നേതാജി സുഭാഷ് ചന്ദ്രബോസിന്റെ തിരോധാനം സംബന്ധിച്ച ദുരൂഹതകള്‍ അവസാനിക്കുന്നില്ല. പശ്ചിമബംഗാള്‍ രഹസ്യാന്വേഷണ പൊലീസ് വര്‍ഷങ്ങളോളം നിരീക്ഷിച്ച സന്യാസി നേതാജിയായിരുന്നോ എന്ന സംശയമാണ് ഇപ്പോള്‍ വീണ്ടും ബലപ്പെട്ടിരിക്കുന്നത്. ഷൗല്‍മാരി ബാബ എന്നറിയപ്പെട്ടിരുന്ന സ്വാമി ശാരദാനന്ദ യഥാര്‍ഥത്തില്‍ ഒളിവില്‍ കഴിഞ്ഞിരുന്ന നേതാജിയായിരുന്നുവെന്നാണ് കരുതുന്നത്.
അറുപതുകളില്‍ വര്‍ഷങ്ങളോളം ബംഗാളില്‍ സ്വാമി ജീവിച്ചിരുന്നു. മുഖം ഫോട്ടോകളില്‍ പതിയാതിരിക്കുന്നതില്‍ അതീവ ശ്രദ്ധാലുവായിരുന്നു ഇദ്ദേഹം. എപ്പോഴും മുഖംമറച്ചുകൊണ്ടാണ് സ്വാമി പ്രത്യക്ഷപ്പെട്ടിരുന്നത്. തന്റെ വിരലടയാളം എവിടെയും പതിയാനും സ്വാമി സമ്മതിച്ചിരുന്നില്ലെന്ന് പശ്ചിമബംഗാള്‍ രഹസ്യപ്പൊലീസിന്റെ രേഖകളില്‍ പറയുന്നു.
1962ല്‍ അദ്ദേഹത്തിന് സഞ്ചരിക്കാനായി ഒരു ടാക്‌സി വിളിച്ചപ്പോള്‍, അതില്‍ കയറുന്നതിന് മുമ്പുതന്നെ കാറിന്റെ ചില്ലുകള്‍ മറയ്ക്കപ്പെട്ടിരുന്നതായി ഒരു രേഖയില്‍ പറയുന്നു. മറ്റൊരിക്കല്‍ ഡോക്ടര്‍ പരിശോധിക്കാനെത്തിയപ്പോള്‍ മുഖം കമ്പിളികൊണ്ട് മറച്ചുപിടിച്ചതായും സൂചനയുണ്ട്. രക്തം പരിശോധിക്കാന്‍ നല്‍കണമെന്ന് ആവശ്യപ്പെട്ടപ്പോള്‍ അതിന് വിസമ്മതിച്ച സന്യാസി, തന്റെ എക്‌സ്‌റേ എടുക്കാനും അനുവദിച്ചിരുന്നില്ല. സന്യാസിക്ക് ഒരു ശ്വാസകോശം മാത്രമേ ഉണ്ടായിരുന്നുള്ളൂ എന്ന് 1963ല്‍ മനസ്സിലാക്കിയിരുന്നു.
നേതാജിയുടെ മരണം സംബന്ധിച്ച് ദുരൂഹതയുള്ളതിനാല്‍, 20 വര്‍ഷത്തോളം കേന്ദ്ര രഹസ്യാന്വേഷണ ഏജന്‍സി അദ്ദേഹത്തിന്റെ ബന്ധുക്കളെ നിരീക്ഷിച്ചിരുന്നുവെന്ന വിവരം വെളിപ്പെട്ടതോടെയാണ് മറ്റു രഹസ്യങ്ങളുടെയും ചുരുളഴിഞ്ഞുതുടങ്ങിയത്. ശാരദാനന്ദ സ്വാമിയുടെ രഹസ്യ ജീവിതം അദ്ദേഹം നേതാജി തന്നെയായിരുന്നോ എന്ന സംശയം ബലപ്പെടുത്തുകയാണെന്ന് ബംഗാള്‍ പൊലീസിന്റെ രേഖകളിലൊന്നില്‍ പറയുന്നു.
ഫോട്ടോകളില്‍ മുഖം പതിയാതിരിക്കുന്നതിന് എപ്പോഴും പുകയുടെ പശ്ചാത്തലത്തില്‍ മാത്രമാണ് സ്വാമി ഇരിക്കാറുണ്ടായിരുന്നത്. വിരലടയാളം പതിയാതിരിക്കുന്നതിന് എവിടെ സ്പര്‍ശിക്കുമ്പോഴും ഒരു തൂവാല ഉപയോഗിച്ചിരുന്നതായും രേഖകളില്‍ പറയുന്നു. എന്നാല്‍, സ്വാമി നേതാജിയാണെന്ന പ്രചാരണം അടിസ്ഥാന രഹിതമാണെന്ന് ആശ്രമം അധികൃതര്‍ അഭിപ്രായപ്പെട്ടു. ജയ്പ്പാല്‍ഗുഡിയില്‍ അഞ്ചുവര്‍ഷത്തോളം ജീവിച്ചശേഷം ശാരദാനന്ദ സ്വാമി ഇപ്പോള്‍ ഉത്തരാഖണ്ഡിന്റെ ഭാഗമായ പര്‍വത പ്രദേശത്തേയ്ക്ക് താമസം മാറ്റിയെന്നും 1977ല്‍ അദ്ദേഹം ഡെറാഡൂണില്‍വച്ച് മരിച്ചതായും അവര്‍ പറയുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha