എസ് എസ് എല്‍ സി, ഹയര്‍ സെക്കന്ററി പരീക്ഷകള്‍ മേയ് രണ്ടാംവാരത്തില്‍ നടത്താവുന്ന തരത്തില്‍ വിദ്യാഭ്യാസ വകുപ്പില്‍ കൂടിയാലോചനകള്‍ നടക്കുന്നു. മേയ് ആദ്യവാരം ഇതുവരെ നടന്ന എസ് എസ് എല്‍ സി, ഹയര്‍ സെക്കന്ററി പരീക്ഷകളുടെ മൂല്യ നിര്‍ണയം ആരംഭിക്കും. രണ്ടാംവാരത്തില്‍ നടക്കുന്ന പരീക്ഷകളുടെ പേപ്പറും ഉടന്‍ മൂല്യ നിര്‍ണയം നടത്തും. 15 ദിവസമാണ് മൂല്യ നിര്‍ണയത്തിന് എടുക്കുക. മേയ് നാലാം വാരത്തില്‍ ഇരു പരീക്ഷകളുടെയും ഫല പ്രഖ്യാപനം നടത്തും. ജൂണ്‍ ആദ്യവാരം സ്‌കൂള്‍ ക്ലാസുകള്‍ തുറക്കാനാണ് സാധ്യത.

അതേ സമയം ഒഡീഷ പോലുള്ള സംസ്ഥാനങ്ങള്‍ സ്‌കൂള്‍ തുറക്കുന്നത് ജൂണ്‍ മൂന്നാംവാരത്തിലായിരിക്കുമെന്നാണ് റിപ്പോര്‍ട്ടുകള്‍.

ഹയര്‍ സെക്കന്ററി ഒന്നാം വര്‍ഷ ക്ലാസുകള്‍ ജൂലൈ ആദ്യം മാത്രമേ ആരംഭിക്കുകയുള്ളു. 2020 വരെ ഇങ്ങനെയാണ് നടന്നിരുന്നത്. 2020 ല്‍ പ്ലസ് വണ്‍ ക്ലാസുകള്‍ ജൂണ്‍ ഒന്നിന് ആരംഭിച്ചിരുന്നു. 2020-2021 അധ്യയന വര്‍ഷം സുഗമമായി നടത്താന്‍ കഴിയുമെന്നാണ് വിദ്യാഭ്യാസ മന്ത്രാലയവുമായി ബന്ധപ്പെട്ടവര്‍ പറയുന്നത്.

ഏപ്രില്‍ 30 ഓടെ കേരളത്തില്‍ നിന്നും കെറോണയെ തുരത്താന്‍ കഴിയുമെന്നാണ് സര്‍ക്കാര്‍ പ്രതീക്ഷിക്കുന്നത്. എന്നാല്‍ ഇതര സംസ്ഥാനങ്ങളില്‍ നിന്ന് തീവണ്ടിയോ ബസോ വിമാനമോ വന്നാല്‍ കേരളത്തില്‍ കൊറോണ വീണ്ടുമെത്താനുള്ള സാധ്യത സര്‍ക്കാര്‍ തള്ളികളയുന്നില്ല. അതിനാല്‍ കര്‍ശനമായ നിരീക്ഷണമായിരിക്കും ലോക്ക് ഡൗണ്‍ പിന്‍വലിച്ചാലും സംസ്ഥാനത്ത് ഉണ്ടാവുക.

വിദ്യാഭ്യാസ മേഖലയിലെ താളംതെറ്റല്‍ സര്‍ക്കാരിനെ ആശങ്കാകുലമാക്കിയിട്ടുണ്ട്.ഏപ്രില്‍ പകുതിയോടെ പത്താം തരത്തിന്റെ ഫലം വരേണ്ടതായിരുന്നു. ഏപ്രിലാണ് എഞ്ചിനീയറിംഗ്, മെഡിസിന്‍, മറ്റ് അനുബന്ധ വിഷയങ്ങള്‍,എല്‍ എല്‍ ബി തുടങ്ങിയ പ്രൊഫഷണല്‍ കോഴ്‌സുകളുടെ പ്രവേശന പരീക്ഷ നടക്കേണ്ടിയിരുന്നത് . ഇത് മേയ് മൂന്നാം വാരത്തില്‍ നടത്താനാണ് സാധ്യത. യുദ്ധകാലാടിസ്ഥാനത്തില്‍ പേപ്പര്‍ നോക്കിയാല്‍ ജൂണ്‍ ആദ്യം ഫലം പ്രസിദ്ധീകരിക്കാന്‍ കഴിയും. പ്രവേശന പരീക്ഷകളെല്ലാം ഓണ്‍ലൈനായിരിക്കും.

ബാക്കിയുള്ള പരീക്ഷകള്‍ എന്നു നടത്തണമെന്ന കാര്യത്തില്‍ വിദ്യാഭ്യാസ മന്ത്രി തീരുമാനം എടുത്തിട്ടില്ല. അദ്ദേഹം കൂടിയാലോചനകള്‍ തുടരുകയാണ്. ഏതായാലും ലോക്ക് ഡൗണില്‍ കേന്ദ്രവും സംസ്ഥാനവും എടുക്കുന്ന തീരുമാനത്തിനായി കാത്തിരിക്കുകയാണ് മന്ത്രി.