കരുവാറ്റയില്‍ ഗൃഹനാഥന്‍ കൊലപ്പെട്ട സംഭവത്തില്‍ എല്ലാം ആസൂത്രണവും നടത്തിയത് 13 വയസ്സുകാരിയായ പേരക്കുട്ടിയാണെന്ന് പൊലീസ്. കരുവാറ്റയില്‍ വാടകയ്ക്കു താമസിക്കുന്ന കൊല്ലം പരവൂര്‍ നെടുങ്ങോലം കൊച്ചാലും കൂട് സരസ്വതി നിവാസില്‍ ശിവന്‍കുട്ടി ചെട്ടിയാരാണ് (65) കൊല്ലപ്പെട്ടത്. ഫോണ്‍ അമിതമായി ഉപയോഗിക്കുന്നതിനും വൈകി വീട്ടിലെത്തുന്നതിനും മുത്തച്ഛന്‍ നിരന്തരം വഴക്കു പറഞ്ഞിരുന്നതിനാല്‍ പെണ്‍കുട്ടിക്ക് പകയുണ്ടായിരുന്നു. കൊല്ലത്തെ പഠനകാലത്ത് പരിചയപ്പെട്ട കാമുകനും സുഹൃത്തുക്കള്‍ക്കും വീട്ടിലേക്കുള്ള വഴി കാട്ടികൊടുത്തത് പെണ്‍കുട്ടിയാണ്. വീടിനുള്ളിലേക്ക് കയറി മുത്തച്ഛനെ കൊല്ലാനുള്ള എളുപ്പ വഴിയും പറഞ്ഞു കൊടുത്തു.

കൃത്യം നടന്ന സമയത്ത് പെണ്‍കുട്ടി വീട്ടിലില്ലായിരുന്നു. ഇക്കാര്യം പൊലീസ് ശ്രദ്ധിച്ചു. ഇതേക്കുറിച്ച് ചോദിച്ചപ്പോള്‍ പരസ്പര വിരുദ്ധമായ കാര്യങ്ങളാണ് പെണ്‍കുട്ടി പറഞ്ഞത്. വീട്ടിലെ മറ്റ് മുറികള്‍ അലങ്കോലപ്പെട്ടിരുന്നെങ്കിലും പെണ്‍കുട്ടിയുടെ മുറിയില്‍ ആരും അതിക്രമിച്ചു കയറിയതിന്റെ ലക്ഷണങ്ങള്‍ ഉണ്ടായിരുന്നില്ല. ഇതോടെ, വീടുമായി അടുപ്പമുള്ള ആരോ ആണ് കൊലപാതകം നടത്തിയതെന്ന് പൊലീസ് ഊഹിച്ചു. മൊബൈല്‍ ഫോണ്‍ രേഖകള്‍ പരിശോധിച്ചപ്പോള്‍ പെണ്‍കുട്ടിക്കെതിരായ തെളിവുകള്‍ ലഭിച്ചു. വിശദമായ ചോദ്യം ചെയ്യലില്‍ പെണ്‍കുട്ടി കുറ്റം സമ്മതിച്ചതായി പൊലീസ് പറഞ്ഞു. സ്വര്‍ണം വിറ്റു കിട്ടുന്ന പണം സ്വകാര്യ ആവശ്യങ്ങള്‍ക്ക് വിനിയോഗിക്കാനായിരുന്നു പദ്ധതി.

മുത്തച്ഛന്‍ ഞായറാഴ്ച തനിച്ചായിരിക്കുമെന്ന് പെണ്‍കുട്ടി ഫോണ്‍ വിളിച്ച് കാമുകനെ അറിയിച്ചിരുന്നു. തുടര്‍ന്ന്, കാമുകനും കൂട്ടുകാരും ട്രെയിനില്‍ ഹരിപ്പാടെത്തി. പെണ്‍കുട്ടി ഫോണിലൂടെ വീട്ടിലേക്കുള്ള വഴി പറഞ്ഞു കൊടുത്തു. ശുചിമുറിയുടെ മേല്‍ക്കൂരയിലെ ആസ്ബസ്‌റ്റോസ് ഷീറ്റിന്റെ ഭാഗം പൊട്ടിച്ച് അകത്തു കയറാന്‍ പെണ്‍കുട്ടി നിര്‍ദേശിച്ചു. സ്വര്‍ണം ഇരിക്കുന്ന സ്ഥലവും പറഞ്ഞു കൊടുത്തു. വീട്ടിലെ കിടക്കവിരിയും മറ്റ് വസ്ത്രങ്ങളും ഉപയോഗിച്ചാണ് ശിവന്‍കുട്ടിയെ ശ്വാസം മുട്ടിച്ച് കൊലപ്പെടുത്തിയത്. വിഡിയോ കോളിലൂടെ മൃതദേഹത്തിന്റെ ദൃശ്യങ്ങള്‍ പെണ്‍കുട്ടിയെ കാണിച്ചു. സ്ഥലത്തുനിന്ന് കടന്ന പ്രതികളെ ഫോണ്‍ രേഖകളുടെ അടിസ്ഥാനത്തിലാണ് പിടികൂടിയത്.

ശിവന്‍കുട്ടി ചെട്ടിയാരുടെ മകള്‍ ശ്രീകല രണ്ടു തവണ വിവാഹം കഴിച്ചിട്ടുണ്ട്. പ്രതിയായ പെണ്‍കുട്ടി ആദ്യ വിവാഹത്തിലെ മകളാണ്. വിവാഹമോചനം നേടിയ ശ്രീകല പിന്നീട് മറ്റൊരാളെ വിവാഹം കഴിച്ചു. ഇയാള്‍ ഇപ്പോള്‍ ഗള്‍ഫിലാണ്. ഇവരെല്ലാം കൊല്ലത്താണ് താമസിച്ചിരുന്നത്. രണ്ടു വര്‍ഷം മുന്‍പാണ് കരുവാറ്റയിലെ വാടക വീട്ടിലേക്ക് മാറിയത്. ശ്രീകലയ്ക്കായി പുതിയ വീടിന്റെ നിര്‍മാണം നടക്കുകയായിരുന്നു. ഇതിന് അടുത്തായിരുന്നു വാടക വീട്.