ഇതൊരര്‍ത്ഥത്തില്‍ സര്‍ക്കാരിന്റെ സൂപ്പര്‍ പണിയാണെന്ന് വേണമെങ്കില്‍ പറയാം. പൂട്ടിയ 418 ബാറുകള്‍ തുറക്കരുതെന്ന് ശക്തമായ നിലപാടിലായിരുന്നു കെപിസിസി പ്രസിഡന്റ് വിഎം സുധീരന്‍. ഒന്നിലും സുധീരന്‍ വഴങ്ങില്ലെന്ന് കണ്ടതോടെ സമ്പൂര്‍ണ മദ്യ നിരോധനത്തിനായി ഉമ്മന്‍ചാണ്ടി മുന്‍കൈയ്യെടുത്തു. തുടര്‍ന്നാണ് ഫൈവ് സ്റ്റാര്‍ ഒഴികേയുള്ള ബാറുകള്‍ പൂട്ടാനായുള്ള ഉമ്മന്‍ചാണ്ടിയുടെ നിര്‍ദ്ദേശം വന്നത്.
ഇതോടെ ബാര്‍ വിഷയത്തില്‍ ജയിക്കാനായി സര്‍ക്കാരിനെ ഒടിക്കാതെ വളയ്ക്കാനായിരുന്നു ലക്ഷ്യം. കോണ്‍ഗ്രസ് മന്ത്രിമാരുടെ കോഴവിവരം മനപൂര്‍വം ഒളിപ്പിച്ച് ഘടകകക്ഷിനേതാവായ മാണിയുടെ പേര് എടുത്തിടുകയും ചെയ്തു.
സര്‍ക്കാരിനെ സമ്മര്‍ദ്ദത്തിലാക്കുകയായിരുന്നു ലക്ഷ്യം. എന്നാല്‍ ധനമന്ത്രി കെ എം മാണിക്കെതിരായ ആരോപണം കൈവിട്ടുപോയപ്പോള്‍ ബാറുടമകളില്‍ ഭിന്നതയും തുടങ്ങി. സര്‍ക്കാരിനെ പിണക്കുന്നത് ശരിയല്ലെന്ന നിലപാടിലായിരുന്നു പലരും.
പ്രബലനായ മന്ത്രി ബാര്‍ കോഴയില്‍ കുടുങ്ങി സര്‍ക്കാര്‍ തന്നെ ആടിയുലഞ്ഞപ്പോള്‍ മദ്യനയം തിരുത്താന്‍ സര്‍ക്കാര്‍ തീരുമാനിച്ചു. അങ്ങനെ സമ്പൂര്‍ണ്ണ മദ്യ നിരോധനം സര്‍ക്കാരിന്റെ ലക്ഷ്യമല്ലെന്ന് കോടതിയില്‍ അഡ്വക്കേറ്റ് കപില്‍ സിബല്‍ വാദിക്കുക കൂടി ചെയ്തതോടെ ബാറുടമകള്‍ ആഹ്ലാദത്തിലായി. എന്തുവന്നാലും കേസ് ജയിക്കുമെന്ന് അവര്‍ കരുതി. 
ഇങ്ങനെ ബാര്‍ ഉടമകള്‍ക്ക് അനുകൂലമായി സര്‍ക്കാര്‍ നിലപാടെടുത്തപ്പോഴും സര്‍ക്കാരിനെ വെള്ളം കുടിപ്പിക്കാനാണ് ചില ബാര്‍ മുതലാളിമാര്‍ ചെയ്തത്. രമേഷ് ചെന്നിത്തല, കെ. ബാബു, വി.എസ്. ശിവകുമാര്‍ തുടങ്ങിയ മന്ത്രിമാര്‍ക്കെതിരെ ആരോപണവുമായി രംഗത്തെത്തി.
എന്നാല്‍ സര്‍ക്കാരിന്റെ മധുര പ്രതികാരം എന്നോണം കോടതി വിധിയും വന്നു. തങ്ങള്‍ക്കിട്ട് പണിത ബാര്‍ ഉടമകള്‍ക്ക് സൂപ്പര്‍ പണി.
ബാറുടമകളില്‍ നിന്നും പണം പിരിച്ച് കേസ് നടത്തിയ ബാര്‍ മുതലാളിമാര്‍ ഇപ്പോള്‍ അങ്കലാപ്പിലാണ്. ലക്ഷക്കണക്കിന് രൂപ ഓരോരുത്തരും കൊടുത്തു. എന്തു ചെയ്തു എന്നതിന് പോലും കണക്കില്ല. മന്ത്രിമാര്‍ക്കൊന്നും പണം കിട്ടിയില്ലെന്ന് അവര്‍ പരസ്യമായി പറയുന്നു.
ഇപ്പോള്‍ ബാര്‍ ഉടമകള്‍ ധര്‍മ്മസങ്കടത്തിലാണ്. കോടികള്‍ പിരിച്ച് നല്‍കിയ കാശും പോയി. ബാറുകളും പൂട്ടി. ഈ സന്ദര്‍ഭത്തില്‍ സര്‍ക്കാരിനെതിരെ ശക്തമായ തെളിവുകളുമായി പലരും രംഗത്തെത്തും. ഇത് തലവേദനയാകുന്നത് കോണ്‍ഗ്രസ് മന്ത്രിമാര്‍ക്കായിരിക്കും. രമേശ് ചെന്നിത്തല അടക്കമുള്ളവര്‍ ഇപ്പോള്‍ കോഴയുടെ നിഴലിലാണ്. മന്ത്രി ബാബുവിന് നേരിട്ട് കോഴ നല്‍കിയെന്ന് ബിജു രമേശ് പറയുന്നു. ഇത് കണ്ടെന്ന് ഇനിയും ബാറുടമകള്‍ പറഞ്ഞാല്‍ ബാബു പ്രതിരോധത്തിലാകും. മറ്റ് മന്ത്രിമാരും. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha