ഇന്ന് പരിയാരം മെഡിക്കല്‍ കോളജില്‍ കോവിഡ് ബാധിച്ചു മരിച്ച മാഹി ചെറുകല്ലായി സ്വദേശി പി. മെഹ്‌റൂഫിന് എവിടെനിന്നാണു രോഗം പകര്‍ന്നതെന്ന കാര്യം ഇപ്പോഴും അവ്യക്തമാണ്. ഈ മാസം 26നാണ് മെഹ്‌റൂഫിന് രോഗലക്ഷണങ്ങള്‍ കണ്ടെത്തുന്നത്. തുടര്‍ന്ന് തലശേരിയിലെ സ്വകാര്യ ആശുപത്രിയില്‍ ചികിത്സ തേടി. ആരോഗ്യ വകുപ്പ് പുറത്തുവിട്ട റൂട്ട് മാപ്പ് അനുസരിച്ച് മാര്‍ച്ച് 15 മുതല്‍ 21വരെ എംഎം ഹൈസ്‌കൂള്‍ ജുമാ മസ്ജിദില്‍ നടന്ന മതചടങ്ങുകളില്‍ പങ്കെടുത്തിട്ടുണ്ട്. മാര്‍ച്ച് 18ന് ഒരു വിവാഹനിശ്ചയച്ചടങ്ങില്‍ പങ്കെടുക്കാന്‍ ബന്ധുവിനൊപ്പം യാത്ര ചെയ്തു. പന്ന്യന്നൂരിലായിരുന്നു ചടങ്ങ് നടന്നത്. വിവാഹ നിശ്ചയമുള്‍പ്പെടെയുള്ള പൊതുചടങ്ങുകളില്‍ പങ്കെടുത്ത മെഹ്‌റൂഫ് ന്യൂമാഹി, ചൊക്ലി, പന്ന്യന്നൂര്‍ പഞ്ചായത്തുകളില്‍ യാത്ര ചെയ്തിട്ടുമുണ്ട്. ഇയാളുമായി സമ്പര്‍ക്കത്തില്‍ വന്നെന്നു കരുതുന്ന എല്ലാവരെയും ക്വാറന്റീനു വിധേയമാക്കുകയാണ് ആരോഗ്യ പ്രവര്‍ത്തകര്‍.

വിവാഹ ചടങ്ങില്‍ പങ്കെടുക്കാന്‍ പൊയത് ഇങ്ങനെ

മാഹി പാലം വരെ ബൈക്കിലും പിന്നീടു ടെമ്പോ ട്രാവലറിലുമാണ് അന്നു സഞ്ചരിച്ചത്. 11 ആളുകള്‍ അപ്പോള്‍ വാഹനത്തിലുണ്ടായിരുന്നു. 18ന് എരൂര്‍ ജുമാ മസ്ജിദില്‍ പ്രാര്‍ഥനയിലും പങ്കെടുത്തു.

അതേസമയം രോഗമുണ്ടായതിനെ തുടര്‍ന്ന് മിംസ് ആശുപത്രിയിലായിരുന്നു ആദ്യം പ്രവേശിപ്പിച്ചത്. ഗുരുതരാവസ്ഥയിലായതിനെ തുടര്‍ന്നാണ് ഇയാളെ പരിയാരം മെഡിക്കല്‍ കോളജിലേക്കു മാറ്റിയതെന്ന് ഡോ. എ.കെ. ജയശ്രീ പ്രതികരിച്ചു. പനി പിടിപെടുന്നത് 26ന് ആണ്. തുടര്‍ന്ന് സ്വകാര്യ ആശുപത്രിയില്‍ പോയി. അസുഖം മാറാതിരുന്നപ്പോഴാണ് മിംസ് ആശുപത്രിയിലേക്കു പോയത്. സുരക്ഷാ മാര്‍ഗങ്ങള്‍ എടുത്തിരുന്നുവെന്നാണ് സ്വകാര്യ ആശുപത്രി അധികൃതര്‍ അറിയിച്ചതെന്ന് ഡോ. ജയശ്രീ പറഞ്ഞു. മെഹ്‌റൂഫുമായി സമ്പര്‍ക്കത്തില്‍വരാന്‍ സാധ്യതയുള്ളവരെയെല്ലാം കണ്ടെത്താനുള്ള ശ്രമം തുടരുകയാണ്. മാഹി ആരോഗ്യ വിഭാഗവും കണ്ണൂരിലെ ആരോഗ്യ പ്രവര്‍ത്തകരുമാണ് ഇതിനായി പ്രവര്‍ത്തിക്കുന്നത്.

പുറത്തുനിന്നെത്തിയ ആരില്‍നിന്നെങ്കിലുമാകാം ഇയാള്‍ക്ക് രോഗം പടര്‍ന്നതെന്നാണു കരുതുന്നത്. മെഹ്‌റൂഫുമായി ബന്ധപ്പെട്ട 16 പേരെ പരിശോധനയ്ക്കു വിധേയമാക്കിയപ്പോള്‍ നെഗറ്റീവായിരുന്നു ഫലം. ഇനി 30 മുതല്‍ 40 വരെ ആളുകളുടെ പരിശോധനാ ഫലങ്ങള്‍ ലഭിക്കാനുണ്ട്. കൂടുതല്‍ സമ്പര്‍ക്ക പരിശോധന ആവശ്യമാണെന്നും ഡോ. ജയശ്രീ പറഞ്ഞു. മെഹ്‌റൂഫ് വിദേശയാത്ര നടത്തിയിട്ടില്ലെന്ന് ഡിഎംഒ നാരായണന്‍ നായിക് മനോരമ ന്യൂസിനോടു പറഞ്ഞു. രണ്ടു ദിവസത്തിനകം കൃത്യമായ സൂചന ലഭിക്കുമെന്നും അദ്ദേഹം പറഞ്ഞു. ശ്വാസകോശ, വൃക്കരോഗങ്ങള്‍ക്കും രക്തസമ്മര്‍ദത്തിനും മെഹ്‌റൂഫ് ചികിത്സയിലായിരുന്നു.