ഇടിവെട്ടിയവനെ പാമ്പ് കൂട്ടത്തോടെ കടിച്ചു എന്ന് കേട്ടിട്ടേ ഉള്ളൂ. എന്നാല്‍ അതിപ്പോള്‍ യാഥാര്‍ത്ഥ്യമായി. സോളാറും സരിതയും സര്‍ക്കാരിനെ മൂടോടെ പിഴുതെറിയും എന്ന് കരുതിയിരുന്നവരാണ് മലയാളികള്‍. എന്നാല്‍ ഉമ്മന്‍ചാണ്ടിയുടെ കുശാഗ്രബുദ്ധി അതെല്ലാം തച്ചുടച്ചുകളഞ്ഞു. നാമമാത്ര ഭൂരിപക്ഷത്തില്‍ നിന്നും സര്‍ക്കാരിനെ കാലാവധിയിലേക്ക് അടുപ്പിക്കാന്‍ കഴിഞ്ഞത് ഉമ്മന്‍ ചാണ്ടിയുടെ രാഷ്ട്രീയ പാടവം തന്നെയാണ്. അതിനിടെയാണ് ബാര്‍കോഴയും പിസി ജോര്‍ജ് പ്രശ്‌നവും വന്നത്.
പി.സി.ജോര്‍ജിനെ പുറത്താക്കിയില്ലെങ്കില്‍ മാണി പിണങ്ങും പുറത്താക്കിയാല്‍ ജോര്‍ജ് പിണങ്ങും, അങ്ങനെ ഒരു ധര്‍മ്മസങ്കടത്തിലാണ് ഉമ്മന്‍ ചാണ്ടി ഗള്‍ഫിലേക്ക് പറന്നത്. അപ്പോഴാണ് ഗുരുതരമായ ആരോപണങ്ങളുമായി ബിജു രമേശും കെ.ബി.ഗണേശ്കുമാറും കോടതികളില്‍ തെളിവു നല്‍കിയിരിക്കുന്നത്.
ബാര്‍കോഴയുമായി ബന്ധപ്പെട്ട് ബിജു രമേശ് നേരത്തെ ഉന്നയിച്ച ആരോപണങ്ങളുടെ തെളിവുകളാണ് മജിസ്‌ട്രേട്ട് കോടതിയില്‍ നല്‍കിയിട്ടുള്ളത്. ഇതുവരെ സര്‍ക്കാരിന്റെ നിയന്ത്രണത്തിലുള്ള അന്വേഷണ ഏജന്‍സിയായ വിജിലന്‍സിന് മുന്നിലായിരുന്നെങ്കില്‍ ഇപ്പോള്‍ ആ തെളിവുകള്‍ കോടതിക്ക് മുന്നിലെത്തിയിരിക്കുകയാണ്. അവയുടെ വ്യാപ്തിയും ആധികാരികതയും അനുസരിച്ചായിരിക്കും ബാര്‍കോഴക്കേസ് മുന്നോട്ട് നീങ്ങുക.
എക്‌സൈസ് മന്ത്രി കെ.ബാബുവിനെതിരെ തെളിവു നല്‍കിയിട്ടുണ്ടെന്നാണ് ബിജു രമേശ് എടുത്തു പറഞ്ഞിട്ടുള്ളത്. കൂടാതെ രമേശ് ചെന്നിത്തല, വിഎസ് ശിവകുമാര്‍ തുടങ്ങിയ മന്ത്രിമാര്‍ക്കെതിരെ കൂടി തെളിവ് നല്‍കിയെന്നാണ് സൂചന. ബാറുടമകളുടെ പരസ്പര സംഭാഷണത്തിനപ്പുറം ശക്തമായ തെളിവുകള്‍ ബിജു രമേശ് ഇന്നലെ നല്‍കിയിട്ടുണ്ടെങ്കില്‍ സ്ഥിതി ഗുരുതരമാവും.
പൊതുമരാമത്ത് മന്ത്രിക്കെതിരെ ഗണേശ്കുമാര്‍ ലോകായുക്തയ്ക്ക് നല്‍കിയ മൊഴിയും തുല്യഗൗരവമര്‍ഹിക്കുന്നു. കേരളാ കോണ്‍ഗ്രസിനു പുറമെ മുസ്‌ളീം ലീഗിനെക്കൂടി കുരുക്കിലാക്കുന്നതാണ് ഗണേശ് നല്‍കുന്ന തെളിവുകളും ഉന്നയിക്കുന്ന ആരോപണങ്ങളും. വയനാട്ടിലെ റോഡ് അപകടമുക്തമാക്കുന്നതിന് നല്‍കിയ കരാറിലെ അഴിമതിയാണ് ഉദാഹരണമായി ഗണേശ് കുമാര്‍ ചൂണ്ടിക്കാട്ടുന്നത്. മന്ത്രിയുടെ സ്വത്തിന്റെ ഉറവിടം അന്വേഷിക്കണമെന്നും അദ്ദേഹം ആവശ്യപ്പെടുന്നു.
കാര്യമായ ജോലിയൊന്നും ചെയ്തിട്ടില്ലാത്ത മന്ത്രി എങ്ങനെ ഇത്ര സ്വത്ത് വാരിക്കൂട്ടി എന്നാണ് ഗണേശിന്റെ ചോദ്യം. 
എന്തായാലും വ്യാഴാഴ്ച മടങ്ങിയെത്തുന്ന ഉമ്മന്‍ചാണ്ടിയെ കാത്തിരിക്കുന്നത് ഉറക്കമില്ലാത്ത രാവുകളാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha