ബാര്‍കോഴ ആരോപണത്തില്‍ നിന്ന് ആഭ്യന്തര മന്ത്രി രമേശ് ചെന്നിത്തലയെ ഒഴിവാക്കാന്‍ വിജിലന്‍സില്‍ ഉന്നതതല നീക്കം ആരംഭിച്ചു. നിലവില്‍ ബാര്‍ കോഴയില്‍ ക്വിക്ക് വെരിഫിക്കേഷന്‍ ആവശ്യമില്ലാത്ത സ്ഥിതിയാണുള്ളത്. മാണിക്കെതിരെ പരാതി ഉയര്‍ന്നപ്പോള്‍ തന്നെ ക്വിക്ക് വെരിഫിക്കേഷന്‍ നടത്തിയതുമാണ്. അതുകൊണ്ട് തന്നെ ബിജു രമേശ് മജിസ്‌ട്രേട്ടിന് മുന്നില്‍ നല്‍കിയ പുതിയ മൊഴി അനുസരിച്ച് ആരോപണമുന്നയിച്ച മന്ത്രിമാര്‍ക്കെതിരെ നേരിട്ട് കേസെടുക്കാം.164ാം വകുപ്പ് പ്രകാരമാണ് ബിജു രമേശിന്റെ മൊഴി മജിസ്‌ട്രേട്ട് കോടതി രേഖപ്പെടുത്തിയത്. ബിജു രമേശ് മൊഴി നല്‍കിയത് നേരത്തെ ക്വിക്ക് വരിഫിക്കേഷന്‍ നടത്തിയ കേസാണിത്. അതുകൊണ്ട് തന്നെ പുതിയ വെളിപ്പെടുത്തല്‍ അനുസരിച്ച് ആഭ്യന്തര മന്ത്രി രമേശ് ചെന്നിത്തലയേയും എക്‌സൈസ് മന്ത്രി കെ ബാബുവിനേയും ആരോഗ്യമന്ത്രി വി എസ് ശിവകുമാറനേയും എഫ്‌ഐആറില്‍ പ്രതിചേര്‍ക്കേണ്ട സാഹചര്യമാണ നിലവിലുള്ളത്. ഇത് ഒഴിവാക്കാനാണ് പുതിയ തന്ത്രം.
പ്രതിപക്ഷ നേതാവ് വി എസ് അച്യുതാനന്ദന്‍ നല്‍കി പരാതിയിലാണ് വിജിലന്‍സ് മാണിക്ക് എതിരെ ക്വിക്ക് വെരിഫിക്കേഷന്‍ നടത്തിയത്. അതിന്റെ തുടര്‍ച്ചയായിരുന്നു ബിജു രമേശിന്റെ മൊഴി നല്‍കല്‍. ഈ സാഹചര്യത്തില്‍ ചെന്നിത്തലയ്ക്കും ബാബുവിനും ശിവകുമാറിനും എതിരെയുള്ള പരാതിയില്‍ പുതിയ കേസ് രജിസ്റ്റര്‍ ചെയ്യാനാണ് നീക്കം. അങ്ങനെ വന്നാല്‍ അവര്‍ക്കെതിരായ ആക്ഷേപങ്ങളിലും ക്വിക്ക് വെരിഫിക്കേഷന്‍ നടത്താം. ഇതിനും പ്രതിപക്ഷ നേതാവ് വി എസ് അച്യുതാനന്ദന്റെ പരാതി തന്നെയാണ് കരുത്ത്. ഈ പരാതിയില്‍ പുതിയ കേസ് എന്ന നിലയില്‍ ക്വിക്ക് വെരിഫിക്കേഷന്‍ നടത്താനാണ് നീക്കം. രണ്ട് ദിവസം മുമ്പാണ് ചെന്നിത്തലയ്ക്കും ബാബുവിനും ശിവകുമാറിനുമെതിരെ വി എസ് വിജിലന്‍സിന് പുതിയ പരാതി നല്‍കിയത്.
ബാര്‍ കോഴയില്‍ വിഎസിന്റെ കത്ത് കിട്ടിയപ്പോള്‍ തന്നെ വിജിലന്‍സ് നിയമോപദേശം തേടിയിരുന്നു. മാണിക്കെതിരായ ബാര്‍ കോഴയില്‍ ഇനി ക്വിക്ക് വെരിഫിക്കേഷന്‍ സാധ്യമല്ലെന്നായിരുന്നു നിയമോപദേശം. ഒരു കേസില്‍ ഒരു തവണ മാത്രം ക്വിക്ക് വെരിഫിക്കേഷന്‍ എന്നതാണ് രീതി. ഈ സാഹചര്യത്തിലാണ് പുതിയ കേസ് രജിസ്റ്റര്‍ ചെയ്ത് മറ്റൊരു ക്വിക്ക് വെരിഫിക്കേഷനുള്ള ശ്രമം. എഫ്‌ഐആറില്‍ പേരുവന്നാല്‍ മന്ത്രിയായി തുടരുന്നത് ചെന്നിത്തലയ്ക്ക് തടസ്സമാകും. ക്ലീന്‍ ഇമേജുമായി മുഖ്യമന്ത്രി പദം ലക്ഷ്യമിട്ട് നീങ്ങിയ ചെന്നിത്തലയ്ക്ക് അധികാര മോഹിയെന്ന പേരു മാത്രമേ ഇതിലൂടെ ലഭിക്കൂ. ഈ സാഹചര്യത്തിലാണ് തിരിക്കിട്ട കള്ളക്കളികള്‍ നടക്കുന്നത്.
അച്യുതാനന്ദന്റെ പരാതിയില്‍ ക്വിക്ക് വെരിഫിക്കേഷന്‍ നടത്തി ചെന്നിത്തലയേയും ശിവകുമാറിനേയും ഒഴിവാക്കാനാണ് നീക്കം. ക്വിക്ക് വെരിഫിക്കേഷന് ഒടുവില്‍ ഇവരെ പ്രതിചേര്‍ക്കാന്‍ തെളിവുകളില്ലെന്ന നിലപാടില്‍ വിജിലന്‍സിന് എത്താം. ഈ സാഹചര്യം ഉണ്ടാക്കിയെടുക്കാനാണ് കള്ളക്കളി. ചെന്നിത്തലയ്ക്കും ശിവകുമാറിനുമെതിരെ രാഷ്ട്രീയ ഗൂഡാലോചനയുടെ പേരിലാണ് ആക്ഷേപമെന്ന് വരുത്താനാണ് നീക്കം. ബിജു രമേശിന്റെ മൊഴിയല്ലാതെ ഇവര്‍ക്കെതിരെ ഒരു തെളിവും കിട്ടില്ലെന്നാണ് വിജിലന്‍സിന്റെ നിഗമനം. എന്നാല്‍ എക്‌സൈസ് മന്ത്രി കൂടിയായ ബാബുവിനെതിരായ പരാമര്‍ശങ്ങള്‍ അഴിമതിയുടെ പരിധിയില്‍ വരും. അതുകൊണ്ട് ബാബുവിനെ പ്രതിചേര്‍ക്കേണ്ട സാഹചര്യവുമുണ്ട്. ഏതായാലും കരുതലോടെ മാത്രമേ കോണ്‍ഗ്രസ് മന്ത്രിമാര്‍ക്ക് എതിരായ ആരോപണങ്ങളില്‍ തീരുമാനം എടുക്കൂ.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha