കേന്ദ്ര മന്ത്രിസഭാ പുന:സംഘടനയ്ക്ക് മുന്നോടിയായി എഐസിസി പ്രവര്‍ത്തക സമിതി പുന:സംഘടിപ്പിച്ചു. കേന്ദ്ര പ്രതിരോധ മന്ത്രി എ കെ ആന്റണി 21 അംഗ പ്രവര്‍ത്തക സമിതിയില്‍ തുടരും. മുന്‍ മന്ത്രി സി പി ജോഷിയെയും പ്രവര്‍ത്തക സമിതിയില്‍ ഉള്‍പ്പെടുത്തി. കേരളത്തില്‍ നിന്ന് വി ഡി സതീശന്‍ എഐസിസി സെക്രട്ടറിയായി. സോണിയ ഗാന്ധിയുടെ രാഷ്ട്രീയകാര്യ സെക്രട്ടറിയായി അഹമ്മദ് പട്ടേലും തുടരും. ദിഗ് വിജയ് സിങ്ങും അജയ് മാക്കനും സിപി ജോഷിയും പ്രവര്‍ത്തകസമിതിയിലുണ്ട്. രാഹുല്‍ ഗാന്ധി പോഷകസംഘടനകളുടെ മേല്‍നോട്ടം വഹിക്കും. അജയ് മാക്കനാണ് കമ്യൂണിക്കേഷന്‍ ചുമതല. 
മധുസൂദന്‍ മിസ്ത്രിയെ കേരളത്തിന്റെ ചുമതലയില്‍ നിന്ന് നീക്കിയിട്ടുണ്ട്. മുകുള്‍ വാസ്നിക്കിനാണ് കേരളത്തിന്റെ പുതിയ ചുമതല. 12 പുതിയ ജനറല്‍ സെക്രട്ടറിമാര്‍, സ്വതന്ത്ര ചുമതലയുള്ള 42 സെക്രട്ടറിമാര്‍ എന്നിവരാണ് പുന:സംഘടനയിലുള്ളത്. ഓരോ സെക്രട്ടറിക്കും പ്രത്യേകം ചുമതല നല്‍കിയിട്ടുണ്ട്. പോഷക സംഘനടകളുടെ ചുമതല കോണ്‍ഗ്രസ് വൈസ് പ്രസിഡന്റ് രാഹുല്‍ ഗാന്ധി തുടര്‍ന്നു വഹിക്കും. സോണിയാ ഗാന്ധിയുടെ രാഷ്ട്രീയകാര്യ സെക്രട്ടറിയായി അഹമ്മദ് പട്ടേലും ട്രഷററായി മോത്തിലാല്‍ വോറയും തുടരും.