ആഭ്യന്തര സംഘര്‍ഷം രൂക്ഷമായ യെമനില്‍ നിന്നും മലയാളികള്‍ അടക്കമുള്ള ഇന്ത്യക്കാരെയും കൊണ്ടുള്ള ആദ്യ വിമാനം നെടുമ്പാശ്ശേരിയിലെത്തി. യെമനില്‍ നിന്നും ആഫ്രിക്കന്‍ രാജ്യമായ ജിബൂട്ടിയില്‍ എത്തിച്ച് അവിടെ നിന്നുമാണ് വിമാനത്തില്‍ മലയാളികള്‍ അടക്കം 168 പേരെ കൊച്ചിയില്‍ എത്തിച്ചത്. ഇന്നു പുലര്‍ച്ചെ 1.45നാണ് വ്യോമസേനയുടെ സി 17 ഗ്ലോബ് മാസ്റ്റര്‍ വിമാനത്തില്‍ യുദ്ധഭൂമിയില്‍ നിന്നും അവര്‍ നാടിന്റെ സുരക്ഷിതത്വത്തിലേക്ക് പറന്നിറങ്ങിയത്.
ജിബൂട്ടിയിലേക്ക് കപ്പല്‍ മാര്‍ഗമെത്തിച്ച ഇവരെയും വഹിച്ചു കൊണ്ടുള്ള വിമാനം ഇന്ത്യന്‍ സമയം 9.10 നാണു ജിബൂട്ടിയില്‍ നിന്നു പുറപ്പെട്ടത്. ആദ്യം കൊച്ചിയിലേക്കുള്ള വിമാനമാണ് പുറപ്പെട്ടത്. രാത്രി എട്ടോടെ വിമാനം എത്തിച്ചേരുമെന്നാണ് ആദ്യം അറിയിച്ചിരുന്നത്. ഇതനുസരിച്ച് ബന്ധുക്കള്‍ അടക്കമുള്ള വന്‍ സംഘം വിമാനത്താവളത്തില്‍ എത്തിയിരുന്നു.
തിരികെ എത്തുന്നവരെ സ്വീകരിക്കാന്‍ മന്ത്രിമാരായ കെ.സി. ജോസഫ്, വി.കെ. ഇബ്രാഹിംകുഞ്ഞ് , കെ. ബാബുഎന്നിവരുടെ നേതൃത്വത്തില്‍ സര്‍ക്കാര്‍ സംഘവും വിമാനത്താവളത്തില്‍ എത്തിയിരുന്നു. അന്‍വര്‍ സാദത്ത് എംഎല്‍എ, ജില്ലാ കലക്ടര്‍ എം.ജി. രാജമാണിക്യം തുടങ്ങിയവരും വിമാനത്താവളത്തില്‍ എത്തി. ഇന്ത്യന്‍ വിമാനങ്ങള്‍ക്ക് സനയിലേക്കു പോകാന്‍ ഇതുവരെ അനുമതി ലഭിച്ചിട്ടില്ലെന്നു മന്ത്രി കെ.സി. ജോസഫ് പറഞ്ഞു.
ഇന്ത്യന്‍ പ്രധാനമന്ത്രി തന്നെ സൗദി ഭരണാധികാരികളോട് ഇന്ത്യന്‍ വിമാനങ്ങളുടെ യാത്രാ തടസ്സം നീക്കാനുള്ള നടപടികള്‍ എടുക്കണമെന്ന് ആവശ്യപ്പെട്ടിട്ടുണ്ട്. സൗദി ഭരണാധികാരികളുമായി നിരന്തരം ആശയ വിനിമയം പുലര്‍ത്തുന്നുണ്ടെന്നും കെ.സി. ജോസഫ് പറഞ്ഞു. മടങ്ങിയെത്തിയവര്‍ക്ക് സഹായധനമായി 2000 രൂപ വീതം നോര്‍ക്ക വിതരണം ചെയ്തു.ഇന്ത്യക്കാരെ രക്ഷപെടുത്തുക എന്ന ദൗത്യവുമായി മന്ത്രി വി കെ സിംഗും യെമനില്‍ എത്തിയിട്ടുണ്ട്. പ്രധാനമന്ത്രി മോദിയുടെ പ്രത്യേക നിര്‍ദേശപ്രകാരമാണ് സിങ് യെമനില്‍ എത്തിയത്.
അതേസമയം, ഇന്ത്യക്കാരെ കൊണ്ടുവരാനുള്ള എയര്‍ഇന്ത്യ വിമാനങ്ങള്‍ക്ക് മൂന്നാം ദിനവും യമന്റെ തലസ്ഥാന നഗരമായ സനയിലേക്ക് പറക്കാന്‍ അനുമതി ലഭിച്ചില്ല. രക്ഷാപ്രവര്‍ത്തനത്തിനായി അയച്ച രണ്ട് എയര്‍ബസ് എ320 വിമാനങ്ങള്‍ ജിബൂട്ടിയിലാണുള്ളത്. മസ്‌കത്തിലായിരുന്ന വിമാനങ്ങള്‍ ചൊവ്വാഴ്ച അര്‍ധരാത്രിയോടെയാണ് ജിബൂട്ടിയിലെ അമ്പൂലി വിമാനത്താവളത്തിലേക്ക് പുറപ്പെട്ടത്.
 പോരാട്ടം രൂക്ഷമായ യെമനിലെ ഏദനില്‍ നിന്ന് 350 ഇന്ത്യക്കാരെ ചൊവ്വാഴ്ച രാത്രിയോടെ കപ്പല്‍ മാര്‍ഗം ജിബൂട്ടിയില്‍ എത്തിക്കുകയായിരുന്നു. \'ഓപറേഷന്‍ റാഹത്ത്\' എന്നുപേരിട്ട രക്ഷാപ്രവര്‍ത്തനത്തിന്റെ ഭാഗമായി നാവികസേനാ നിരീക്ഷണ കപ്പലായ ഐ.എന്‍.എസ് സുമിത്രയില്‍ ഇവരെ ജിബൂട്ടിയിലും തുടര്‍ന്ന് വ്യോമസേനാ വിമാനത്തില്‍ മുംബൈയിലും കൊച്ചിയിലും എത്തിക്കുകയായിരുന്നു.
ഏതാണ്ട് 500നും 1,000ത്തിനുമിടയില്‍ ഇന്ത്യക്കാര്‍ മാത്രമാണ് ഏദനില്‍ നേരത്തേ ഉണ്ടായിരുന്നത്. ശേഷിക്കുന്നവരെ ഒഴിപ്പിക്കാന്‍ കപ്പല്‍ ഏദനിലേക്ക് തിരിച്ചുപോകാനിടയുണ്ടെന്നും സൂചനകളുണ്ട്. യമനില്‍ ഏറ്റവുമധികം ഇന്ത്യക്കാര്‍ താമസിക്കുന്നത് സനയിലാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha