നിങ്ങള്‍ക്ക് അത് തരും, അവിടെ അത് വരും, ഇവിടെ ഇത് വരും എന്നിങ്ങനെയുള്ള പ്രഖ്യാപനങ്ങളില്‍ വിഎസ്ശിവകുമാര്‍  ജനങ്ങളെ മയക്കുന്നുവെന്ന് യുഡിഎഫിലെ ഘടകകക്ഷി എംഎല്‍മാര്‍ നിയമസഭയില്‍ പറഞ്ഞു. ഇന്ന് എംഎല്‍എമാരുടെ ഭാഗത്ത് നിന്ന് ആരോഗ്യമന്ത്രിക്ക് കടുത്ത വിമര്‍ശനമാണ് നേരിട്ടത്.
ആരോഗ്യരംഗത്തെ പ്രവര്‍ത്തനങ്ങളില്‍ സര്‍ക്കാര്‍ നിരന്തരം വീഴ്ചവരുത്തുന്നുവെന്ന് മുസ്ലിംലീഗ്, കേരള കോണ്‍ഗ്രസ് മാണി ഗ്രൂപ്പ് പാര്‍ട്ടികളിലെ ചില എം.എല്‍.എമാരാണ് ആക്ഷേപമുന്നയിച്ചത്. തിരുവമ്പാടി മണ്ഡലത്തിലെ ഒരു പ്രാഥമികാരോഗ്യകേന്ദ്രത്തില്‍ കമ്മ്യൂണിറ്റി ഹെല്‍ത്ത് സെന്റര്‍ എന്ന ബോര്‍ഡ് വച്ചതല്ലാതെ മറ്റൊന്നുമുണ്ടായിട്ടില്ലെന്ന് സി. മോയിന്‍കുട്ടി എം.എല്‍.എ കുറ്റപ്പെടുത്തി. ഇതല്ലാതെ ഒരു സൗകര്യവും ഇവിടെ ഏര്‍പ്പെടുത്തിയിട്ടില്ലെന്നും അദ്ദേഹം പറഞ്ഞു. കെ.എന്‍.എ ഖാദറും ഇതിനു സമാനമായ പരാതി ഉന്നയിച്ചു.
എം.എല്‍.എമാരെ നാറാണത്തു ഭ്രാന്തന്മാരാക്കരുതെന്ന് കേരള കോണ്‍ഗ്രസിലെ മോന്‍സ് ജോസഫ് പറഞ്ഞു. കുറുവിലങ്ങാട് ഗവ. ആശുപത്രിയില്‍ പുതിയ തസ്തിക സൃഷ്ടിക്കുമെന്ന വാഗ്ദാനം നടപ്പായില്ല. കെട്ടിട നിര്‍മ്മാണവും നടന്നില്ലെന്നും അദ്ദേഹം കുറ്റപ്പെടുത്തി. വെറുതെ പ്രഖ്യാപനങ്ങള്‍ നടത്തുന്നതല്ലാതെ നടത്തിക്കാണിക്കണമെന്നും എംഎല്‍എമാര്‍ പറഞ്ഞു. എന്നാല്‍ ഇക്കാര്യങ്ങള്‍ പരിശോധിക്കുമെന്ന് മന്ത്രി ഉറപ്പ് നല്‍കി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha