നിയമസഭയില്‍ സോളാര്‍ വിഷയം കത്തിക്കയറി. ഇന്നും പ്രതിപക്ഷം പ്ലക്കാഡുകളുമേന്തിയാണ്‌ സഭയിലെത്തിയത്‌. ചോദ്യോത്തരവേളയുമായി പ്രതിപക്ഷം സഹകരിച്ചു. ഇതിനിടയിലാണ്‌ പ്രതിപക്ഷത്തു നിന്നും സിപിഐയിലെ വിഎസ്‌ സുനില്‍ കുമാര്‍ അടിയന്തര പ്രമേയത്തിന്‌ അനുമതി ചോദിച്ചു കൊണ്ടു സംസാരിച്ചത്‌.
രണ്ടുപേരെ കുരുതി കൊടുത്തുകൊണ്ട്‌ മുഖ്യമന്ത്രി രക്ഷപ്പെടുകയാണെന്നും സുനില്‍ കുമാര്‍ പറഞ്ഞു. സോളാര്‍ തട്ടിപ്പിലൂടെ 10,000 കോടിയുടെ അഴിമതിനടന്നുവെന്ന ചീഫ് വിപ്പിന്റെ പരാമര്‍ശം സഭ ചര്‍ച്ചചെയ്യണമെന്ന് സുനില്‍കുമാര്‍ ആവശ്യപ്പെട്ടു. ആഭ്യന്തരമന്ത്രി അന്വേഷണത്തില്‍ ഇടപെടുന്നുവന്ന ആരോപണവും അദ്ദേഹം ഉന്നയിച്ചു. മുഖ്യമന്ത്രിക്കെതിരായ അന്വേഷണം ആഭ്യന്തരമന്ത്രി വഴിതെറ്റിക്കുകയാണ്. പി.സി ജോര്‍ജ്ജിന്റെ വയറുനിറയെ രഹസ്യങ്ങളാണെന്ന് സുനില്‍കുമാര്‍ പറഞ്ഞു.
സോളാര്‍ തട്ടിപ്പു പതിനായിരം കോടിയുടേതെന്ന ആരോപണവും യുവജന സംഘടനകള്‍ക്കു നേരെ പോലീസ്‌ നടത്തിയ അതിക്രമവും ചര്‍ച്ചചെയ്യണമെന്ന്‌ ആവശ്യപ്പെട്ടായിരുന്നു അടിയന്ത്രിര പ്രമേയത്തിനു നോട്ടീസ്‌ നല്‍കിയത്.

ഗുരുതരമായ ആരോഗ്യ പ്രശ്‌നങ്ങള്‍ ഉണ്ടാക്കുന്ന ഗ്രനേഡുകളാണ്‌ സമരക്കാര്‍ക്ക്‌ നേരെ പ്രയോഗിച്ചത്. കണ്ണീര്‍ വാതകത്തിനു ഉപയോഗിച്ച രാസ വസ്‌തു ഏതെന്നും സര്‍ക്കാര്‍ വ്യക്തമാക്കണം. ഒട്ടേറെപ്പേര്‍ ബോധരഹിതരായി. അഴിമതി മറയ്‌ക്കാന്‍ സമരക്കാരെ മര്‍ദ്ദിച്ച്‌ അവശരാക്കുന്നത്‌ ശരിയല്ലെന്നും സുനില്‍ കുമാര്‍ പറഞ്ഞു. തിരുവഞ്ചൂര്‍ മുഖ്യമന്ത്രിയുടെ വിനീതവിധേയനായ തൊമ്മിയാണെന്ന് സുനില്‍കുമാര്‍ കുറ്റപ്പെടുത്തി.

എന്നാല്‍ സുനില്‍ കുമാര്‍ വായില്‍ തോന്നുന്നത്‌ പറയുന്നു എന്നാണ്‌ ആഭ്യന്തര മന്ത്രി തിരുവഞ്ചൂര്‍ രാധാകൃഷ്‌ണന്‍ പറഞ്ഞത്‌. മുന്‍ സര്‍ക്കാര്‍ വാങ്ങിച്ച ഗ്രനേഡുകളാണ്‌ പോലീസ്‌ പ്രയോഗിച്ചത്. അതിന്റെ രേഖകള്‍ വേണമെങ്കില്‍ വയ്‌ക്കാമെന്നും തിരുവഞ്ചൂര്‍ പറഞ്ഞു. ടീം സോളാറിന് 10 രൂപയുടെ ഓര്‍ഡര്‍ പോലും നല്‍കിയിട്ടില്ലെന്ന് തിരുവഞ്ചൂര്‍ മറുപടി നല്‍കി.

സുനില്‍കുമാറിനെതിരെ തിരുവഞ്ചൂര്‍ നടത്തിയ പരാമശത്തില്‍ സഭ ആകെ ബഹളമായി. അടിയന്തരപ്രമേയത്തിന് അനുമതി നിഷേധിച്ചതിന് പിന്നാലെ ബഹളം ശക്തമാകുകയും തുടര്‍ന്ന് സ്പീക്കര്‍ ശ്രദ്ധക്ഷണിക്കലും സബ്മിഷനും റദ്ദാക്കി സഭ പിരിയുകയാണെന്ന് പ്രഖ്യാപിക്കുകയും ചെയ്തു.