കൊവിഡ് പ്രതിരോധത്തിന്റെ ഭാഗമായി രാജ്യത്ത് വിവിധയിടങ്ങളില്‍ ടാറ്റ ട്രസ്റ്റിന്റെ നേതൃത്വത്തില്‍ കൊവിഡ് ആശുപത്രികള്‍ പണിയുന്നുണ്ട്. കേരളത്തിലും ടാറ്റ കൊവിഡ് ആശുപത്രി നിര്‍മ്മിക്കുകയാണ്. സംസ്ഥാന സര്‍ക്കാര്‍ നല്‍കിയ അഞ്ചേക്കര്‍ ഭൂമിയില്‍ 541 കിടക്കകളുമായി സംസ്ഥാനത്തെ ആദ്യ കോവിഡ് ആശുപത്രി കാസര്‍കോട് ജില്ലയിലെ ചട്ടഞ്ചാല്‍ പുതിയവളപ്പില്‍ ഒരാഴ്ചയ്ക്കുള്ളില്‍ പൂര്‍ത്തിയാകും . 60 കോടി രൂപ ചെലവില്‍ 51200 ചതുരശ്ര അടി വിസ്തീര്‍ണത്തിലാണ് ടാറ്റ ആശുപത്രി നിര്‍മിച്ചത്.

30 വര്‍ഷം വരെ കേടുപാടില്ലാതെ ഉപയോഗിക്കാം. അറ്റകുറ്റപ്പണി കൃത്യമായി നടത്തിയാല്‍ 50 വര്‍ഷം വരെ ഉപയോഗിക്കാം,​ അതിവേഗതയിലാണ് ടാറ്റ നിര്‍മാണം പൂര്‍ത്തിയാക്കി ആശുപത്രി കേരളത്തിന് സമര്‍പ്പിക്കുന്നത്.

ഇതിനു പിന്നാലെ കൊവിഡ് ആശുപത്രി ചര്‍ച്ചകളില്‍ നിറയുകയാണ് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്റെ മകന്‍ ബിനീഷ് കോടിയേരിയുടെ ഫേസ്ബുക്ക് പോസ്റ്റ് '124 ദിവസത്തിനുള്ളില്‍ 541 കിടക്കകളുമായി കൊവിഡ് ആശുപത്രി തയ്യാര്‍.. ചരിത്രമായ് ഇടതുപക്ഷസര്‍ക്കാര്‍, അഭിവാദ്യങ്ങള്‍.' എന്നാണ് ബിനീഷ് കുറിച്ചത്. ഇതില്‍ സര്‍ക്കാരിന് മാത്രമായി അഭിവാദ്യം അര്‍പ്പിച്ചതിലാണ് സോഷ്യല്‍ മീഡിയയില്‍ വിമര്‍ശനം ഉയരുന്നത്. ടാറ്റയുടെ പേര് എങ്ങും പരാമര്‍ശിച്ചില്ല എന്ന് ഒരുവിഭാഗം ചൂണ്ടിക്കാണിക്കുന്നു.