വിക്ടേഴ്‌സ് ചാനലില്‍ ഏഴാം ക്ലാസിലെ ഗണിതശാസ്ത്രം ക്ലാസിലൂടെ ശ്രദ്ധേയനായ അധ്യാപകന് രാത്രി തോട്ടില്‍ വീണ് ദാരുണാന്ത്യം. വിതുര ഗവ. യുപിഎസ് അധ്യാപകന്‍ നന്ദിയോട് പയറ്റടി ഓട്ടുപാലം അത്തത്തില്‍ ജി.ബിനുകുമാറിനെ (44) വീട്ടില്‍നിന്ന് ഒന്നര കിലോമീറ്റര്‍ അകലെ പുരയിടത്തിലാണു ഇന്നലെ മരിച്ചനിലയില്‍ കണ്ടെത്തിയത്

വീടിനു സമീപത്ത് പാലത്തില്‍ കയറുമ്പോള്‍ കാല്‍ വഴുതി വീണു ഒഴുകിയെത്തിയതാണെന്നു കരുതുന്നു. തലയുടെ പിന്‍ഭാഗത്ത് മുറിവുണ്ട്. വെള്ളിയാഴ്ച പുറത്തു പോയ ബിനു രാത്രി വൈകിയും വീട്ടിലെത്താത്തതിനെത്തുടര്‍ന്ന് അന്വേഷിച്ചപ്പോള്‍ രാത്രി 9 മണിയോടെ സുഹൃത്തായ പാരലല്‍ കോളജ് പ്രിന്‍സിപ്പല്‍ വീടിനു സമീപത്തായി തോട്ടിന്‍കരയില്‍ കൊണ്ടാക്കി മടങ്ങിയെന്ന് വിവരം ലഭിച്ചു.

നന്ദിയോട് പച്ച പയറ്റടി ഓട്ടുപാലത്തില്‍ രാത്രി 9 മണിക്ക് സുഹൃത്തിന്റെ ബൈക്കില്‍ നിന്ന് ഇറങ്ങിയ ബിനുകുമാറിന് വീട്ടിലെത്താന്‍ വേണ്ടത് 200 മീറ്റര്‍ മാത്രം. മധ്യത്തിലായി കൂലംകുത്തി ഒഴുകുന്ന തോടിനു കുറുകെ നടപ്പാലമുണ്ട്. നൂറു മീറ്ററോളം തോടിന്റെ അരികിലൂടെയാണ് വഴി. തോട്ടിനിരികില്‍ കൂടി നടക്കുമ്പോഴോ, അതോ പാലം കടക്കുമ്പൊഴോ, എപ്പൊഴാണ് പിഴയ്ക്കാത്ത കണക്കുകളില്‍ കേമനായിരുന്ന ഈ ഗണിതാധ്യാപകന് ചുവടുകളുടെ കണക്കു പിഴച്ചത്. ഉത്തരമില്ലാത്ത ചോദ്യം

കൂട്ടുകാരുടെ സംഘത്തില്‍ നിന്ന് പിരിഞ്ഞ് ബിനു എത്തുമ്പോഴും കനത്ത മഴയ്ക്കു ശേഷമുള്ള ചാറ്റല്‍ തുടര്‍ന്നിരുന്നു. റോഡില്‍ ചളിയും തോട്ടില്‍ കുത്തൊഴുക്കും. തെരുവ് വിളക്ക് ഇല്ലാത്തഭാഗം, കുറ്റാക്കുറ്റിരുട്ട്.. പാലത്തിലേക്ക് കയറുന്ന ഭാഗത്ത് വിടവുണ്ട്. ഇതില്‍ കാല്‍ അകപ്പെട്ടു വീണതാവാമെന്നും പൊലീസ് കരുതുന്നു.

ഒന്നര മണിക്കൂര്‍ കഴിഞ്ഞാണ് ബിനു എത്താത്തതിനെച്ചൊല്ലി വീട്ടില്‍ സംശയമുയര്‍ന്നത്. വീട്ടിനടുത്ത് സുഹൃത്ത് കൊണ്ടു വിട്ടു എന്ന വിവരം ലഭിച്ചതോടെ അപകടത്തെപ്പറ്റി ആശങ്കയായി. ആദ്യം പാലോട് പൊലീസും പിന്നീട് ഫയര്‍ഫോഴ്‌സും തോട്ടിലിറങ്ങി തിരഞ്ഞു. പക്ഷേ വീഴ്ചയില്‍ ഒഴുക്കിലകപ്പെട്ട ബിനു അപ്പൊഴേക്കും വീടിനടുത്തു ബൈക്കിറങ്ങിയ സ്ഥലത്തു നിന്ന് രണ്ടു കിലോമീറ്ററിലേറെ ഒഴുകിപ്പോയിരുന്നു.

രാത്രി നാട്ടുകാരും അഗ്‌നിശമന സേനാംഗങ്ങളും അടക്കം തിരച്ചില്‍ നടത്തിയെങ്കിലും ഫലമുണ്ടായില്ല.ഇന്നലെ രാവിലെയാണ് മൃതദേഹം കണ്ടെത്തിയത്. സ്വകാര്യ സ്‌കൂളിലെ അധ്യാപിക കൃഷ്ണപ്രിയ ആണ് ഭാര്യ: മകള്‍: എട്ടാം ക്ലാസ് വിദ്യാര്‍ഥി ദേവനന്ദ.വ്യാഴാഴ്ച വിക്ടേഴ്‌സ് ചാനലില്‍ ഏഴാം ക്ലാസ് ഗണിതത്തില്‍ ബിനു എടുത്ത ക്ലാസിന്റെ പുനഃസംപ്രേഷണം ഇന്ന് വൈകിട്ട് നാലിനാണ്.