കൊറോണ വൈറസ് വ്യാപന ഭീതിയെത്തുടര്‍ന്നു രാജ്യമെങ്ങും ഏര്‍പ്പെടുത്തിയ ലോക്ഡൗണ്‍ നീട്ടുമോ എന്ന കാര്യത്തില്‍ ഇന്നു അന്തിമ തീരുമാനമുണ്ടായേക്കും. പ്രധാനമന്ത്രി നരേന്ദ്ര മോദി, വിവിധ സംസ്ഥാനങ്ങളിലെ മുഖ്യമന്ത്രിമാരുമായി വിഡിയോ കോണ്‍ഫറന്‍സിങ് വഴി കൂടിക്കാഴ്ച നടത്തുകയാണ്. ഇതില്‍ കേരളത്തിന് ലഭിച്ച അവസരത്തില്‍ മുഖ്യമന്ത്രി പിണറായി വിജയനും ഇപ്പോള്‍ നിലപാട് വ്യക്തമാക്കിയെന്നാണ് ലഭിക്കുന്ന റിപ്പോര്‍ട്ട്. ഇതുപ്രകാരം, ലോക്ഡൗണ്‍ പൂര്‍ണമായി പിന്‍വലിക്കാന്‍ സാഹചര്യമായിട്ടില്ലെന്ന് മുഖ്യമന്ത്രി പിണറായി വിജയന്‍ അറിയിച്ചുവെന്നാണ സൂചന. ഘട്ടംഘട്ടമായും മേഖല തിരിച്ചുമാത്രമേ നിയന്ത്രണങ്ങളില്‍ ഇളവ് ചെയ്യാവൂവെന്നും അദ്ദേഹം വ്യക്തമാക്കി. പ്രവാസികളുടെ പ്രതിസന്ധിയും മുഖ്യമന്ത്രി പ്രധാനമന്ത്രിയെ ധരിപ്പിച്ചുവെന്നാണ് വിവരം.

അതേസമയം, പ്രധാനമന്ത്രി വിളിച്ച മുഖ്യമന്ത്രിമാരുടെ വീഡിയോ കോണ്‍ഫറന്‍സിങ് യോഗം തുടരുകയാണ്. സംസ്ഥാനങ്ങളുടെ അഭിപ്രായങ്ങള്‍ എല്ലാം പരിഗണിക്കുമെന്നു പ്രധാനമന്ത്രി ഉറപ്പ് നല്‍കി. 24 മണിക്കൂറും ഫോണില്‍ ലഭ്യമായിരിക്കും. കേന്ദ്രവും സംസ്ഥാനങ്ങളും ഒറ്റക്കെട്ടായി പ്രവര്‍ത്തിക്കണമെന്നും മോദി പറഞ്ഞു. ആര്‍ക്കും എപ്പോള്‍ വേണമെങ്കിലും വിളിക്കാമെന്നും കോവിഡ്19നെ കുറിച്ച് എന്തുനിര്‍ദേശവും നല്‍കാമെന്നും പ്രധാനമന്ത്രി മുഖ്യമന്ത്രിമാരോടു പറഞ്ഞു. നമ്മള്‍ തോളോടുതോള്‍ ചേര്‍ന്നു പ്രവര്‍ത്തിക്കണമെന്നും മോദി കൂട്ടിച്ചേര്‍ത്തു. അതിനിടെ യോഗത്തില്‍ പ്രധാനമന്ത്രിയും മുഖ്യമന്ത്രിമാരും മാസ്‌ക് ധരിച്ചാണ് പങ്കെടുക്കുന്നത്. വീട്ടില്‍ നിര്‍മിച്ച പുനരുപയോഗിക്കാവുന്ന മാസ്‌കുകള്‍ ഉപയോഗിക്കണമെന്ന് കഴിഞ്ഞയാഴ്ച കേന്ദ്രം നിര്‍ദേശിച്ചിരുന്നു. ഈ നിര്‍ദേശത്തിനു പ്രചാരണം നല്‍കാനാണ് പ്രധാനമന്ത്രി മാസ്‌ക് ധരിച്ചെത്തിയതെന്നാണ് സൂചന.

അതിനിടെ, കോവിഡ്19 ബാധിച്ച് മരണം 250 അടുക്കുകയും കേസുകളുടെ എണ്ണം 7,400 കഴിയുകയും ചെയ്തതോടെ നേരത്തേ പ്രഖ്യാപിച്ച ഏപ്രില്‍ 14ന് ശേഷവും ലോക്ഡൗണ്‍ തുടരണമെന്നാണ് സംസ്ഥാനങ്ങളുടെ ആവശ്യം. ഹോട്ട്‌സ്‌പോട്ടുകളില്‍ ശക്തമായ നടപടികള്‍ വേണമെന്നും മറ്റു ജില്ലകള്‍ക്ക് ഇളവ് അനുവദിക്കണമെന്നുമാണ് പൊതുവിലുയരുന്ന അഭിപ്രായം. എല്ലാവരും ആരോഗ്യ പ്രോട്ടോക്കോള്‍ അനുസരിക്കണം. രാജസ്ഥാനിലെ ഭില്‍വാര മോഡല്‍ പോലെ വ്യാപകമായ പരിശോധനയും കഠിനമായ ലോക്ഡൗണ്‍ നടപടികളും മറ്റു സ്ഥലങ്ങളില്‍ക്കൂടി കൊണ്ടുവരണമെന്നും അഭിപ്രായം ഉയര്‍ന്നു. ഇതിനോടകം, ഒഡിഷയും പഞ്ചാബും രാജസ്ഥാനും ഏപ്രില്‍ 30 വരെ ലോക്ഡൗണ്‍ നീട്ടിയതായി പ്രഖ്യാപിച്ചിട്ടുണ്ട്.

അതേസമയം, കോവിഡ് ബാധിച്ച് രാജ്യത്ത് മരണം 239 ആയി. രോഗികള്‍ 7447. ചികില്‍സയിലുള്ളവര്‍ 6565. രോഗം ഭേദമായവര്‍ 642. 24 മണിക്കൂറിനിടെ 40 മരണങ്ങള്‍ സംഭവിച്ചു. 1035 പുതിയ രോഗികള്‍ റിപ്പോര്‍ട്ട് ചെയ്തു. ആയിരത്തിലേറെ രോഗികള്‍ ഒരുദിവസം വരുന്നത് ഇതാദ്യമാണ്. രാജ്യത്തെ കോവിഡ് മരണത്തില്‍ പകുതിയും മഹാരാഷ്ട്രയിലാണ്. 108 പേരാണ് സംസ്ഥാനത്ത് ആകെ മരിച്ചത്. ഇതില്‍ 64 മുംബൈയിലാണ്. സംസ്ഥാനത്തുടനീളം 1574 കോവിഡ് രോഗികളാണുള്ളത്. മുംബൈയില്‍ രോഗ ബാധിതരുടെ എണ്ണം ആയിരം കടന്നു. ഇന്നലെ മാത്രം 210 പേര്‍ക്ക് കോവിഡ് സ്ഥിരീകരിച്ചു. മുംബൈയ്ക്ക് പിന്നില്‍ കൂടുതല്‍ രോഗികള്‍ക്കുള്ളത് പുണെയിലാണ്.