ഐഎഎസ് ബുദ്ധിയും പത്താംക്ലാസും ഗുസ്തിയും തമ്മിലേറ്റുമുട്ടിയാല്‍ ആര് ജയിക്കുമെന്ന് കാണിച്ച് തരുന്നതാണ് സ്വപ്ന സുരേഷിന്റേയും സര്‍ക്കാര്‍ മുന്‍ സെക്രട്ടറി എം ശിവശങ്കറിന്റേയും സമീപ കാലത്തെ സംഭവങ്ങള്‍. ഒരു ഐഎഎസുകാരനെ വരുതിയില്‍ നിര്‍ത്താന്‍ പത്താം ക്ലാസൊന്നും വേണ്ടെന്ന് സ്വപ്ന പല തവണ കാട്ടിത്തന്നതാണ്. ഫ്‌ളാറ്റ് വിവാദം തുടങ്ങി ജോയിന്റ് അക്കൗണ്ടും ലോക്കറും വരെ പരിശോധിച്ചാല്‍ അത് വ്യക്തമാകും. പത്താംക്ലാസിനെ തോല്‍പ്പിക്കാനും രക്ഷപ്പെടാനുള്ള പഴുതിട്ട് ശിവശങ്കര്‍ ചില ഐഎഎസ് ബുദ്ധി ഇടയ്ക്ക് കാട്ടിയതും കാണാം. അവസാന നിമിഷം തോന്നിയ ഐഎഎസ് ബുദ്ധിയും അല്‍പം ദൈവസഹായവും ഒന്നു കൊണ്ട് മാത്രമാണ് ശിവശങ്കര്‍ പുറത്തും സ്വപ്ന അകത്തും കിടക്കുന്നത്.

കസ്റ്റംസ് തടഞ്ഞുവച്ച നയതന്ത്ര പാഴ്‌സല്‍ വിട്ടുകിട്ടാന്‍ സഹായിക്കണമെന്ന് സ്വപ്ന സുരേഷ് ആവശ്യപ്പെട്ടപ്പോള്‍ ശിവശങ്കറിന്റെ ഐഎഎസ് ബുദ്ധിയും ഭാഗ്യവും ദൈവ സഹായവുമാണ് തുണയായത്. ശിവശങ്കറിനെ തേയ്ക്കാന്‍ സ്വര്‍ണം മറച്ച് വച്ച് സഹായിക്കണമെന്ന് സ്വപ്ന കെഞ്ചിയപ്പോള്‍ ഒരു ചൈനീസ് കഥ പറഞ്ഞാണ് ശിവശങ്കര്‍ രക്ഷപ്പെട്ടത്.

ജൂണ്‍ 30നാണ് യുഎഇ കോണ്‍സുലേറ്റിലേക്കുള്ള നയതന്ത്ര പാഴ്‌സലില്‍ സ്വര്‍ണം എത്തിയത്. പാഴ്‌സലില്‍ സ്വര്‍ണമുണ്ടെന്ന കാര്യം വെളിപ്പെടുത്താതെയാണ് സ്വപ്ന ശിവശങ്കറിനോട് സഹായം അഭ്യര്‍ഥിച്ചത്. സ്വര്‍ണമെന്ന് പറഞ്ഞാല്‍ ശിവശങ്കര്‍ ബഹളമാക്കുമെന്ന് അറിഞ്ഞ് കൊണ്ടു തന്നെയാണ് മറച്ചുവച്ചത്. അപ്പോഴാണ് ശിവശങ്കര്‍ ചൈനാക്കഥ ഇറക്കിയത്.

ചൈനയുമായുള്ള അതിര്‍ത്തി സംഘര്‍ഷത്തിന്റെ പശ്ചാത്തലത്തില്‍ ചൈനീസ് ഉല്‍പ്പന്നങ്ങള്‍ അടങ്ങിയ കണ്ടെയ്‌നറുകള്‍ വിവിധ തുറമുഖങ്ങളില്‍ കെട്ടിക്കിടന്നിരുന്നു. ഈ സാഹചര്യത്തില്‍ കസ്റ്റംസ് ക്ലിയറന്‍സ് ലഭിക്കാന്‍ പ്രയാസമാണെന്നും അതാകും പാഴ്‌സലുകള്‍ വിട്ടുകിട്ടാന്‍ വൈകുന്നതെന്നും സ്വപ്നയോട് പറഞ്ഞതായി ശിവശങ്കര്‍ അന്വേഷണ ഏജന്‍സികളോട് വെളിപ്പെടുത്തി. സാധാരണ നിലയില്‍ കുറച്ചു ദിവസങ്ങള്‍ കഴിയുമ്പോള്‍ പാഴ്‌സല്‍ വിട്ടുകിട്ടുമെന്നും സര്‍ക്കാര്‍ ഉദ്യോഗസ്ഥനെന്ന നിലയില്‍ ഇക്കാര്യത്തില്‍ ഇടപെടുന്നത് ശരിയല്ലെന്നും ശിവശങ്കര്‍ നിലപാടെടുത്തു.

ശിവശങ്കറില്‍നിന്ന് സഹായം ലഭിക്കാതായതോടെയാണ് സ്വപ്നയും സന്ദീപും കോണ്‍സുലേറ്റിലെ ഉദ്യോഗസ്ഥനൊപ്പം വിമാനത്താവളത്തിലെത്തി കസ്റ്റംസ് ഉദ്യോഗസ്ഥരെ ഭീഷണിപ്പെടുത്തിയത്. പിന്നീട് പാഴ്‌സലുകള്‍ തുറന്നു പരിശോധിച്ച ഉദ്യോഗസ്ഥര്‍ ശുചിമുറി ഉപകരണങ്ങള്‍ അടങ്ങുന്ന പെട്ടികളില്‍ ഒളിപ്പിച്ച 30 കിലോ സ്വര്‍ണം കണ്ടെത്തുകയായിരുന്നു. ഭക്ഷ്യവസ്തുക്കളും ചെരിപ്പുകളും പെട്ടികളിലുണ്ടായിരുന്നു.

കിഴക്കന്‍ ലഡാക്കില്‍ നിയന്ത്രണ രേഖയോട് ചേര്‍ന്ന് ഗല്‍വാനില്‍ ജൂണ്‍ 16ന് ചൈനയുമായി സംഘര്‍ഷമുണ്ടായതിനെത്തുടര്‍ന്ന് ചൈനീസ് ഉല്‍പ്പന്നങ്ങള്‍ക്ക് നിയന്ത്രണമേര്‍പ്പെടുത്താന്‍ കേന്ദ്രസര്‍ക്കാര്‍ തീരുമാനിച്ചിരുന്നു. ചൈനയില്‍നിന്ന് ഇറക്കുമതി ചെയ്യുന്ന വസ്തുക്കള്‍ക്ക് കസ്റ്റംസ് ക്ലിയറന്‍സ് നല്‍കാത്തതിനെത്തുടര്‍ന്ന് കോടിക്കണക്കിനു രൂപയുടെ വസ്തുക്കള്‍ തുറമുഖങ്ങളിലും വിമാനത്താവളങ്ങളിലും കെട്ടികിടന്നു. ആ സമയത്താണ് നയതന്ത്ര പാഴ്‌സലുകള്‍ യുഎഇയില്‍നിന്ന് എത്തുന്നത്. ഈ സമയത്താണ് തങ്ങളുടെ സാധനങ്ങളും പിടിച്ചു വച്ചതായി സ്വപ്ന സുരേഷ് പറയുന്നത്. പഴയ സ്വഭാവം വച്ച് ഉടനേ വിളിച്ച് പറയേണ്ടതായിരുന്നു. എന്നാല്‍ ചിലര്‍ക്ക് ചില സമയങ്ങളില്‍ ദൈവം തുണയായി എത്തുന്നതു പോലെ ശിവശങ്കറേയും ദൈവം തുണച്ചു. സ്വപ്നയെ പിണക്കാതെ എങ്ങനെ രക്ഷപ്പെടാം എന്നാണ് ശിവശങ്കര്‍ ചിന്തിച്ചത്. അന്നേരത്ത് ദൈവം മനസിലിട്ടുകൊടുത്ത കഥയാണ് ചൈനീസ് കഥ. എന്തായാലും ആ കഥയല്ല ഈ സ്വര്‍ണക്കഥയല്ലെന്ന് സ്വപ്നയ്ക്ക് അറിയാമായിരുന്നു. പക്ഷെ എന്തു ചെയ്യാം. പിന്നെയെല്ലാം വിധി.