പ്രമുഖ വസ്ത്ര വിതരണ ബ്രാന്‍ഡായ ഫാബ് ഇന്ത്യയുടെ ഗോവയിലെ ഷോറൂമിലെ ട്രയല്‍ റൂമില്‍ (വസ്ത്രങ്ങള്‍ പാകമാണോയെന്ന് ധരിച്ചു നോക്കുന്ന മുറി) ഒളിക്യാമറ കണ്ടെത്തിയതിനെ തുടര്‍ന്ന് കേന്ദ്ര മാനവശേഷി മന്ത്രി സ്മൃതി ഇറാനിയുടെ പരാതിയില്‍ പൊലീസ് കേസെടുത്തു. ബി.ജെ.പി ഭരിക്കുന്ന ഗോവയിലെ കാന്‍ഡോലിമ്മിലെ ഷോറൂമില്‍ എത്തിയപ്പോഴായിരുന്നു സ്മൃതിക്ക് ഈ ദുരനുഭവം ഉണ്ടായത്. 
കുടുംബത്തിനൊപ്പം അവധി ദിവസം ചെലവഴിക്കാന്‍ ഗോവയില്‍ എത്തിയതായിരുന്നു സ്മൃതി. വസ്ത്രങ്ങള്‍ തിരഞ്ഞെടുത്ത ശേഷം പാകമാണോയെന്ന് ധരിച്ച് നോക്കാനായി ട്രയല്‍ റൂമിലേക്ക് കയറിയപ്പോഴായിരുന്നു ക്യാമറ കണ്ടെത്തിയത്. ഉടന്‍ തന്നെ അവര്‍ വിവരം തന്റെ ഭര്‍ത്താവും ബിസിനസുകാരനുമായ സുബിന്‍ ഇറാനിയെ വിളിച്ചറിയിച്ചു. സുബിന്‍, പെട്ടെന്ന് തന്നെ വിവരം ഗോവയിലെ ബി.ജെ.പി എം.എല്‍.എ മൈക്കേല്‍ ലോബോയെ അറിയിച്ചു. ഉടന്‍ തന്നെ ലോബ പൊലീസുമായി വസ്ത്രക്കടയിലെത്തി പരിശോധന നടത്തി. പരിശോധനയില്‍ ക്യാമറ കണ്ടെത്തുകയും ചെയ്തു. നേരത്തെയും പലരുടേയും ദൃശ്യങ്ങള്‍ ക്യാമറയില്‍ പതിഞ്ഞിരുന്നതായി കണ്ടെത്തി. വയറിന് മുകളിലേക്കുള്ള ഭാഗങ്ങളാണ് ക്യാമറയില്‍ പതിഞ്ഞിരിക്കുന്നതെന്ന് ലോബോ പിന്നീട് മാദ്ധ്യമങ്ങളോട് പറഞ്ഞു. 
നാലു മാസം മുമ്പാണ് മുറിയില്‍ ക്യാമറ സ്ഥാപിച്ചത് എന്ന് കടയിലെ ജീവനക്കാരില്‍ നിന്ന് അറിയാനായി. മുറിക്ക് പുറത്താണ് ക്യാമറ സ്ഥാപിച്ചിരുന്നതെങ്കിലും ലെന്‍സ് ഉള്ളിലെ ദൃശ്യങ്ങള്‍ കാണാന്‍ കഴിയുന്ന തരത്തിലാണ് വച്ചിരുന്നത്. മാനേജറുടെ ഓഫീസിലെ കംപ്യൂട്ടറിലാണ് ക്യാമറയില്‍ നിന്നുള്ള ദൃശ്യങ്ങള്‍ ശേഖരിച്ചിരുന്നത്. പലരുടേയും ദൃശ്യങ്ങള്‍ കംപ്യൂട്ടറില്‍ കാണാനായതായി പൊലീസ് പറഞ്ഞു. മാനേജരെ കുറിച്ച് ചോദിച്ചപ്പോള്‍ അവധിയിലാണ് എന്ന മറുപടിയാണ് ജീവനക്കാര്‍ നല്‍കിയത്. 
സ്മൃതിയുടെ മൊഴി രേഖപ്പെടുത്തിയ പൊലീസ്, സ്ത്രീത്വത്തെ അപമാനിച്ച വകുപ്പ് പ്രകാരം പ്രഥമ വിവര റിപ്പോര്‍ട്ട് ഫയല്‍ ചെയ്തിട്ടുണ്ട്. കട പൊലീസ് സീല്‍ ചെയ്യുകയും ചെയ്തു. 
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha