ഒരുത്തന്‍ ചെയ്യുന്ന പാപകര്‍മ്മത്തിന്‍ ഫലം പരക്കെയുള്ള മഹാജനങ്ങള്‍ക്കൊക്കെ തട്ടും എന്നാണ് പറയുന്നത്. അതാണ് മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം. ശിവശങ്കര്‍ അനുഭവിക്കുന്നത്. സര്‍ക്കാരിന്റെ വലംകൈയായി വിലസിയ എം. ശിവശങ്കറിന്റെ പതനം ഇത്രവേഗം ആരും പ്രതീക്ഷിച്ചില്ല. സ്പ്രിംഗ്ലര്‍ വിവാദത്തില്‍ തട്ടി ശിവശങ്കരന്‍ പോകുമെന്നാണ് സകലരും കരുതിയത്. എന്നാല്‍ സ്പ്രിംഗ്ലറില്‍ ശിവശങ്കരന്‍ രക്ഷപ്പെട്ടപ്പോള്‍ ദേ വരുന്നു സ്വപ്നയുടെ രൂപത്തിലുള്ള വിധി. ഒറ്റ പകല്‍ കൊണ്ട് ശിവശങ്കറിന്റെ വിധി മാറിമറിഞ്ഞു.

കസ്റ്റംസുകാര്‍ ശിവശങ്കറിന്റെ ഫ്‌ളാറ്റ് റെയ്ഡ് ചെയ്തതോടെ കാര്യങ്ങള്‍ വ്യക്തമായിരുന്നു. അതിന് പിന്നാലെ എന്‍ഐഎ കൂടി അന്വേഷണം ഏറ്റെടുത്തതോടെ കുരുക്ക് മുറുകുകയായിരുന്നു. അവസാനം ശിവശങ്കരനെ തേടിയും കസ്റ്റംസുകാര്‍ എത്തി. ചാനലുകാലെ പറ്റിച്ച് അടുക്കള വഴി ശിവശങ്കരന്‍ കസ്റ്റംസ് ഓഫീസില്‍ എത്തിയെങ്കിലും അവിടെ ഒട്ടും നല്ല സ്വീകരണമല്ല ലഭിച്ചത്. ദേ നില്‍ക്കുന്നു ചാനലുകാര്‍. ശിവശങ്കരന്‍ അകത്ത് കയറിയത് മാത്രം അറിയാം. രാത്രി വൈകിയിട്ടും ശിവശങ്കരനെ പുറത്ത് വിട്ടില്ല. അതോടെ കാത്ത് നിന്ന് മുഷിഞ്ഞ ചാനലുകാര്‍ക്കും അങ്കലാപ്പായി. ഇനി വേറെ വഴിയേ ശിവശങ്കറിനെ കൊണ്ടു പോയോ. അങ്ങനെ നീണ്ട 9 മണിക്കൂറിലേറെയാണ് ചോദ്യം ചെയ്തത്. കസ്റ്റംസുകാരുടെ ചോദ്യത്തിന് മുന്നില്‍ ശിവശങ്കരന്‍ ഈരേഴ് പതിനാല് ലോകവും കണ്ടെന്നാണ് പറയുന്നത്.

സ്വര്‍ണ്ണക്കടത്തുമായി ബന്ധപ്പെട്ട് ചൊവ്വാഴ്ച വൈകീട്ട് 5.30ന് തുടങ്ങിയ ചോദ്യം ചെയ്യല്‍ ബുധനാഴ്ച പുലര്‍ച്ചെ രണ്ടേകാലോടെയാണ് അവസാനിപ്പിച്ചത്. അതിനുശേഷം കസ്റ്റംസ് ഓഫീസില്‍ നിന്ന് ഉദ്യോഗസ്ഥര്‍ തന്നയാണ് ശിവശങ്കറിനെ പൂജപ്പുരയിലെ വീട്ടിലെത്തിച്ചത്.

അതേസമയം ചോദ്യം ചെയ്യലില്‍ നിര്‍ണായക വിവരങ്ങള്‍ ലഭിച്ചതായാണ് സൂചന. വിമാനത്താവളത്തില്‍ പിടിയിലായ സ്വര്‍ണം വിട്ടുനല്‍കാന്‍ അദ്ദേഹം പലരീതിയില്‍ സമ്മര്‍ദ്ദം ചെലുത്തിയിയെന്ന് കസ്റ്റംസിനു വിവരം ലഭിച്ചു. കാര്‍ഗോ കോംപ്ലക്‌സ് വഴിയും ഇടപെട്ടു. സ്വപ്ന സഹപ്രവര്‍ത്തകയും സരിത് സുഹൃത്തുമാണെന്ന് ശിവശങ്കര്‍ പറഞ്ഞതായാണ് വിവരം.സ്വപ്നയെ പലതവണ വിളിച്ചിട്ടുണ്ടെന്ന് പറഞ്ഞ അദ്ദേഹം നാലുവര്‍ഷമായി അവരെ അറിയാമെന്ന് സമ്മതിച്ചു. അതേസമയം, ജൂലായ് ഒന്ന്, രണ്ട് തീയതകളില്‍ തിരുവനന്തപുരത്തെ ഹില്‍ട്ടണ്‍ ഇന്‍ ഹോട്ടലില്‍ തങ്ങിയ നാലുപേരെക്കുറിച്ചുള്ള സംശയത്തിന്റെ അടിസ്ഥാനത്തില്‍ താമസക്കാരുടെ രജിസ്റ്ററും സി.സി.ടി.വി. ദൃശ്യങ്ങളും കസ്റ്റംസ് സംഘം ശേഖരിച്ചു. ഇവരെ ശിവശങ്കര്‍ കണ്ടതിന്റെ ദൃശ്യങ്ങള്‍ കിട്ടി.

കൊച്ചിയില്‍ നിന്ന് കസ്റ്റംസ് കമ്മിഷണറും ഉദ്യോഗസ്ഥരും വീഡിയോ കോണ്‍ഫറന്‍സ് വഴി ചോദ്യം ചെയ്യലിലുണ്ടായിരുന്നുവെന്നും വിവരമുണ്ട്. ശിവശങ്കര്‍ വാടകയ്‌കെടുത്ത ഫഌറ്റിന് സമീപത്തെ ഫഌറ്റില്‍ സ്വപ്നയുടെ ഭര്‍ത്താവും മകളും താമസിച്ചിരുന്നതായും വിവരം കിട്ടി. ഒരു ഐ.എ.എസ്. ഉദ്യോഗസ്ഥനെ രാത്രി വൈകിയും നീണ്ട ചോദ്യംചെയ്യലിന് വിധേയമാക്കുന്നത് അസാധാരണമാണ്. ചോദ്യംചെയ്യലില്‍ നിര്‍ണായക വിവരങ്ങള്‍ ലഭിച്ചുവെന്നും ഉദ്യോഗസ്ഥര്‍ സൂചിപ്പിച്ചു.

വൈകീട്ട് നാലുമണിയോടെ ശിവശങ്കറിന്റെ വീട്ടിലെത്തിയ കസ്റ്റംസ് സംഘം അദ്ദേഹവുമായി കൂടിക്കാഴ്ച നടത്തിയശേഷമാണ് ഓഫീസിലേക്ക് വിളിച്ചുവരുത്തി ചോദ്യംചെയ്തത്. സ്വര്‍ണക്കടത്തുകേസിലെ പ്രതി സ്വപ്ന സുരേഷ് മന്ത്രി കെ.ടി. ജലീലിനെയും എം. ശിവശങ്കറിനെയും വിളിച്ചതായുള്ള കോള്‍ലിസ്റ്റ് പുറത്തുവന്നിരുന്നു.

അതേസമയം കസ്റ്റംസിന് പിന്നാലെ അടുത്തതായി ചോദ്യം ചെയ്യുന്നത് എന്‍ഐഎയായിരിക്കും. അത് ഒന്നൊന്നര ചോദ്യം ചെയ്യലായിരിക്കും. കസ്റ്റംസ് കൂടി ചോദ്യം ചെയ്തതിന്റെ വെളിച്ചത്തിലായിരിക്കും ഈ ചോദ്യം ചെയ്യല്‍. വേണ്ടി വന്നാല്‍ സ്വപ്നയുടെ സാന്നിധ്യത്തില്‍ പോലും ചോദ്യം ചെയ്യും.