മാണിയെവെട്ടി കോണ്‍ഗ്രസിലെ മൂന്ന് മന്ത്രിമാരാണ് കോടികള്‍ കൈപറ്റിയതെന്ന വെളിപ്പെടുത്തലുമായി ബാര്‍ ഉടമ ബിജുരമേശ് മജിസ്‌ട്രേറ്റിനുമുന്നില്‍ മൊഴികൊടുത്തതോടെ സര്‍ക്കാര്‍ കൂടുതല്‍ വെട്ടിലായി. കെബി ഗണേശ് കുമാറിന്റെ അഴിമതി ആരോപണത്തിന് വ്യക്തമായ മറുപടിയില്ലാതെ പൊതു മരാമത്ത് മന്ത്രി വികെ ഇബ്രാഹിംകുഞ്ഞ് ഇരുട്ടില്‍ തപ്പുകയാണ്. അടുത്ത് ബോംബുമായി പിസി ജോര്‍ജ്ജും കാത്തിരിക്കുന്നു. സോളാര്‍ക്കേസും സര്‍ക്കാരിന് എതിരെന്നാണ് സൂചന. കമ്മീഷന് മുന്നില്‍ എത്തുന്ന തെളിവുകളെല്ലാം മുഖ്യമന്ത്രിക്ക് എതിരാണ്. ഇതോട് സര്‍ക്കാര്‍ പ്രതിരോധത്തിലാവുകയാണ്. വിദേശ പര്യടനം കഴിഞ്ഞ തിരിച്ചെത്തുന്ന മുഖ്യമന്ത്രി ഉമ്മന്‍ചാണ്ടി ഇതിനെയെല്ലാം എങ്ങനെ നേരിടുമെന്നാണ് കേരളം ഉറ്റ് നോക്കുന്നത്.
ബാര്‍ കോഴയില്‍ എക്‌സൈസ് മന്ത്രി കെ.ബാബുവിനും മറ്റ് രണ്ട് മന്ത്രിമാര്‍ക്കെതിരെയും തെളിവു മജിസ്‌ട്രേറ്റിനുമുന്നില്‍ നല്‍കിയിട്ടുണ്ടെന്നാണ് ബിജു രമേശ് പറഞ്ഞത്. ബാറുടമകളുടെ പരസ്പര സംഭാഷണത്തിനപ്പുറം ശക്തമായ തെളിവുകള്‍ ബിജു രമേശ് മജിസ്‌ട്രേറ്റിനുമുന്നില്‍ നല്‍കിയിട്ടുണ്ടെന്നാണ് സൂചന. തന്നെ സ്വാധീനിക്കാന്‍ എത്തിയവരുടെ ദൃശ്യങ്ങളും ബിജുരമേശ് നല്‍കിയതായും റിപ്പോര്‍ട്ടുണ്ട്. എല്ലാത്തിനുപരി മജിസ്‌ട്രേട്ടിന് മുന്നില്‍ നല്‍കിയ മൊഴിയായതിനാല്‍ ആര്‍ക്കും തള്ളിക്കളയാനാകില്ല. നിയമ സാധുത ഏറെയുമാണ്. അങ്ങനെ വന്നാല്‍ കെ ബാബുവിനെതിരെ കേസുമെടുക്കേണ്ടിവരും.ബാബു അഴിമതി കാട്ടിയെന്ന് ആരോപണം ഉയരുമ്പോള്‍ മുഖ്യമന്ത്രി പ്രതിരോധത്തിലാകും.
മന്ത്രിസഭയില്‍ മുഖ്യമന്ത്രിയുടെ ഏറ്റവും അടുത്ത വിശ്വസ്തനായ ബാബുവിനെതിരായ ആരോപണം മുഖ്യമന്ത്രിയേയാണ് ബാധിക്കുന്നത്. ബാര്‍കോഴയില്‍ ആഭ്യന്തര മന്ത്രി രമേശ് ചെന്നിത്തലയും സമര്‍ത്ഥമായി കളിച്ചു മുന്നേറിയിരുന്നു. എന്നാല്‍ ചെന്നിത്തലയുടേയും ശിവകുമാറിന്റേയും പേര് കൂടി ബിജു രമേശ് പറഞ്ഞതോടെ കാര്യങ്ങള്‍ കൈവിട്ടുപോയി. അപ്പോഴും രമേശിനും ശിവകുമാറിനും നല്‍കിയത് പാര്‍ട്ടി ഫണ്ടാണെന്ന വ്യാഖ്യാനത്തിന് വഴിയുണ്ട്. എന്നാല്‍ ബാബു എക്‌സൈസ് മന്ത്രിയാണ്. അതുകൊണ്ട് തന്നെ ആ വാദം ഈ കേസില്‍ നടക്കുകയുമില്ല. പൊതുമരാമത്ത് മന്ത്രിക്കെതിരെ ഗണേശ്കുമാര്‍ ലോകായുക്തയ്ക്ക് നല്‍കിയ മൊഴിയില്‍ ഗുരുതരമായ ആരോപണങ്ങളാണ് ഉന്നയിച്ചിരിക്കുന്നത്. ഇത് കേരളാ കോണ്‍ഗ്രസിനു പുറമെ മുസഌം ലീഗിനെക്കൂടി വെട്ടിലാക്കുന്നുണ്ട്.
സോളാര്‍ തട്ടിപ്പ് കേസിലെ പ്രതി സരിത എസ്. നായരുമായി മുഖ്യമന്ത്രി കൂടിക്കാഴ്ച നടത്തിയതിന് കൂടുതല്‍ തെളിവുകള്‍ സോളാര്‍ കമ്മീഷന് മുന്നില്‍ റിപ്പോര്‍ട്ടര്‍ ടി.വി. മാനേജിങ് ഡയറക്ടര്‍ എം വി നികേഷ്‌കുമാര്‍ കൈമാറി. ഇതോടെ മുഖ്യമന്ത്രിയും ആരോപണത്തിന്റെ നിഴലിലായി. ചുരുക്കിപ്പറഞ്ഞാല്‍ സര്‍ക്കാര്‍ മുഴുവന്‍ അഴിമതിയില്‍ മുങ്ങിയെന്നതാണ് വ്യക്തമാകുന്നത്. എന്നാല്‍ ഇതിനെതിരെ പ്രതിപക്ഷം എന്ത് നിലപാട് സ്വീകരിക്കുമെന്നാണ് കേരളം ഉറ്റ് നോക്കുന്നത്. കഴിഞ്ഞ കാലങ്ങളില്‍ സര്‍ക്കാരിനെതിരെ പ്രതിപക്ഷം നയിച്ച എല്ലാ സമരങ്ങളും പൊളിഞ്ഞ് പോയിരുന്നു. ചാണക്യനായ മുഖ്യമന്ത്രി ഉമ്മന്‍ചാണ്ടിയിലാണ് യുഡിഎഫിന്റെ പ്രതീക്ഷ മുഴുവന്‍.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha