നിസാമിന്റെ ഭാര്യ അമലിനെ കേസില്‍ രക്ഷിച്ചത് ഉന്നത ബന്ധമുള്ള അമലിന്റെ വീട്ടുകാര്‍
നിസാമിന്റെ ഭാര്യ അമലിനെ കേസില്‍ രക്ഷിച്ചത് ഉന്നത രാഷ്ടീയ ഉദ്യോഗസ്ഥ ബന്ധമുള്ള അമനിന്റെ വീട്ടുകാരാണെന്ന് സൂചന. കേരളത്തിലും അന്യ സംസ്ഥാനങ്ങളിലും നല്ല വേരുകളുള്ള ബില്‍ഡര്‍മാരാണ് അമല്‍ നിസാമിന്റെ കുടുംബം. രാഷ്ട്രീയ സ്വാധീനമാണോ കേസില്‍ നിന്നും അമലിനെ ഒഴിവാക്കാന്‍ കാരണമെന്നത് ഇനിയും വ്യക്തമായിട്ടില്ല. അമലിനെ കേസിലെ പ്രധാന സാക്ഷിയാക്കിയാണ് കഴിഞ്ഞ ദിവസം അന്വേഷണ സംഘം കുറ്റപത്രം സമര്‍പ്പിച്ചത്. പൊലീസിന്റെ കണക്കില്‍ അമല്‍ ഇപ്പോള്‍ വാദി ഭാഗം സാക്ഷിയാണ്. 164 പ്രകാരം മൊഴി നല്കിയതിനാല്‍ ഇനി അവരത് മാറ്റി പറഞ്ഞാല്‍ കോടതിയലക്ഷ്യമാകുമെന്നതിനാല്‍ അവര്‍ ഇനി അതിന് മുതിര്‍ന്നേക്കില്ലെന്നാണ് പൊലീസിലെ ഉന്നത വൃത്തങ്ങള്‍ നല്കുന്ന സൂചന.
നിസാം ചന്ദ്രബോസിനെ മര്‍ദ്ദിക്കുന്നത് താന്‍നേരിട്ട് കണ്ടു എന്നാണ് അമല്‍ പൊലീസിന് മുന്‍പാകെ നല്‍കിയിരിക്കുന്ന മൊഴി. ഇത് മാറ്റി പറയാതിരിക്കാന്‍ മജിസ്‌ട്രേറ്റ് മുന്‍പാകെ 164 വകുപ്പ് പ്രകാരവും മൊഴി രേഖപ്പെടുത്തിയിരുന്നു.
ചന്ദ്രബോസിനെ നിസാം മര്‍ദ്ദിക്കുന്ന സമയത്ത് എല്ലാറ്റിനും ഒത്താശ ചെയ്ത് അമല്‍ കൂടിയായിരുന്നു എന്ന നിലയിലാണ് ആദ്യഘട്ടത്തില്‍ വാര്‍ത്തകള്‍ പുറത്ത് വന്നത്. പൊലീസും തുടക്കത്തില്‍ ഇതെല്ലാം ശരി വച്ചു. ചന്ദ്രബോസിനെ വെടി വെയ്ക്കാന്‍ തോക്ക് എടുത്ത് അമല്‍ കൊണ്ട് വന്നു എന്ന് വരെ ആ സമയത്ത് വാര്‍ത്തകള്‍ ഉണ്ടായിരുന്നു.
സംഭവത്തിന് ശേഷം ഒളിവില്‍ പോയ അമല്‍ പിന്നീട് വളരെ നാളുകള്‍ക്ക് ശേഷമാണ് പൊലീസില്‍ കീഴടങ്ങി മൊഴി നല്കിയത്. അമലിനെ കേസില്‍ പ്രതിയാക്കരുതെന്ന് മുഹമ്മദ് നിസാം തൃശൂര്‍ കമ്മീഷണര്‍ ആയിരുന്ന ജേക്കബ് ജോബിനോട് പറഞ്ഞതായും പിന്നീട് വാര്‍ത്തകള്‍ വന്നു. ഈ റിപ്പോര്‍ട്ടുകള്‍ എല്ലാം ശരി വയ്ക്കുന്ന തരത്തില്‍ ആണ് അന്വേഷണ സംഘം കോടതിയില്‍ അമലിനെ സാക്ഷി പട്ടികയില്‍ ഉള്‍പ്പെടുത്തി നിസാമിനെതിരായ കുറ്റപത്രം സമര്‍പ്പിച്ചിരിക്കുന്നത്. അമലും നിസാമും തമ്മില്‍ അടുത്തിടെയായി തീരെ സ്വര ചേര്‍ച്ചയില്ലായിരുന്നു എന്നും നിസാമിന്റെ ചില ബന്ധങ്ങള്‍ അമലിനെവല്ലാതെ ചൊടിപ്പിച്ചിരുന്നതായും ചില കേന്ദ്രങ്ങളില്‍ നിന്നും സ്ഥിരീകരിക്കാത്ത റിപ്പോര്‍ട്ടുകളുണ്ട്. നിസാമിനെതിരെ അമല്‍ നിയമ നടപടി സ്വീകരിക്കാന്‍ ഒരുങ്ങി നില്ക്കുകയായിരുന്നു എന്നാണ് പറയപ്പെടുന്നത്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
