യുഎഇയിലെ റെഡ് ക്രസന്റിന് വടക്കാഞ്ചേരിയിലെ ലൈഫ് മിഷന്‍ പദ്ധതി സര്‍ക്കാര്‍ കൈമാറിയപ്പോള്‍ കേരളത്തിലെ ഇടതു സര്‍ക്കാര്‍ തള്ളിയത് കമ്മ്യൂണിസ്റ്റ് മുഖ്യമന്ത്രിയായിരുന്ന സി. അച്യുതമേനോനെയാണ് . റെഡ് ക്രസന്റ് പണം മുടക്കിയ വടക്കാഞ്ചേരിയിലെ ഫ്‌ളാറ്റ് നിര്‍മ്മാണം സ്വകാര്യ ഏജന്‍സിയായ യൂണിടാകിന് കൈമാറാന്‍ മുന്‍കൈയ്യെടുത്തത് മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം ശിവശങ്കറാണെന്നാണ് സൂചന.

വടക്കാഞ്ചേരിയില്‍ റെഡ് ക്രസന്റിന് താല്പര്യമുണ്ടെന്ന കത്ത് ധാരണാപത്രം ഒപ്പിടുന്നതിന്റെ തലേ ദിവസമാണ് ശിവശങ്കര്‍ ലൈഫ് മിഷന് നല്‍കുന്നത്. അത് ശിവശങ്കറിന്റെ താത്പര്യം ആയിരുന്നോ അതോ മറ്റാരുടെയെങ്കിലും താത്പര്യമായിരുന്നോ എന്ന വിവരം ലഭ്യമായി വരുന്നതേയുള്ളു. ധാരണാപത്രത്തിന്റെ കരട് കൈമാറിയത് കരാര്‍ ഒപ്പിടുന്ന ദിവസം രാവിലെ മാത്രം. ഇതില്‍ നിന്നാണ് സ്വപ്നക്ക് ഒരു കോടി രൂപ കമ്മീഷന്‍ കിട്ടിയത് .

കോസ്റ്റ്‌ഫോഡ് നല്‍കിയ എസ്റ്റിമേറ്റ് തള്ളി കൊണ്ടാണ് സ്വകാര്യ ഏജന്‍സിക്ക് നിര്‍മ്മാണം കൈമാറിയത്. 1985 ല്‍ സി. അച്ചുതമേനോനാണ് കോസ്റ്റ് ഫോഡ് സ്ഥാപിച്ചത്. ഇടതു ചിന്തകന്‍ കെ എന്‍ . രാജ്, ഇടത് സഹയാത്രികനായ ലാറി ബേക്കര്‍, ടി ആര്‍. ചന്ദ്രദത്ത് എന്നിവര്‍ ചേര്‍ന്നാണ് കോസ്റ്റ് ഫോഡ് എന്ന ചുരുക്ക പേരില്‍ അറിയപ്പെടുന്ന സെന്റര്‍ ഫോര്‍ സയന്‍സ് ആന്റ് ടെക്‌നോളജി ഫോര്‍ റുറല്‍ ഡവലപ്പ്‌മെന്റ് സ്ഥാപിച്ചത്. അച്യുതമേനോന്‍ തന്റെ സ്വദേശമായ തൃശൂരിലാണ് കോസ്റ്റ് ഫോഡ് സ്ഥാപിച്ചത്. അതിന് അദ്ദേഹം ഉപയോഗിച്ചത് ലാറി ബേക്കറുടെ വൈദഗ്ധ്യമാണ്. ഇപ്പോള്‍ തീരുവനന്തപുരത്തെ ലാറി ബേക്കറുടെ വീടിന് സമീപമാണ് ഇത് പ്രവര്‍ത്തിക്കുന്നത്.

ലൈഫ് മിഷനിലെ റെഡ്ക്രസന്റ് സഹായവുമായി ബന്ധപ്പെട്ട് ദുരൂഹത കൂട്ടുന്ന കൂടുതല്‍ വിവരങ്ങളാണ് പുറത്തുവരുന്നത്. 2019 ജൂലൈ 11നാണ് റെഡ് ക്രസന്റ് സംഘവും ലൈഫ് മിഷനും തമ്മില്‍ ധാരണാപത്രം ഒപ്പിടുന്നത്. റെഡ് ക്രസന്റ് പ്രതിനിധികളും മുഖ്യമന്ത്രിയും ഉന്നത ഉദ്യോഗസ്ഥരും ഒപ്പം നില്‍ക്കുന്ന ഫോട്ടോ മുഖ്യമന്ത്രിയുടെ ഫേസ് ബുക്ക് പേജില്‍ അദ്ദേഹം തന്നെ ഷെയര്‍ ചെയ്തിരുന്നു.

എന്നാല്‍ വിദേശ സ്ഥാപനം വഴിയുള്ള വന്‍ തുകയുടെ സഹായവും ധാരണപത്രം ഒപ്പിടുന്നതും ലൈഫ് മിഷനെ ഔദ്യോഗികമായി അറിയിക്കുന്നത് തലേ ദിവസം മാത്രം. 2019 ജുലൈ പത്തിനാണ് റെഡ് ക്രെസന്റുമായി ധാരണാപത്രം ഒപ്പിടുന്ന കാര്യം ലൈഫ് മിഷനെ ശിവശങ്കര്‍ അറിയിക്കുന്നത്. അന്ന് തന്നെ നിയമോപദേശം തേടി ധാരണാപത്രം ഒപ്പിട്ടു. അതായത് റെഡ് ക്രസന്റിന്റെ കാര്യത്തില്‍ നടന്നത് ശരവേഗത്തിലുള്ള ഉന്നത ഇടപെടല്‍.

അതിവേഗം നടന്ന ഈ ഇടപെടലുകളിലെ സംശയങ്ങള്‍ ശക്തമാകുമ്പോഴും സര്‍ക്കാറിന് ഒരു ഉത്തരവാദിത്വവും ഇല്ലെന്ന് മുഖ്യമന്ത്രിക്ക് പിന്നാലെ തദ്ദേശഭരണമന്ത്രിയും പറയുന്നു. ഇടപാട് വിവാദത്തിലായിരിക്കെ ധാരണാപത്രം ഇതുവരെ സര്‍ക്കാര്‍ പുറത്തുവിടുന്നുമില്ല. ധാരണപത്രം ആവശ്യപ്പെട്ട് പ്രതിപക്ഷനേതാവ് കത്ത് നല്‍കിയെങ്കിലും സര്‍ക്കാര്‍ മറുപടി പറഞ്ഞിട്ടില്ല.

എന്നാല്‍ കെട്ടിടം നിര്‍മ്മിക്കുന്നതിന്റെ കമ്മീഷനായി സ്വപ്നക്ക് ഒരു കോടി നല്‍കിയതായി യൂണിടാക് ഉടമ വെളിപ്പെടുത്തി. യു ഡി എഫ് സര്‍ക്കാരാണ് ഇത്തരമൊരു പദ്ധതിക്ക് തുടക്കമിട്ടത് അവര്‍ സമാഹരിച്ച രണ്ടര കോടിയില്‍ 74 ലക്ഷം മുടക്കി ഇടത് സര്‍ക്കാര്‍ 2.5 ഏക്കര്‍ സ്ഥലം വാങ്ങി. സിപിഎം ലോക്കല്‍ സെക്രട്ടറിയുടെ ഉടമസ്ഥതതയിലുള്ള സ്ഥലമായിരുന്നു ഇത്. സ്ഥലം വാങ്ങിയ ശേഷമാണ് കോസ്റ്റ് ഫോഡിനെ എസ്റ്റിമേറ്റ് തയ്യാറാക്കാന്‍ ചുമതലപ്പെടുത്തിയത്. വളരെ പെട്ടെന്നാണ് ഇവിടെ കെട്ടിട നിര്‍മ്മാണം നടത്താന്‍ റെഡ് ക്രസന്റ് എത്തിയത്. അതോടെ കോസ്റ്റ് ഫോര്‍ഡ് പുറത്തായി. അവര്‍ സര്‍ക്കാരിനെ സമീപിച്ചെങ്കിലും ഫലമുണ്ടായില്ല. തുടര്‍ന്ന് ലൈഫ് മിഷന്‍ പുതിയ എസ്റ്റിമേറ്റ് തയ്യാറാക്കി. ഇത് യൂണിടാക്കിന് കൈമാറി. യൂണിടാക്കിന് ലൈഫ് മിഷന്റെ അംഗീകാരമില്ല. എന്നാല്‍ അത്തരം സാങ്കേതികതകള്‍ക്ക് പ്രാധാന്യം നല്‍കേണ്ടതില്ലെന്നായിരുന്നു സര്‍ക്കാരിന്റെ വാദം. സിപിഎം ആണ് വടക്കാഞ്ചേരി നഗരസഭ ഭരിക്കുന്നത്.

സി. അച്യുതമേനോന്‍ സിപിഐക്കാരനായിരുന്നു. അതു കൊണ്ട് സിപിഎമ്മുകാര്‍ക്ക് അദ്ദേഹത്തോട് താത്പര്യമില്ല. സംസ്ഥാനത്തെ ഭവന നിര്‍മ്മാണ മന്ത്രി സിപിഐക്കാരനായ ചന്ദ്രശേഖരനാണ്. അദ്ദേഹം ഇക്കാര്യം അറിഞ്ഞോ എന്നു പോലും സംശയമാണ്.