കോവിഡ് 19 വ്യാപനം നിയന്ത്രിക്കാന്‍ സംസ്ഥാന സര്‍ക്കാര്‍ പ്രഖ്യാപിച്ച സമ്പൂര്‍ണ ലോക്ക്ഡൗണ്‍ മൂന്നാം ദിവസത്തിലേക്ക് കടന്നു. പോലീസ് നടപടികള്‍ കടുപ്പിച്ചതോടെ ആളുകള്‍ അനാവശ്യമായി പുറത്തിറങ്ങുന്നത് കുറഞ്ഞിട്ടുണ്ട്. രാവിലെ മുതല്‍ പ്രധാന തെരുവുകളിലെല്ലാം പോലീസ് പരിശോധന കര്‍ശനമാണ്.
നിയന്ത്രണം ലംഘിച്ച് പുറത്തിറങ്ങിയാല്‍ കര്‍ശന നടപടിയുണ്ടാകുമെന്ന് പോലീസ് മുന്നറിയിപ്പ് നല്‍കിയിട്ടുണ്ട്. അനാവശ്യമായി പുറത്തിറങ്ങുന്ന വാഹനങ്ങള്‍ ഇന്ന് രാവിലെയും കസ്റ്റഡിയിലെടുത്തു. ഇരുചക്ര വാഹനങ്ങളാണ് ഇതില്‍ അധികവും.

പോലീസ് വിവരങ്ങള്‍ തിരക്കുമ്പോള്‍ മതിയായ കാരണം ബോധിപ്പിക്കാന്‍ കഴിയാത്തവരുടെ വാഹനങ്ങളാണ് കസ്റ്റഡിയിലെടുക്കുന്നത്. ചിലര്‍ സാധനങ്ങള്‍ വാങ്ങാന്‍ എന്ന വ്യാജേനയും പുറത്തിറങ്ങുന്നുണ്ട്. ഇവര്‍ രണ്ടുകൂട്ടം സാധനം മാത്രമാകും വാങ്ങിയത്. ഇത്തരം രീതി അനുവദിക്കാന്‍ കഴിയില്ലെന്നും നാല് ദിവസമെങ്കിലും ഉപയോഗിക്കാവുന്ന വിധത്തില്‍ സാധനങ്ങള്‍ വാങ്ങാന്‍ ഇറങ്ങുന്നവര്‍ക്കേ ഇളവ് നല്‍കൂ എന്നും പോലീസ് വ്യക്തമാക്കിയിട്ടുണ്ട്. രോഗവ്യാപനം കൂടുതലുള്ള കാസര്‍ഗോട്ട് പോലീസ് കര്‍ശന പരിശോധനയാണ് നടത്തുന്നത്.
വിലക്ക് ലംഘിച്ച് പുറത്തിറങ്ങുന്നതിന് കസ്റ്റഡിയിലെടുക്കുന്ന വാഹനം ലോക്ക്ഡൗണ്‍ അവസാനിച്ച ശേഷം തിരിച്ചു നല്‍കിയാല്‍ മതിയെന്നാണ് പോലീസ് തീരുമാനിച്ചിരിക്കുന്നത്.