മലയാളികള്‍ ഉള്ളയിടത്തെല്ലാം അടി കമ്മിഷനെ പറ്റിയാണ്. സര്‍വ മേഖലയിലും കമ്മീഷന്റെ കളികളാണ് ഉള്ളത്. നമ്മുടെ വീട് നമ്മുടെ പണം കൊണ്ട് പെയിന്റടിച്ചാല്‍ പോലും ആ ബില്ല് കൊണ്ട് കമ്മീഷന്‍ വാങ്ങുന്നവരാണ് നമ്മുടെ ആശാന്‍മാര്‍. എന്തിന് ഒരാള്‍ക്കൊരു പരസഹായം മുതല്‍ വസ്തു, ഫ്‌ളാറ്റ് തുടങ്ങിയ എന്തിനും കമ്മീഷന്‍ വാങ്ങുന്ന കാലമാണ്. സ്‌നേഹ ബന്ധം വേറെ വേറെ കമ്മീഷന്‍ വേറെ എന്നാണ് നാട്ടുനടപ്പ്. പക്ഷെ ഈ കമ്മീഷന്‍ വാങ്ങിയെടുക്കുന്നത് അത്ര ഈസിയല്ല. കമ്മീഷനെ ചൊല്ലി നാടന്‍ തെറിവിളിയും നാടന്‍ അടിയും മുതല്‍ ഹൈ ടെക് കൊലപാതകങ്ങള്‍ വരെ നടന്നിട്ടുണ്ട്. അങ്ങനെ മനുഷ്യര്‍ 10 രൂപ കമ്മീഷന്‍ കിട്ടാന്‍ പാടുപെടുമ്പോഴാണ് നമ്മുടെ സ്വപ്ന താരം സ്വപ്ന സുരേഷിന് കമ്മീഷന്‍ വകയായി ഒരു കോടി രൂപ കിട്ടിയെന്ന് അറിയുന്നത്. അരിയാഹാരം കഴിക്കുന്ന നമ്മള്‍ക്ക് അത് വിശ്വസിക്കാന്‍ ബുദ്ധിമുട്ടായപ്പോള്‍ ദേ വരുന്നു കമ്മീഷന്‍ നല്‍കിയ മുതലാളി.

ലൈഫ് മിഷന്‍ പദ്ധതിയില്‍ വടക്കാഞ്ചേരിയില്‍ സര്‍ക്കാരിന്റെ രണ്ടേക്കറില്‍ 140 ഫ്‌ളാറ്റ് നിര്‍മ്മിക്കാന്‍ കരാര്‍ നല്‍കിയതിന് സ്വപ്നയ്ക്ക് കമ്മിഷന്‍ നല്‍കിയതായി യൂണിടാക് നിര്‍മ്മാണക്കമ്പനി ഉടമ തന്നെയാണ് വെളിപ്പെടുത്തിയിരിക്കുന്നത്. യൂണിടാക് ഉടമ സന്തോഷ് ഈപ്പന്‍ അമ്പരപ്പിക്കുന്ന മൊഴിയാണ് അന്വേഷണ സംഘത്തിന് നല്‍കിയത്. ലൈഫ് മിഷന്‍ കരാര്‍ കിട്ടിയത് സന്ദീപ് വഴിയാണ്. പിന്നെയെന്തിന് സ്വപ്നയ്ക്ക് കമ്മീഷന്‍ നല്‍കിയെന്ന ചോദ്യത്തിലാണ് എല്ലാം തെളിഞ്ഞത്. അറബിയോട് സംസാരിച്ചു കരാര്‍ ഉറപ്പിക്കാന്‍ ഇടനിലക്കാരായത് സന്ദീപും സ്വപ്നയുമാണ്. അറബിയെ മെരുക്കി കാര്യങ്ങള്‍ നടത്തുക അത്ര എളുപ്പമായിരുന്നില്ല. എന്നാല്‍ സ്വപ്ന വേഗത്തില്‍ സ്വപ്ന അത് ഈസിയായി നടത്തി. ഇതിനു പകരമായാണ് സ്വപ്ന കമ്മീഷന്‍ ആവശ്യപ്പെട്ടത്. പതിനെട്ടരക്കോടിയുടേതായിരുന്നു ലൈഫ് മിഷന്‍ കരാര്‍. ഇതില്‍ പതിനാലു കോടിയും കിട്ടിയതായി സന്തോഷ് വെളിപ്പടുത്തി.

സംസ്ഥാന സര്‍ക്കാരുമായോ ഉദ്യോഗസ്ഥരുമായോ ചര്‍ച്ചകളൊന്നും നടന്നിട്ടില്ല. വടക്കാഞ്ചേരി നഗരസഭ നല്‍കിയ ഭൂമിയിലാണ് റെഡ് ക്രസന്റ് എന്ന യുഎഇയിലെ സന്നദ്ധ സംഘടന വഴി ഫ്‌ളാറ്റ് നിര്‍മ്മാണം നടക്കുന്നത്. കൊച്ചി ആസ്ഥാനമായ യൂണിടെക് ബില്‍ഡേഴ്‌സിനാണ് കോണ്‍സുലേറ്റ് നിര്‍മ്മാണ കരാര്‍ നല്‍കിയിരുന്നത്. ലൈഫ് മിഷന്‍ സിഇഒയും കോണ്‍സുലേറ്റ് ജനറലും ഒപ്പുവച്ച ധാരണ പത്രത്തിന്റെ അടിസ്ഥാനത്തിലാണ് സര്‍ക്കാര്‍ ഭൂമിയില്‍ നിര്‍മ്മാണം നടക്കുന്നത്.

ലൈഫ് മിഷന്‍ പദ്ധതിയുടെ കരാര്‍ ഉറപ്പിച്ചതിന് ഒരു കോടി കമ്മീഷന്‍ ലഭിച്ചെന്ന് സ്വപ്ന എന്‍ഐഎക്ക് മൊഴി നല്‍കിയിരുന്നു. ഈ പണം ബാങ്ക് ലോക്കറില്‍ നിന്നും കണ്ടെത്തുകയും ചെയ്തു. ഈ പദ്ധതിക്ക് സര്‍ക്കാര്‍ നേരത്തേ 13കോടിക്ക് ഭരണാനുമതി നല്‍കിയെന്ന വിവരവും പുറത്തായിട്ടുണ്ട്. വടക്കാഞ്ചേരിയിലെ ഫ്‌ളാറ്റ് പദ്ധതിക്ക് 2019 ജൂണിലാണ് സര്‍ക്കാര്‍ ഭരണാനുമതി നല്‍കിയത്. ലൈഫ് മിഷന് കീഴിലെ പദ്ധതിയില്‍ പിന്നീട് യുഎഇ സന്നദ്ധ സംഘടനയായ എമിറേറ്റസ് റെഡ് ക്രസന്റ് സഹകരണം പ്രഖ്യാപിച്ചു. ഇതോടെ 13 കോടിയുടെ ഫ്‌ളാറ്റ് പദ്ധതി 20 കോടിയായി. യുണിടെക്കിന് നിര്‍മ്മാണ ചുമതലയും നല്‍കി. ഇതുവഴിയാണ് സ്വപ്നക്ക് ഒരു കോടി രൂപ കമ്മീഷന്‍ കിട്ടിയത്.

അതേസമയം വടക്കാഞ്ചേരിയിലെ ഫ്‌ളാറ്റ് നിര്‍മാണത്തിനു യൂണിടാകിനു വഴിയൊരുക്കാനായി സര്‍ക്കാര്‍ ഏജന്‍സിയായ കോസ്റ്റ്‌ഫോഡിന്റെ എസ്റ്റിമേറ്റ് പോലും തള്ളിയിരുന്ന വിവരവും പുറത്ത് വരുന്നുണ്ട്. പകരം പ്ലാന്‍ പെര്‍മിറ്റെടുത്ത ശേഷം സ്വകാര്യ സംരംഭകര്‍ക്ക് ലഭിച്ചു.

പാവപ്പെട്ടവര്‍ക്കായി യുഡിഎഫ് സര്‍ക്കാരിന്റെ കാലത്താണു ഫ്‌ളാറ്റ് നിര്‍മിക്കാന്‍ തീരുമാനിച്ചത്. ഇതിനായി 2.5 കോടി രൂപ സമാഹരിച്ചു. ഈ സര്‍ക്കാര്‍ വന്ന ശേഷം ഈ ഫണ്ട് ഉപയോഗിച്ചാണു 2.5 ഏക്കര്‍ സ്ഥലം 74 ലക്ഷം രൂപയ്ക്ക് വാങ്ങിയത്. ഒരിക്കലും നടക്കാത്ത കോടികള്‍ മറിയുന്ന ഈ പദ്ധതി അറബികളേയും വെട്ടി ഉദ്യോഗസ്ഥരേയും വെട്ടി നേടിക്കൊടുത്തത് സ്വപ്നയാണ്. ഇതിനുള്ള പ്രതിഫലമാണോ ഈ 1 കോടി കമ്മീഷനെന്നാണ് ഇനി കണ്ടെത്താനുള്ളത്.