കരിപ്പൂരിലെ റണ്‍വേ ദുര്‍ബലമെന്ന് വിമാനത്താവള ഡയറക്ടര്‍, റണ്‍വേ നവീകരണ പ്രവര്‍ത്തനങ്ങള്‍ക്കായുള്ള ടെന്‍ഡര്‍ നടപടികള്‍ ഏപ്രിലില്‍ ആരംഭിക്കും
വലിയ വിമാനങ്ങള്‍ക്ക് ഇറങ്ങാനാവാത്ത വിധം ദുര്‍ബലമാണ് കരിപ്പൂര്‍ വിമാനത്താവള റണ്‍വേയെന്ന് വിമാനത്താവള ഡയറക്ടര്‍ കെ.പീറ്റര്‍ എബ്രഹാം വ്യക്തമാക്കി. റണ്‍വേയുടെ പുനര്‍നിര്‍മാണം നീട്ടിക്കൊണ്ടു പോകാനാവില്ല. റണ്‍വേ നവീകരണ പ്രവര്‍ത്തനങ്ങള്‍ക്കായുള്ള ടെന്‍ഡര്‍ നടപടികള്‍ ഏപ്രിലില്‍ ആരംഭിക്കും. തുടക്കത്തില്‍ റണ്‍വേ നിര്‍മിച്ചത് ടൈപ്പ് ഡി വിഭാഗത്തില്‍പ്പെട്ട ചെറിയ വിമാനങ്ങള്‍ക്ക് വേണ്ടിയാണെന്ന് പീറ്റര്‍ പറഞ്ഞു. പിന്നീട് ടൈപ്പ് ഇ വിഭാഗത്തില്‍പ്പെട്ട വലിയ വിമാനങ്ങള്‍ കരിപ്പൂരില്‍ എത്തിതുടങ്ങി. റണ്‍വേയുടെ നീളക്കുറവാണ്‌ കരിപ്പൂരിലെ പ്രശ്‌നം. വലിയ വിമാനങ്ങള്‍ക്ക് സര്‍വ്വീസ് നടത്താന്‍ 3.5 കിലോമീറ്റര്‍ റണ്‍വേ എങ്കിലും വേണം. കരിപ്പൂരിലുള്ളത് 2.65 കിലോമീറ്ററാണ്.
ഏഴ് ടണ്‍ മുതല്‍ 200 ടണ്‍ വരെ ഭാരമുള്ള വിമാനങ്ങള്‍ ഇടിച്ചിറങ്ങുന്ന റണ്‍വേയുടെ തുടക്കത്തിലാണ് ബലക്ഷയം ഉള്ളത്. മഴ ആരംഭിക്കുന്നതോടെ ഈ ഭാഗങ്ങളിലൂടെയുള്ള സര്‍വീസ് കൂടുതല്‍ ദുഷ്‌കരമാകും. യാത്രക്കാരുടെ സുരക്ഷ കണക്കിലെടുത്താണ് വലിയ വിമാനങ്ങള്‍ക്കു നിയന്ത്രണം ഏര്‍പ്പെടുത്തിയത്. വിമാനത്താവളത്തിന്റെ നവീകരണമാണ് എയര്‍പ്പോര്‍ട്ട് അതോറിറ്റിയുടെ ലക്ഷ്യം. എയര്‍ലൈന്‍ കമ്പനികള്‍ നേരത്തെ ബുക്കിങ് എടുത്തതു കൊണ്ടാണ് നവീകരണ പ്രവര്‍ത്തനങ്ങള്‍ ഇത്ര വൈകി ആരംഭിക്കുന്നതെന്നും അദ്ദേഹം വ്യക്തമാക്കി.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
