.
https://www.facebook.com/Malayalivartha
