ജനറല് ആശുപത്രിയില് കോവിഡ് 19 പരിശോധനയ്ക്കുള്ള സ്രവം ശേഖരിക്കുന്നതില്നിന്നു ഡോക്ടര്മാര് പിന്മാറി! നഴ്സുമാര് സ്രവശേഖരണം നടത്തുന്നതു ശരിയാകുന്നില്ലെന്ന് പരിശോധനാ ലാബുകള്; പരാതിയുമായി കോട്ടയം ജില്ലാ ആശുപത്രിയിലെ നഴ്സുമാര്
ജില്ലാ ജനറല് ആശുപത്രിയില് കോവിഡ് 19 പരിശോധനയ്ക്കുള്ള സ്രവം ശേഖരിക്കുന്നതില്നിന്നു ഡോക്ടര്മാര് പിന്മാറി, നഴ്സുമാര് സ്രവശേഖരണം നടത്തുന്നതു ശരിയാകുന്നില്ലെന്ന് പരിശോധനാ ലാബുകള്. കോട്ടയം ജില്ലാ ജനറല് ആശുപത്രിയില്നിന്നു ശേഖരിക്കുന്ന സ്രവങ്ങളുടെ പരിശോധനാ ഫലം പലപ്പോഴും തെറ്റുന്നു. കോവിഡ് 19 പരിശോധനയ്ക്കുള്ള സ്രവം ഡോക്ടര്മാര് ശേഖരിക്കണമെന്നാണ് നിര്ദേശം. ജില്ലാ ആശുപത്രിയിലെ ഡോക്ടര്മാര് പിന്മാറിയതോടെ സ്രവം ശേഖരിക്കേണ്ട ചുമതല രോഗികളുടെ രക്തസാന്പിള് എടുക്കാന് ചുമതലപ്പെട്ട നഴ്സുമാര്ക്കായി.
കോവിഡ് 19 പരിശോധനകള്ക്കു നിയോഗിക്കപ്പെട്ടിരിക്കുന്ന ഡോക്ടര്മാരുടെ ഭാഗത്തുനിന്നുമുണ്ടാകുന്ന കൃത്യവിലോപത്തിനെതിരെ പ്രതിഷേധം ശക്തമാണ്. കോട്ടയം ജനറല് ആശുപത്രിയില് എത്തുന്ന രോഗികളുടെ സ്രവം ശേഖരിക്കുന്നതിനായി മൂന്നു ഡോക്ടര്മാരെ ചുമതലപ്പെടുത്തി ആശുപത്രി സൂപ്രണ്ട് ഉത്തരവിറക്കിയിട്ടുണ്ടെങ്കിലും ഉത്തരവ് പാലിക്കാന് ഡോക്ടര്മാര് തയാറാകുന്നില്ലെന്നും ആരോപണമുണ്ട്.
സ്രവ പരിശോധനയ്ക്കായി രോഗികള് എത്തുന്പോള് ഡോക്ടര്മാര് നിസാര കാരണങ്ങള് പറഞ്ഞ് ഒഴിവാകുകയാണ്. പലപ്പോഴായി ഇത് ആവര്ത്തിക്കപ്പെട്ടതോടെ നഴ്സുമാര് പരാതിയുമായി രംഗത്തെത്തി. തുടര്ന്ന് നഴ്സിംഗ് സൂപ്രണ്ട് നേരിട്ട് ആശുപത്രി മെഡിക്കല് സൂപ്രണ്ടിനോട് പരാതി പറഞ്ഞെങ്കിലും നടപടി ഉണ്ടായില്ല. കോട്ടയം ജില്ലയില്നിന്നു കോവിഡ് പരിശോധനകള്ക്ക് അയയ്ക്കുന്ന എല്ലാ സാന്പിളുകളും നെഗറ്റീവാകുന്നതോടെയാണ് സാന്പിള് ശേഖരിക്കാന് നിയോഗിച്ചിരിക്കുന്ന ഡോക്ടര്മാര് നിലവില് ആരുടെയും സാന്പിളുകള് ശേഖരിച്ചിട്ടില്ലെന്ന കാര്യം ഗൗരവത്തോടെ കാണേണ്ടത്.
ഇതോടെ സാന്പിള് ശേഖരിക്കുന്ന വിധം ശരിയല്ലെന്നുള്ള ആരോപണങ്ങളും ഉയര്ന്നിട്ടുണ്ട്. സാന്പിള് പരിശോധനയ്ക്കു ശേഖരിക്കുന്നതു ശരിയായ വിധത്തില് അല്ലെങ്കില് രോഗിയാണെങ്കിലും റിസര്ട്ട് നെഗറ്റീവായിരിക്കുമെന്നും പറയപ്പെടുന്നു. എന്നാല് സ്രവ പരിശോധനയ്ക്കു നിലവില് കുഴപ്പങ്ങളില്ലെന്നും ഡോക്ടര്മാര്ക്കും നഴ്സുമാര്ക്കും കൃത്യമായി ഡ്യൂട്ടി ലിസ്റ്റ് നല്കുന്നുണ്ടെന്നും മെഡിക്കല് സൂപ്രണ്ട് ഡോ. ബിന്ദുകുമാരി പറഞ്ഞു. നിലവിലത്തെ സാഹചര്യത്തില് എല്ലാവരും ബുദ്ധിമുട്ടിയാണ് ജോലിക്ക് എത്തുന്നത്.
https://www.facebook.com/Malayalivartha