തന്ത്രപ്രധാന ഓഫിസുകളില്‍ കരാര്‍ അടിസ്ഥാനത്തില്‍ നിയമനങ്ങള്‍ നടത്തിയതില്‍ ദുരൂഹത
സര്‍ക്കാര്‍ സര്‍വീസില്‍ പിഎസ്സി വഴിയാണു നിയമനം നടത്തേണ്ടതെന്നിരിക്കെ, പ്രധാന വകുപ്പുകളില്‍ കരാര്‍ അടിസ്ഥാനത്തില്‍ ഐടി വിദഗ്ധരെ നിയമിച്ചതില്‍ ദുരൂഹതയുണ്ട്. രഹസ്യസ്വഭാവമുള്ള ജോലി ചെയ്യുന്ന ഓഫിസുകളില്‍ ഇന്റലിജന്‍സ് റിപ്പോര്‍ട്ടിന്റെ കൂടി അടിസ്ഥാനത്തിലേ നിയമനം നടത്താറുള്ളൂ. ചീഫ് സെക്രട്ടറിയുടെയും സെക്രട്ടറിമാരുടെയും ഓഫിസുകളില്‍ ഐടി പ്രോജക്ട് അസിസ്റ്റന്റ് തസ്തികകളിലാണു കരാര്‍ അടിസ്ഥാനത്തില്‍ ജീവനക്കാരെ നിയമിച്ചത്.
രഹസ്യസ്വഭാവമുള്ള പ്രധാന ഫയലുകളും സന്ദേശങ്ങളും എത്തുന്ന ചീഫ് സെക്രട്ടറിയുടെ ഓഫിസില്‍ ഐടി പ്രോജക്ട് അസിസ്റ്റന്റ് തസ്തികയില്‍ രണ്ടു പേരെയാണ് ഇങ്ങനെ നിയമിച്ചത്. വ്യവസായ, നോര്‍ക്ക പ്രിന്‍സിപ്പല്‍ സെക്രട്ടറി ഡോ. കെ.ഇളങ്കോവന്റെ ഓഫിസില്‍ ഐടി പ്രോജക്ട് അസിസ്റ്റന്റായി മറ്റൊരാളെ നിയമിച്ചു. ശിവശങ്കറിന്റെ ഓഫിസിലും നിയമനം നടത്തി. ഐടി ജോലികളില്‍ സഹായിക്കാനെന്ന പേരിലാണു നിയമനം.
സിവില്‍ സര്‍വീസ് ഉദ്യോഗസ്ഥനെതിരെ മാധ്യങ്ങളിലൂടെയോ അല്ലാതെയോ ആരോപണം ഉയര്‍ന്നാല്‍ രഹസ്യാന്വേഷണം നടത്തണമെന്ന് അഖിലേന്ത്യാ സര്‍വീസ് ചട്ടങ്ങളില്‍ പറയുന്നുണ്ടെങ്കിലും ശിവശങ്കറിനെതിരെ ഇനിയും അന്വേഷണം നടത്താത്തതിലും അസ്വാഭാവികതയുണ്ട്.
കഴമ്പുണ്ടെന്നു കണ്ടെത്തിയാല്‍ വകുപ്പുതല അന്വേഷണം നടത്തണം. കുറ്റക്കാരനെന്നു കണ്ടെത്തിയാല്‍ ആദ്യ അന്വേഷണത്തിനു ശേഷം തന്നെ സസ്‌പെന്‍ഷന്‍ ഉള്‍പ്പെടെ നടപടി സ്വീകരിക്കാം.
സ്വര്‍ണക്കളളക്കടത്തു കേസിലെ പ്രതി സ്വപ്ന സുരേഷ് ഹൈക്കോടതിയില്‍ വ്യക്തമാക്കിയത് ഐടി വകുപ്പിനു കീഴില്‍ നിയമിതയായിട്ടും താന്‍ യുഎഇ കോണ്‍സുലേറ്റിനു വേണ്ടി ജോലി ചെയ്തിരുന്നെന്നാണ്. വിദേശ രാജ്യങ്ങളുടെ നയതന്ത്ര കാര്യാലയങ്ങളില്‍ പ്രവര്‍ത്തിക്കുന്നവരുമായി ഔദ്യോഗിക ബന്ധത്തിനപ്പുറം അടുപ്പം പാടില്ലെന്നു അഖിലേന്ത്യാ സര്‍വീസ് ചട്ടങ്ങളില്‍ വ്യക്തമാക്കിയിട്ടുണ്ട്.
മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറിക്കു സ്വപ്ന സുരേഷുമായി അതിനപ്പുറമുള്ള ബന്ധമാണുണ്ടായിരുന്നതെന്നു ആരോപണമുളളപ്പോള്‍ പെരുമാറ്റച്ചട്ട ലംഘനവും ഉണ്ട്.
https://www.facebook.com/Malayalivartha
