ബിജു രാധാകൃഷ്ണന് പിടിയില്, തിരിച്ചറിയാതിരിക്കാന് മീശ വടിച്ചുകളയുകയും മുടി വെട്ടി മാറ്റുകയും ചെയ്തു, ലാപ്ടോപ്പ് വില്ക്കുന്നതിനിടെ വലയില് വീണു
സോളാര് തട്ടിപ്പു കേസില് ഒളിവിലായിരുന്ന മുഖ്യ പ്രതി ബിജു രാധാകൃഷ്ണനെ തമിഴ്നാട്ടില് നിന്നും പോലീസ് പിടികൂടി. കോയമ്പത്തൂരില് നിന്നാണ് പ്രത്യേക സംഘം ബിജുവിനെ കസ്റ്റഡിയിലെടുത്തത്. തമിഴ്നാട് ക്യൂ ബ്രാഞ്ചിന്റെ സഹായത്തോടെയാണ് ബിജുവിനെ പിടികൂടിയത്. മൊബൈല് ഫോണ് പിന്തുടര്ന്നാണ് ബിജുവിന്റെ നീക്കങ്ങള് മനസിലാക്കിയത്. ബിജുവിനെ കണ്ടെത്താനായി നാലു സംഘങ്ങളായി പോലീസ് തെരച്ചില് നടത്തി വരികയായിരുന്നു. കൊല്ലം ഡിവൈഎസ്പിയുടെ നേതൃത്വത്തിലുള്ള സംഘമാണ് ബിജുവിനെ കുടുക്കിയത്. തിരിച്ചറിയാതിരിക്കാന് മീശ വടിച്ചുകളയുകയും, മുടി വെട്ടി മാറ്റുകയും ചെയ്തിരുന്നു. ലാപ്ടോപ്പ് വില്ക്കുന്നതിനിടയിലാണ് ബിജുവിനെ പോലീസ് പിടി കൂടിയത്. തമിഴ്നാട്ടിലും നിരവധി തട്ടിപ്പു കേസുകളില് പ്രതിയാണ് ബിജു.
സോളാര് തട്ടിപ്പു കേസില് നേരത്തേ തന്നെ സരിത എസ് നായരെ അറസ്റ്റ് ചെയ്തിരുന്നു. ഇതറിഞ്ഞ് തൃശൂരിലുണ്ടായിരുന്ന ബിജു രാധാകൃഷ്ണന് തന്ത്ര പൂര്വം മുങ്ങുകയായിരുന്നു. ഇതിനിടയ്ക്ക് ബിജു പല ചാനലുകളിലും ഫോണിലൂടെ സംസാരിച്ചിരുന്നു. തന്റെ ജീവിതം തകര്ത്തത് ഗണേഷ് കുമാറാണെന്നും അക്കാര്യം പറഞ്ഞ് മുഖ്യമന്ത്രിയെ കണ്ടതായും അദ്ദേഹം പറഞ്ഞിരുന്നു. കേരള രാഷ്ട്രീയത്തില് ഏറെ കോളിളക്കം ഉണ്ടാക്കിയ വെളിപ്പെടുത്തലുകളാണ് ബിജു നടത്തിയത്.
ചാനലുകളിലൂടെ സംസാരിച്ചിട്ടും കേരള പോലീസിന് ബിജുവിനെ പിടിക്കാന് കഴിയാത്തതില് ഏറെ വിമര്ശനം നേരിട്ടു. ഇതിനായി പ്രത്യേക സംഘത്തേയും പോലീസ് നിയോഗിച്ചു. ബിജു കോയമ്പത്തൂരില് ഉണ്ടെന്നു തന്നെയായിരുന്നു പോലീസിന്റെ വിശ്വാസം.
ബിജുവിനെ റോഡുമാര്ഗം കൊച്ചിയില് കൊണ്ടു വന്ന് മജിസ്ട്രേറ്റിനു മുമ്പില് ഹാജരാക്കും. തുടര്ന്ന് ബിജുവിനെ കസ്റ്റഡിയില് വാങ്ങും. ബിജുവിന്റെ മുന് ഭാര്യ രശ്മിയുടെ കൊലപാതകവുമായി ബന്ധപ്പെട്ടുള്ള കേസിനും കൂടിയായിരുന്നു അറസ്റ്റ്.
https://www.facebook.com/Malayalivartha
